Read Mizo Lushai Isaia 32 Bible Online

Isaia 32 - Mizo Lushai bible

Isaia 32

¹Ngai teh, lal dik pakhat alo lal dâwn, A upate pawhin dik takin ro an rêl ang.

²Thlipui laka bihrûkna tûr, Ruahpui laka phen tûr an ni ang a, Ram rova lui luang leh thlalêra lungpui hlim ang hi an ni bawk ang.

³Ngun takin thil an thlîr ang a, Ngun takin an beng an dawh zêl ang.

⁴Hmanhmawha rêl lovin engkim an chîk ang a, Ṭawng ban lovin an thu a fiah bawk ang.

⁵Mi sual chuan tu ma zah an kai lo vang a, Mi duhâm chuan ngaihsân a hlawh lo vang.

⁶Mi sualte ṭawng a tlahawlh a, Thil sual tih tûr an suangtuah ṭhîn. Pathian elsên an chîng ṭhîn a, LALPA thu pawh an la lek ṭhîn. Rilṭâmte tlaina tûr an ngaihthah a, Tuihâlte in tûr tui an leihbuaksak bawk ṭhîn.

⁷Duhâmte duhâmzia a va thûk êm! Thil sual tih hi an tum rân a, Dâwta retheite tihchhiata, Pachhiate pawh dik mah sela tihchhiat an tum.

⁸Mi ṭhate erawh chuan thil ṭha an suangtuah a, Chu chu an ṭan zui ngam zêl ṭhîn.

⁹Nuho, awm der der ṭhînte u, Tho ula, ka thu hi ngaithla rawh u. Nangni, nula, lungmuanga tâlte u, Ka sawi hi bengkhawn teh u:

¹⁰Kum khat emaw a ral hnu chuan Lungmuanga tâlte u in la khûr ang. Grep rah hleh tûr a awm dâwn lo, Theirah lawh tûr a awm hek lo vang.

¹¹Awm der der ṭhînte u, hlau hle rawh u, Lungmuanga tâlte u, khûr bawk rawh u. Inhlîp ula, saruakin awm ula, In kâwngah khân saiip puan fêng rawh u.

¹²In huan duhawm, thlai ṭhat duhna, A chhiat tâk avângin âwm chûmin ṭap rawh u.

¹³Ka mite lo ram chu, hlohar leh hnimhlîngneiin a bawh zo ta. Khawpui nuam tak leh hlim taka an chênna inte A chhiat tâk avângin ṭap chiam rawh u.

¹⁴Lal in an rauhsan a, Khaw lûn tak ṭhîn chu a ram ta e. A mualte leh vênbûk in sângte chu Ram sabengtungte tualchaina a ni ang a, Ranrual an tla bawk ang.

¹⁵Chung lam ata Thlarau kan chunga a rawn leih hunah chuan, Thlalêr ram ro chu ram ṭhaah a chang ang a, Theikung a ngaw khup ang.

¹⁶Thlalêr ni ṭhînah chuan dik takin ro an rêl ang a, Ram ṭhaah chuan dik takin thil an ti bawk ang.

¹⁷Dik taka thil an tih ṭhin avângin Râlmuang takin an khawsa ang a, Lungmuang takin an awm kumkhua bawk ang.

¹⁸An in leh lovah ka mite chu Thlamuang takin chênna rinawm leh muanawmah chuan An awm der der tawh ang.

¹⁹Chutih hunah chuan ngaw chu a dai ruai ang a, Khawpui pawh chu hmun zâwl duaiah a innghat ang.

²⁰Tui hnianghnârnaa thlai chîng ṭhîna, Bâwng leh sabengtungte thlah ṭhînte u, In nihlawh e.