Read Mizo Lushai Isaia 3 Bible Online

Isaia 3 - Mizo Lushai bible

Isaia 3

¹ LALPA, Engkim LALPAN Jerusalem leh Judai ram aṭangin An innghahna tinrêng a la bo mêk a ni, An rinpui chaw leh tui te,

²An pasalṭhate leh râltu mi te, Rorêltu te leh zâwlnei te, aienthiam te leh sipai te,

³Sawmnga hotu te leh mi chhuanawm te, Mi râwn tlâk te leh dawi thiam te, Aikaih thiam te a la bo mêk a ni.

⁴An hotu-ah naupang ka dah ang a, An chungah naupangchhiain ro an rêl ang.

⁵Mite chu an inep ang a, Pa leh pa an insual ang a, Ṭhian leh ṭhian an inbei bawk ang. Tleirâwl chu upa lakah a inlek ang a, Michhe tê tê pawhin mi zahawmte an pawisa lo vang.

⁶Miin an unau an pa ina awm chu an chelh ang a, “Nang zawng silhfên pawh i neih hi, kan hotu-ah ṭang la, hêng niai nuai hi I kutah awm rawh se,” an la ti ang.

⁷Chumi hun chuan ani chuan a lo hnial ang a, “Hêngho hi ka tuamhlâwm thei lo vang, Chaw leh silhfên ka nei bîk lo, Mipui hotu-ah zawng mi siam suh u,” a lo ti ang.

⁸Jerusalem a chim a ni ta a, Judai ram pawh a chhia a ni ta e. LALPA kalhin an ṭawng ṭhîn a, thil an ti ṭhîn, A ropuina an hmuhsit avângin.

⁹An hawiherah an thiam lohzia a lang a, Sodom mite angin an sual mualpho ta a, An inthup sêng ta lo. An chung a pik e, Mahni chhiatna an thlen a ni.

¹⁰Mi ṭhate hnênah chuan, “In ti ṭha e, In thil tih rah in sêng dâwn si,” ti ula;

¹¹Mi sualte chung chu a pik e, an chhe dâwn si, An tih chu an chungah pawh tih a ni dâwn si a.

¹²Ka mite awpbettu chu naupang an ni a, Hmeichhiaten an chungah ro an rêl. Ka mite u, in hruaituten an hruai bo ta che a ni, Kalna tûr lam pawh hre lovin in buai tâk hi.

¹³A mite sual târlang tûrin LALPA a inpeih a, An chungthu rêl tûrin a ding chhuak ta.

¹⁴ LALPA chuan an upate leh an hruaitute chungthu a han rêl a. “Nangni hi grep huan ram zotu chu in ni, Mi retheite thil in lâk chu in inah in chhêk khâwm a,

¹⁵Engtizia nge ka mite hi hetia in rah beha, Mi retheite neih chhun in lâk zawh zêl?” LALPA, Engkim LALPA thuchhuak chuan a ti.

¹⁶ LALPAN heti hian a ti: “Jerusalem hmeichhiate chu an va chapo êm! An kal âwr âwr a, mi an melh hrâw hrâw a, Tengeng ri chhawng chhawngin an kal awh awh a.

¹⁷ LALPA chuan Zion hmeichheho lu a tipân ang a, LALPA chuan saruakin a awmtîr ang.

¹⁸Chumi ni-ah chuan LALPAN An incheina ṭhate a lâksak ang: tengeng te, luhrên te, ṭhimkual te,

¹⁹bengbeh te, ngûn te, hmai khuhna te,

²⁰samhrên te, bânhrên te, kâwnghrên te, rimtui bâwm te, belmawi te,

²¹zungbun te, hnârvuah te,

²²kawrfual ropui te, puan te, kawrchung te, khai nel nel te,

²³dârthlalang te, puan pan te, diar te, puan chei te a lâk bosak ang.

²⁴Rimtui aiah rimchhia, Kâwnghrên aiah hruihrual, Sâm siam puk aiah chal kawlh, Awm bel mawi aiah saiip puan, Hmêlṭhat aiah hmêlchhiat, An chan tûr a ni ang.

²⁵I mite chu khandaiha sah hlum an ni ang a, I mi huaisente pawh indonaah an thi bawk ang.

²⁶Khaw hotute ṭapin an rûm ang a, Khuaa mite saruakin an ṭhu ang.