Read Mizo Lushai Isaia 34 Bible Online

Isaia 34 - Mizo Lushai bible

Isaia 34

¹Hnam tinrêngte lo hnai ula, Ngaithla tûrin lo kal rawh u. Lei leh a chhûnga awmte u, lo haw ula, In zavaiin ngaithla rawh u.

²Hnam tin chungah LALPA a thinur a, An sipai rual chungah a thin a rim a ni. Thah vek atân a dah tawh e, Talh mai tûrin a hlân vek tawh.

³An ruangte chu paih tûr a ni, Phûm tûr a ni lo ve, A uih vut vut ang a, Tlângah an thisen chu a luang zeih zuih bawk ang.

⁴Vâna awmte pawh khi an ral ang a, Lehkha angin vân khi zial bo a ni ang a, Vâna awm zawng zawng khi an tla ang a, Grep leh theipui hnah ro a ṭîl ang hian.

⁵Vânah ka khandaih chu a inpeih ta, Thah atâna dah tawh Edom mite chungah a chhuk thla ang.

⁶An thisenin LALPA khandaih chu a bual ang a, An thau a kai luai ang. Berâm leh kêl thisente, Kêlpa kal thautea inthawi angin Bozra khuaah LALPA a inthawi dâwn, Edom mite a talh ṭeuh vang.

⁷Chumi rual chuan selête pawh a that ang a, Bâwngtuaite leh a chalte pawh a talh bawk ang. An ram chu thisenin a bual ang a, Vaivutte pawh thauvin a pawlh vek ang.

⁸ LALPAN phuba a lâk a hun ta a, Zion tâna a thungrulh hun a lo ni ta.

⁹Edom ram luite chu alkatra-ah a chang ang a, Vaivutte pawh kâtah a chang bawk ang. A ram pum chu alkatra ang maiin a kâng ang a,

¹⁰Chhûn zân zawmin an timit lo vang a, A khu ngun ngun reng ang. Ṭhangthar zêl thlengin a ram ang a, Tu mah tlawh duh an awm lo vang.

¹¹Tuivalawng leh sakuh an awm ang a, Chhimbuk leh choâkte an chêng ang. Leilung siam hma ang khân LALPAN a tichhe rem rum ang.

¹²Lala ṭang duh an awm lo vang a, Hotu tûr pawh an awm hek lo vang.

¹³Lal inte chu hlîng bawnin a khuh ang a, Kulh chhûngah pawh kângṭhai leh hlohar a tla khat ang. Sihal chênna a ni ang a, Chingpirinu bukhuarna hmun a ni bawk ang.

¹⁴Sanghar leh chinghnia an insûl reng ang a, Sathâr chuan a ṭhian a ko bawk ang. Tah chuan ṭaunu a lût ang a, Hahchawlhna tûr a hmu ve ang.

¹⁵Rûl thlâwk thei chuan bu a nei ang a, A tui ang a, a awp keu ang a, A note chu a awp lum ang. Mulukawlhte pawh an kawppuite nên Tah chuan an awm ho vang.

¹⁶ LALPA lehkhabu-ah zawng la, chhiar teh, Pakhat tê mah an bo lo vang, Kawppui an nei ṭheuh zêl a ni. LALPA chuan thu a pe tawh a, A Thlarau chuan a hruai khâwm ang.

¹⁷An tân ṭhum a vâwr fel tawh a, Ram chin siamin an awmna tûr a pe vek tawh, Chu chu an hmun kumkhua tûr chu a ni, An thlahte pawhin an nei zêl ang.