Read Mizo Lushai Isaia 33 Bible Online

Isaia 33 - Mizo Lushai bible

Isaia 33

¹Rawk tâwk ngai lo, mi dang rawk ṭhînte tak hi aw! Bum tâwk ngai lo mi dang bum ṭhînte hian, In rawk zawhah rawk in tuar ang a, In bum hnuah bum in tâwk ang.

² LALPA, kan chungah zahngai la, kan thlîr reng a che, Tûk tin kan bân thapui ni la, Mangan ni-ah min chhanhim bawk ang che.

³I thâwmah chuan mite an tlânchhia a, I lo chêt chuan hnam dangte an darh ta.

⁴Khau puang angin râl sumte chu an chuh a, Chhar khâwm tûrin an vâk sup sup mai e.

⁵Chung lamah khian LALPA chu a awm a, A va ropui êm! Zion-ah dik tak leh fel takin ro a rêl e.

⁶In hun vawngtu a ni, A mite chu a hum tlat a, Finna leh hriatna pawh a pe. LALPA ṭih hi an ro hlu ber a ni.

⁷En teh, an pasalṭhate chu pâwnah an au vêl ruai a, Remna zawnga palaite chu an ṭap zawih zawih mai e.

⁸Lamlian a reh ṭhuap a, Kawnga kal ngam rêng an awm lo. Thuthlung an bawhchhia a, Inremna thu an pawisa lo va, Tu mah an zah hek lo.

⁹Ram chu a chul ta a, a ram reng mai, Lebanon ngaw a ngui zo ta. Saron phai chu thlalêr ang mai a ni, Basan leh Karmel tlâng thinghnahte chu a ṭîl zo ta.

¹⁰ LALPA chuan heti hian a ti: “Ka han che tawh teh ang, ka inchawisâng ang a, Ka ropuizia ka târlang tawh dâwn e.

¹¹Thil sâwt lo in suangtuah a, Eng mah in phuh chhuak si lo va, In thuchhuak chu mei ang a ni. A kâng ral vek dâwn a che u.

¹²Chinai lung rawh a darh ang leh Hlîngbuk sâm chu a kâng vâp mai ang hian in ral vek ang.

¹³Hla taka awmte u, ka thil tih hi hre vek ula, Hnai deuhva awmte u, ka ropuizia lo hre rawh u.

¹⁴Zion-a chêng, mi sualte chuan an hlau vang a, Sakhaw ngaihsak lote chu an khûr bawk ang. ‘Kan zînga tu hian nge a thinur mei tuar zo vang? Kumkhuaa alh reng hi tu nge tuar peih awm i?’ an ti ang.

¹⁵Dik taka thil tia, thu ṭha sawi ṭhîn, Hlêpna bawlhhlawh chu duh lova, Thamna hûm hlauva kut thing ṭhîn; Thisen chhuah rawt bengkhawn duh lo, Thil sual tih rawtnaa tel ve duh lo mi chu

¹⁶Hmunsâng takah a chêng ang a, Kulhbîng chhûnga awmte angin a him bawk ang, Ei tûr ngahin tui in tûr pawh a tlachham lo vang.

¹⁷In mit ngeiin lal ropui tak, Ram zau tak chunga ro a rêl in hmu ang.

¹⁸In râlṭit lai nite kha in hre chhuak ang a, ‘Hming lamtu kha khaw nge a awm tâk le, Chhiah lo dawnga, in zât chhiartu pawh kha?’ In la ti ang.

¹⁹Mi kawlhsen tak, thle lâwr lâwr, Ṭawng thûm hlêt hlût leh ṭawng berek chîl chêl, An sawi in hriat hleih theih si lohte kha In hmu leh tawh lo vang.”

²⁰Kût kan hmanna tûr Zion khua hi thlîr ve teh u, Jerusalem khua hi en teh mah u, Puan in nuam tak, zâwn sawn ngai lo, A khennghehna phawng ngai lova, A kaihmarna chat ngai hauh lo ang hi a ni.

²¹Tah chuan, LALPAN a ropuina min entîr ang, Lui tamna ram, tui kawng zau tak bulah kan chêng ang a, Hmêlmaten lawng an rawn kar lût thei lo vang a, Lawng lian a lo lût thei hek lo vang.

²² LALPA chu ro min rêlsaktu a ni, LALPA chu kan hotu a ni a, LALPA chu kan lal a ni, Aman min hum tlat ang.

²³An lawng puanzâr kaihna hruite a dûk ta a, A ngul an thlung nghet thei ta lo, Puanzârte pawh an kai pharh thei lo va, An sum zawng zawng kan man ang a, A tam êm a, kebaite hial pawhin an chuh hman ang.

²⁴Khaw chhûnga awmte chuan, “Ka dam lo ve,” an ti ngai lo vang a, An sualte chu ngaihdam a ni bawk ang.