Read Mizo Lushai Isaia 39 Bible Online

Isaia 39 - Mizo Lushai bible

Isaia 39

¹Chumi lai chuan Baladana fapa Merodak-baladana, Babulon lal chuan Hezekia damlo a dam leh tih a hriatin thilpêk leh lehkha a rawn thawn a.

²An chungah chuan Hezekia chu a lâwm hle a; tichuan, a sum dahna in a entîr a, tangkarua te, rangkachak te, mosola te, hriak man tam te, a râlthuam dahna ina râlthuam te, a sum dahna ina thil awm zawng zawng chu a entîr vek a. Hezekia chuan ama in leh a ram chhûnga a thil neih zawng zawng chu entîr loh a nei lo.

³Zâwlnei Isaia chu Hezekia hnênah a lo kal a, “Khâng mite khân eng nge an rawn tih dâwn? Khawi lam aṭanga lo kal nge an nih?” a ti a. Hezekia chuan, “Ram hla tak aṭanga lo kal an ni, Babulon khua aṭangin,” a ti a.

⁴“I in chhûnga mi engte nge an hmuh?” a ti a. Hezekia chuan, “Ka ina thil awm zawng zawng ka entîr vek a, ka sum dahna ina mi entîr loh eng mah ka nei lo,” a ti a.

⁵Isaia chuan Hezekia hnênah, “Engkim LALPA thu hi ngaithla teh:

⁶Ngai teh, i ina thil awm zawng zawng, i paten vawiin thlenga an dah khâwm nên, Babulon-a an lâk vek hun a lo thleng dâwn, eng mah hnutchhiah an nei lo vang, LALPAN a ti.

⁷Nangma hrin ngei, i fapate zînga ṭhenkhat an man ang a, an til an rehsak ang a, Babulon lal inah an awm ang,” a ti a.

⁸Hezekia chuan a dam chhûngin râlmuang leh him takin an awm dâwn tihna niin a ngai a, Isaia hnênah, “LALPA thu i sawi chu a ṭha e,” a ti a.