Read Mizo Lushai Isaia 30 Bible Online

Isaia 30 - Mizo Lushai bible

Isaia 30

¹ LALPA thuchhuak chuan heti hian a ti: “Hel hmang fate tak hi aw! Ka remruat loh angin thil an ti a, Ka thu lovin an inbe rem a, An sual chungah sual an belh ta.

²Min râwn lovin Aigupta-ah an chhuk thla a, Farawa chu inhumhim nân phen an tum a, Aigupta hlim chu bêl tûrin an kal ta.

³Farawa hum nih chu an zahna tûr a la ni ang a, Aigupta hlim an bêl chu an mualphona a la ni ang.

⁴An hotute Zoan an thleng thla tawh, An palaiten Hannes an thleng ta e.

⁵An hnemhnânpui loh tûr hnam avâng chuan zah an la tuar ang. Ṭanpui thei lo, chhenfakawm lote avâng chuan Zakin an mualpho vang.”

⁶Chhim lam ramsa chungthu: Ram hrehawm leh hlauhawm Sakeibakneinu leh a pa chênna, Rûlngân leh rûl thlâwk thei tamna ramah An rote chu sabengtung an phurhtîr a, An sumte chu sanghâwngsei thlukvûmah an hlâng, Hnemhnânpui loh tûr hnam an pe dâwn a ni.

⁷Aigupta chu eng mah a ni lo va, Ṭanpui theih rêng a nei lo va, Chuvângin, “Rulpui awm hle hle-i,” ka ti mai.

⁸Kal la, an hmuh ngeiah chûng chu ziakna phêkah ziak rawh: Kumkhuaa hriat reng tûrin lehkhabu-ah ziak lût ang che.

⁹Hel chîng hnam an ni a, Fa dawthei tak an ni, LALPA thupek ngaithla duh lo fa an nih hi.

¹⁰Hmutute hnênah, “Hmu vet teh suh u,” an ti a, Zâwlneite chu, “In hmuh ang thil dikte chu min hrilh suh u, Ngaihthlâk nuam min hrilh zâwk ula, Ngaihngam taka kan awm theihna tûrin bumna thu min hrilh zâwk rawh u;

¹¹Min kiansan ula, insaseng daih rawh u, Israel Mi Thianghlima thu hi sawi tei vet suh u,” an ti.

¹²Chuvângin, Israel Mi Thianghlima chuan heti hian a ti: “Ka thu in hnâwl a. Tharum thawha vervêk taka tih hi in thlang ta a, Rin chhan berah in neih tâk hi.

¹³He thil sual hi in tih avângin Lungbang sâng tak, khi chat, chim ṭêp, Puar pup, chim phut tûr ang hi in ni ang.

¹⁴Dîm hlek lova hlumbêl vuak keh, Meiling chawina khawpa lampei hlai tâwk, Tui thâlna pawh awm lo khawpa, Vuak sawm ang hi in ni ngei ang.

¹⁵ LALPA, Engkim LALPA, Israel Mi Thianghlima chuan heti hian a ti: “Lo kîr ula, awm hle hle mai rawh u; Tichuan, chhandam in ni ang a, Thlaphâng lovin ring mai ula, Chu chu in chakna tûr a ni.” Mahse, in duh si lo.

¹⁶‘Kan duh lo ve, sakawrah kan chuang ang,’ in ti vei a; Chuang tak ula, tlânchhe rawh u, ‘Sakawr tlân chak chungah kan chuang mai ang’ in ti vei maw? Chak zâwk daihin an ûm dâwn a che u.

¹⁷Pakhat hrâwkah sâng rual in tlânchhia ang, Panga lakah phei chuan in vai tlân ang. Tlâng chhîp pâwng laia puanzâr in zâr te chu In tlânchhiatsan vek ang.

¹⁸Nimahsela, LALPAN a khawngaihin a la nghâk a che u, A ngilneihna a la târlang reng a ni. LALPAN dik takin ro a rêl ṭhîn, Amah nghâktute chu an nihlawh e.

¹⁹Nangni, Zion tlânga mi, Jerusalem khuaa chêngte u, in ṭap leh tawh lo vang; ṭanpui dîla in au thâwm a hriat chuan a lainat ngei ang che u a, a chhâng ngei ang che u.

²⁰LALPA chuan hrehawmna leh manganna tuartîr che u mah sela, in zirtîrtu chu a hla lo vang a, in hmuh phâk rengah a awm ang.

²¹Ding lamah emaw, vei lamah emaw in pên dâwn chuan, “Hei hi kawng dik chu a ni, tah hian kal rawh u,” in hnungah a rawn ti zêl ang.

²²In tangkarua tuam leh rangkachaka luan milem chherte chu bawlhhlawh in ti ang a, ‘tenawm’ tiin i paih darh ang a, “Daih mai a!” in la ti ang.

²³Lova in thlai chi thlâk chu ruah a nantîr ang a, ṭha tak tak hlirin a rah tiar tuar ang.

²⁴Chumi hun chuan in ran rualte chu hnimhring awm duainaah an tla ang a, bâwngpa leh sabengtung, leileta in chhawrte chuan buhpâwl then fai, chi al an tlân ang.

²⁵In hmêlmate sâm an niha, an kulhte a chim zawh hun chuan tlâng sângah leh mual pâwnga tui luannaahte chuan tui a luang dur dur ang.

²⁶A mite vuakna hliam a tuamsak a, an pemte a tihdam hunah chuan thla chu ni tlukin a êng ang a, ni pawh a lêt sarihin, ni sarih chhûnga a êng tlukin a êng ang.

²⁷Hla tak aṭang pawhin a hmuh theih, en rû, LALPA thiltihtheihna a lo lan saw, A thinur mei a khu chho ngun ngun a, Lungawi lovin a hnûr nasa mai. A thuchhuak chu meialh kan ral hmang ang a ni.

²⁸A thaw chhuak chu lui lian luang liam, Nghâwng thleng zawk ang mai hi a ni. Hnam tin thliarin a tichhia ang, An kâah chuan sakawr lakam a barh ang a, A hruai bo vang.

²⁹Nangni zawng, kût thianghlim hman tirh zân angin lâwmin in zai ang a; Israel-te lungpui, LALPA tlâng pan, baja awih, An kal theuh theuh ang hian hlim takin in awm ang.

³⁰ LALPA chuan a aw ropui tak chu a chhuah ang a, a kutthlâk chu mi tinin an hmu ang. A thinur meialh chu kan ral hmang mei alh puat puat ang leh thlipui leh ruahpuivânâwn sûr leh rial tla dur dur angin a lo thleng ang.

³¹Asuri-hovin LALPA aw an hriat chuan hlauvin an khûr ang a, a talhfiak chu an tuar ang.

³²Châwl lêk lova LALPAN a talhfiak a vaia Asuria a hlap apiangin a mite chuan benchhek leh perkhuangin an lo rem ang. Asuria chungah kut a thlâk dâwn a ni.

³³Asuria lal rawhna tûr meipui nasa tak chu chheh thûr a ni daih tawh a, thing tam tak an rawlh bawk; A tikâng tûrin LALPA chuan lui anga luang kât alh a thaw chhuak ang.