Read Mizo Lushai Isaia 37 Bible Online

Isaia 37 - Mizo Lushai bible

Isaia 37

¹Lal Hezekian chûng thu chu a hriatin a puan a pawt thlêr a, saiip puan a sin a, LALPA inah a lût ta a.

²Lal chhûngkaw enkawltu Eliakima te, Ziaktu Sebna te leh puithiam zînga upa te chu saiip puan sinin Amoza fapa zâwlnei Isaia hnênah a tîr a.

³“Lal Hezekian heti hian a ti: ‘Vawiin hian kan tân manganna ni a lo thleng ta, min hmuhsita, min diriam tak êm hi! Nau hrin hun tawh, a nu chau lutuk si ang mai kan nih hi.

⁴Pathian nung sâwt tûra Asuria lal mi tirh, Rabsakeha thu sawi kha LALPA i Pathian chuan a lo hre châwk ang a. LALPA, i Pathian chuan hriain hrem teh se. Kan mi, la dam chhunte tân nang ṭawngṭai rawh khai,’ a ti e,” an va ti a.

⁵Lal Hezekia mi tirhte chu Isaia hnên an va thleng a.

⁶Isaia chuan an hnênah, “LALPA chuan heti hian a ti: ‘Asuria lal chhiahhlawhten min diriam dân thu i hriatte kha hlau suh.

⁷Ngai teh, zâmna rilru ka pe ang a, thuthang ka hriattîr ang; a ramah a kîr ang a, a ram ngeiah khandaihin an sât hlum ang,’ tiin in pu hnênah va sawi rawh u,” a ti a.

⁸Rabsakeha chu a ṭin a, Lakis aṭangin Asuria lal chu a insawn a, Libna khua a bei tih a hriatin chu lam chu a pan a, a va hmu a.

⁹Ethiopia lal Tirhaka chanchin chu Asuria lal an hrilh a, amah bei tûrin a lo thawk tih a hriatin Hezekia hnênah palai a tîr a.

¹⁰“Judai ram lal Hezekia hnênah, ‘I rinchhan in Pathian chuan Asuria kutah Jerusalem chu a pe lo vang,’ tiin bum che u suh se.

¹¹Asuria lalten an ram luah zawng zawnga an thil tih, an ram an tihchhiatsak vek thute i hria a. Nang tehlul hi i him bîk dâwn em ni?

¹²‘Ka paten an tihchhiat hnam Gozan te, Haran te, Rezep te, Telesar-a awm Eden-ho te kha an pathianten an chhan thei em ni?

¹³Khawiah nge Hamath lal te, Arpad lal te, Sefarvaim-a khaw awm lal te, Hena lal te, Iva lal te kha an awm tâk?’ zu ti rawh u,” a ti a.

¹⁴Palai lehkha rawn ken chu Hezekia chuan a hmuhin a han chhiar a, LALPA inah a chho va, Hezekia chuan lehkha chu LALPA hmaah a pharh a,

¹⁵Hezekia chu LALPA hnênah a ṭawngṭai ta a.

¹⁶“Engkim LALPA, Israel-te Pathian, Cherub chunga ṭhu, nang chauh hi Pathian chu i ni, ram luah zawng zawng rorêltu i ni si a, lei leh vân pawh hi i siam a ni.

¹⁷Aw LALPA, i beng lo chhi la, ngaithla teh: LALPA, meng la, en teh; Pathian nung sâwt tûra Senakeriban thu a rawn sawi zawng zawng hi ngaithla teh.

¹⁸Aw LALPA, Asuria lalte hian hnam tin an bei a, an ramte an tihchhiat tâk hi.

¹⁹An pathiante meiah an rawhsak a, chûng chu Pathian an ni lo rêng a, mihring kuta siam thing leh lung mai an ni a; chuvângin, chhe ngei tûr phei zawng an ni.

