Read Mizo Lushai Isaia 38 Bible Online

Isaia 38 - Mizo Lushai bible

Isaia 38

¹Chûng lai chuan lal Hezekia chu thih ngamin a na a, Amoza fapa Isaian a rawn tlawh a, a hnênah, “LALPA chuan heti hian a ti: I chhûngkaw thu rêl fel rawh, i thi dâwn si a, i dam chhuak dâwn lo ve,” a ti a.

²Hezekia chuan bang lam a hawi a, LALPA hnênah a ṭawngṭai a,

³“Aw LALPA, i hmaah dik takin ka awm ṭhîn a, thinlung thianghlim puin i mit hmuha thil ṭha ka tih ṭhin kha, khawngaih takin hre reng ang che,” a ti a, a ṭap ta zawih zawih a.

⁴LALPA chuan Isaia a rawn bia a:

⁵“Tho la, Hezekia va hrilh rawh. LALPA, i pu Davida Pathian chuan heti hian a ti: I ṭawngṭai ka lo hria a, i mittui pawh ka lo hmu e. Ngai teh, kum sâwm leh kum nga ka damtîr leh ang che.

⁶Asuria lal lakah nang leh he khua hi ka chhan ang a, khawpui hi ka hum tlat ang.

⁷“LALPAN a thu sawi hi a ti ngei dâwn tih LALPA hnên aṭanga i tân chhinchhiahna tûr chu hei hi a ni:

⁸“Lal Ahaza dâr chin tehna hlim saw rahka sâwmin ka kîrtîr ang,” a ti a. Chutichuan, ni hlim chu rahka sâwm a kîr leh ta a.

⁹Judai ram lal Hezekia damlo, dam leh ta chuan heti hian a ziak:

¹⁰Tarkûna dam lovin mitthi khuaah Ka vânglai hian ka liam dâwn ta emaw ka ti.

¹¹Mi nung ramah LALPA hmu tawh lovin Khawvêla chêngte hi hmuh leh ka beisei lo.

¹²Berâmpute puan in an ṭhiat ang hian Ka chênna in min ṭhiatsak a. Puan bu tah zawh an hlep ang hian, Ka nunna hi min hlehsak a, Tûk tin zân tin ka chau mai dâwn emaw ka ti.

¹³Kâwl ên thlengin ṭanpui dîlin ka au ṭhîn a, Ka ruhte chu sakeibaknei seh tliah ang hi a ni, Tûk tin zan tin ka chau mai dâwn emaw ka ti.

¹⁴Vamûr angin ka chiar ka chiar ṭhîn a, Ṭhuro angin ka rûm ka rûm bawk ṭhîn. Chung lam thlîr nân ka mit a vai zo ta. LALPA, hnehchhiaha ka awm hi, a bul han tum rawh le.

¹⁵Eng nge ka sawi tâk ang? Min hrilh angin i rawn ti ta ngei a, Ka tuarna avâng hian ka dam chhûngin ka kal dêm dêm tawh ang.

¹⁶ LALPA, i tân ka nung ang a, Nangma tân chauh ka nung tawh ang. Min tichak la, min tidam leh ang che.

¹⁷Ka tuarna kha ka ṭhatna tûr a lo ni e, Min lainat a, chhiatna khur ata chu min la chhuak a, Ka sual zawng zawng i ngaidam ta.

¹⁸Mitthi khua aṭangin lâwmthu an sawi thei lo, Thi tawhte chuan an fak thei hek lo che, Leilâwta tlate chuan an ring pha tawh lo che.

¹⁹Nungdama awmte chauh hian a ni nangmah fak che, Keiin tûna ka fak ang bawk che hian, Pate chuan i thutak chu an fate an zirtîr ṭhîn.

²⁰ LALPAN min tidam ta, Ṭingṭang tumin fak hla ka sa ang a, Ka dam chhûng zawng LALPA inah Amah fak hla ka sa tawh ang.

²¹(Isaian, “Theipui rah hmehhlâwm la ula, a khawihliah bel rawh u, a dam mai ang,” a tih kha.

²²Hezekia pawhin, “LALPA inah ka chho thei dâwn tih chhinchhiahna eng nge ni ang?” a lo ti tawh a.)