Read Mizo Lushai Isaia 40 Bible Online

Isaia 40 - Mizo Lushai bible

Isaia 40

¹“Ka mite hi thlamuan rawh u, thlamuan rawh u,” In Pathianin a ti.

²Jerusalem hnênah thlamuanna thu hril thuai rawh u, An tuar tûr chu an tlâk ta a, Hrem an tuar hi a tâwk ta e, LALPA kut pawh an sual lêt hnih an tuar tawh e.

³Aw chuan, “Thlalêrah LALPA kawng buatsaih ula, Kan Pathian tân ram rova lamlian tirual rawh u.

⁴A ruam apiang chhûng khat ula, Tlâng leh mualte râwt hniam rawh u, A kawi laite tingîl ula, A bumbohte tirual rawh u.

⁵ LALPA ropuina chu a lang dâwn e, Mi zawng zawngin an hmu vek ang,” LALPA ngei chuan a ti asin.

⁶Aw chuan, “Au rawh,” a ti a. Ani chuan, “Eng nge ka sawi tâk ang?” a ti a. “Mihringte hi hnimhring ang an ni a, An ropuina pawh phûl pangpâr ang a ni.

⁷ LALPA thli chu a lo tleh a, Hnim hring a chhêm vuai a, Pangpâr a tichuai ṭhîn, A ni, mihringte hi hnimhring ang chauh an ni,

⁸Hnimhring a ro ṭhîn a, Pangpâr a chuai bawk ṭhîn, Kan Pathian thu hi zawng a awm kumkhua dâwn si.

⁹Tlâng sângahte lâwn chho zêl la, Zion hnênah thu lâwmawm chu aw ring takin puang rawh, Jerusalem hnênah thu lâwmawm chu puang rawh, tîm suh, Judai ram khawpuite chu hrilh la, ‘In Pathian chu a lo kal ta,’ ti rawh.

¹⁰En teh, LALPA Pathian chu mi chak angin a lo kal a, A bân tha chak hmangin ro a rêl dâwn, A chhan chhuahte a rawn hruai a, A tlan chhuahte a rawn chhawm e.

¹¹Berâm vêngtu angin berâm rual chu a châwm ang a, A note chu la khâwma pawm chungin A puite chu a hruai dial dial dâwn e.

¹²Tu nge vei khat lekin tuifinriat teh sêng ang? Tu nge vân khi khâp chhuak thei le? Tu nge leia vaivut hi khova teh sêng awm ang? Tlâng leh mualte tu nge bûk thei?

¹³ LALPA Thlarau chu tu nge thu neihsak anga, Tu nge remruatsakin kaihruai thei ang?

¹⁴A bengvâr nân tu nge a râwn ṭhina, Tu nge kawng dik entîr thei le? Tu nge hriat tûr zirtîr theia, Thil tih dân tûr kawhhmuh thei ang?

¹⁵ LALPA tân chuan hnam zawng zawng hi, Bâlṭin mawnga tui far khat ang, Bûkthlênga vaivut kai ang lek hi an ni; Thliarkârte pawh lungtê anga, Vawrh derh derh tham lek chauh an ni.

¹⁶Lebanon tlâng ngâwa ramsate chu LALPA hnêna inthawi nân chuan a tâwk lo va, Thing awmte lah tuah tham a ni hek lo.

¹⁷Hnam zawng zawng hi a tân eng tham an ni lo va, Engmahlo mai maiah a ngai.

¹⁸Pathian chu tu nên nge in khaikhin ang? Engte nên nge in tehkhin ang?

¹⁹Thil chher thiamin milem a han chher a, Thil chhûn thiamin rangkachakin a han luan a, Tangkaruain khaidiat awrh tûr a chhersak a,

²⁰Chutiang nei zo lo chuan thingtum ngêt lo a thlang chhuak a, Tlu lo tûrin thing tuk thiam chu a tuktîr ṭhîn, Chutiang milem nên maw min tehkhin ang?

²¹In hre na nge? In ngaithla lo vem ni? A tîr ata an hrilh lo che u em ni? Leilung innghah dân hi in hre lo maw?

²²Ani hi zawng kâwlkil hual chung daihah a awm a, A chhûnga awmte chu a tân khauphâr ang lek an ni. Puanzâr angin vân khi a zâr pharh a, Awmna tûr puanin an zâr ang hian.

²³Lal ropuite a titlâwm a, Leia rorêltute engmahlovah a chantîr a,

²⁴Thing phun lo chawr ṭan tîr, Thlai ṭiak zung thlâk ṭan chauh ang hi an ni. Thliin a rawn chhêm a, a vuai ta a, Thlipui a lo thawk a, Buhpâwl angin a la bo ṭhîn.

²⁵Tichuan, tu nên hian nge min tehkhin ang a, Tu ang lek nge ka nih? Mi Thianghliman a ti.

²⁶Vân lamah khian in mit lên chho ula, In hmuhte khi tu siam nge ni? Sipai rual ang maia hruai chhuak ṭhîntu, An hming chhiara ko ṭheuh theitu siam vek a ni; Thil a ti thei êm a, pakhat tê mah an bo ngai lo.

²⁷Israel thlahte u, engtizia nge ‘LALPAN kan awm dân hi a hmu lo va, Kan Pathian hian min ngaihthah ta,’ in tih?

²⁸In hre na nge? LALPA chauh hi chatuan Pathian chu a ni a, Kâwlkil hual chhûnga awm zawng zawng hi Ama siam vek a ni. A chau lo va, a hah ngai bawk hek lo. A finzia pawh tu mah hre phâk an awm loh hi, In hre ngai lo vem ni?

²⁹Hahte a tichak a, Chaute a tichak thar leh ṭhîn.

³⁰Tleirâwlte pawh dangchârin an chau va, Tlangvâlte pawh hahin an thal dêr ṭhîn.

³¹ LALPA nghâktute erawh chu An chak thar leh ang a, Mupui angin thlain an thlâwk chho vang, An tlân ang a, an chau lo vang, An kal ang a, an hah hek lo vang.