²⁰LALPA, tûnah a kut aṭang hian min chhan chhuak la; tichuan, khawvêl ram luah zawng zawnga miten nang chauh hi LALPA chu i ni tih an hre dâwn nia,” a ti a.

²¹Amoza fapa Isaia chuan Hezekia hnênah mi a tîr a: “A hnêna i ṭawngṭaina chungchâng leh Asuria lal Senakeriba chungthu-ah

²²LALPA, Israel-te Pathian thu sawi chu hei hi a ni: Zion fanuin a hmusit che a, a nuihzat che, Jerusalem fanu chuan i tlânchhia chu lu a thin khum che.

²³Tu nge i nuihzata, i sâwt vei le? Tu lakah nge i râwl i rin? Tu lakah nge i hawi chapo hle le? Israel Mi Thianghlima chungah a ni.

²⁴I chhiahhlawhte hmangin LALPA i sâwt vei a, ‘Tawlailîr tam tak nên tlâng sâng sângah ka lâwn a, Lebanon tlâng kil tin ka fang, Sidar thing sâng sâng ka kit a, Fâr thing ṭha ṭha ka kit asin; A tlâng sâng lai ngaw rilte pawh ka fang vek a,

²⁵Tuite ka chhun chhuak a, ka in bawk a, Aigupta luite chu ka kephahin ka dai kang vek a ni,’ i ti vei a.

²⁶Hmân aṭanga tih ka tum tawh a ni, I hre na nge? Tûna thil lo thleng hi, Hmâna ka rêl daih tawh a ni. Kulh nei khuate i tihchhiata,

²⁷A chhûnga chêng an zâmte leh Thlabâr taka an mualpho te, Phûl leh muala hlobet, In chung zâwla hnim ṭiak tîr te, Thli lum chhêm vuai tâk te, Ka rêl lâwk vek a ni.

²⁸Ka chunga i ânhla te, I ṭhut, i luh leh chhuahte ka hria asin.

²⁹Ka chungah hian i âng vei a, I chapozia ka beng a lo thleng ta, I hnârah chuan hnâr kawl ka vuah ang a, Lakam ka barh ang che a, I lo kalna lamah ka hnûk kîr leh ang che.”

³⁰Lal Hezekia hnênah, “Hei hi i tân chhinchhiahna tûr a ni ang: Kuminah hian buh hli in ring ang a, nakkumah pawh chumi hli chu in ring leh ang. A kum thumnaah chuan thlai chîng ula, a rah in seng dâwn nia. Huanah grep phun ula, a rah in ei bawk ang.

³¹Judai rama mi la damte chu thei kûng, thûk taka zung thlâk, rah tup ang hi an la ni ang.

³²Jerusalem aṭangin dam chhuak tûr an awm a, Zion tlângah thi bâng an awm ngei dâwn a ni. Engkim LALPA ṭhahnemngaihna chuan chûng chu a tipuitling ngei ang.

³³Chuvângin, Asuria lal chungchâng LALPAN heti hian a ti: “He khawpuiah hian a lo lût lo vang a, thal khat pawh a thlah lo vang;

³⁴phaw nên a rawn bei lo vang a, lei kulh a lai hek lo vang, LALPA thuchhuak chuan a ti.

³⁵He khua hi keimah avâng leh Davida vângin ka hum ang a, ka chhanhim dâwn a ni,” a ti a.

³⁶ LALPA tirh Vântirhkoh chu Asuria-ho bûkah chuan a kal a, mi nuaikhat leh sîngriat leh sângnga a that a, zînga an han thawh chuan mitthi ruang hlîr a lo thal phung a.

³⁷Asuria lal Senakeriba chu a ṭin a, a haw a, Ninevi khuaah a awm ta a.

³⁸An pathian Nisroka ina pathian biaa a kûn lai chu a fa Adrammeleka leh Sarezera chuan khandaihin an sât hlum a, Ararat ramah an tlân ta a. A fapa Esarhadona chu a lo lal ta a.