Read Mizo Lushai Isaia 41 Bible Online

Isaia 41 - Mizo Lushai bible

Isaia 41

¹Thliarkârte u, lo ngaithla rawh u. In mite chu inpeih rawh se; Lo kal ula, sawi ve rawh u, I lo rêl tlâng teh ang.

²A kalna lam apianga chak zêl, Khawchhak ata ko chhuaktu hi tu nge? Lalte, hnamte a hneh zêl a, Khandaihin vaivutah a chantîr a, Thliin buhsî a lên darh ṭhîn ang hian a thal hmangin a ûm darh zêl.

³A ûm zêl a, hliam tuar ve hauh lovin a tlang zêl a, Lei rap hman lo hialin a chak.

⁴Hêng hi tu nge a tîr ata rêla, Ṭhang lo thar zêl chunga thlentîrtu hi? Kei LALPA hi, a bul tumtu ka ni, A tâwpna tûr pawh keimah bawk ka ni.

⁵Thliarkârte chuan ka thil tih an hmuhin an hlau vang, Kâwlkila awmte chu hlauvin an khûr bawk ang. An pung khâwm a, an lo kal e.

⁶Mahni ṭhian hnaite chu an fuih ṭheuh va, Mahni unaute pawh, ‘Hlau suh,’ an ti.

⁷Thil chher mi chuan rangkachak chhûng mi chu a tiphûr a, An milem siam dêng mâmtu chuan, ‘A bet ṭha e,’ tiin a dêngtu chu a fuih bawk a. A nghîn loh nân thîrkilhnain an kilh tlat mai.

⁸Aw Israel, nang zawng ka chhiahhlawh i ni a, Aw Jakob, ka thlan i ni, Ka ṭhian Abrahama hrin i ni.

⁹Kâwlkil ata ka lâk chhuah i ni a, A kil hla ber ata ka koh chhuah i ni e. ‘Ka chhiahhlawh i ni e,’ ka tih che kha, Ka thlang che a, ka hnâwl hauh lo vang che.

¹⁰Hlau suh, ka awmpui zêl a che, Thlaphâng hek suh, i Pathian chu ka ni, Chakna ka pe ang che a, ka pui ang che, Ka bân ding lam tha chak tak hian ka chelh ang che.

¹¹I chunga thinurte zakin an mualpho vang. Nangmah khingtute pawh eng mah an ni lo vang. An boral vek dâwn a ni.

¹²Nangmah beitute chu zawng chiam mah la i hmu zo lo vang, Nangmah dotute chu an ral vek dâwn a ni.

¹³ LALPA i Pathian hian ka chelh tlat che, ‘Hlau suh, ka pui ang che,’ Keimah ngeiin ka tih tawh kha.

¹⁴Israel mi, aw Jakob, changpât ang lek i ni na a, ‘Hlau suh, ka pui ang che,’ LALPA thuchhuak chuan a ti. Israel Mi Thianghlima, tlantu che chu ka ni.

¹⁵Ngai teh, buh chîl khâwl thar ha hriam tak nei ṭeuhvah Ka chantîr dâwn a che. Tlângte i chîl ang a, a sawm vek ang, Mualte pawh vaivutah a chang bawk ang;

¹⁶I zâp ang a, a lêng darh chum chum ang, Ṭhâwngaleivirin a lên bo vang. LALPA-ah chuan nang chu i lâwm ang a, Israel Mi Thianghlima chu i chawimawi ang.

¹⁷Retheite leh pachhiaten tui in tûr an zawna, An hmuh loh pawhin an tuihâl dangro chu Kei LALPA hian ka chhâng ang a, Israel-te Pathian hian ka thlahthlam lo vang.

¹⁸Mual kawlhahte lui ka luantîr ang a, Ruamah te chuan tuihna ka awmtîr ang. Thlalêr ram chu dîlah ka siam ang a, Ram ro pawh chu tui luannaah.

¹⁹Thlalêrah chuan sidar thing te, Thingri leh lenhmui, oliv thing nên ka phun ang a, Ram rovah chuan fâr te, phân te, tufâr te ka phun bawk ang.

²⁰Chûng chu miten an hmu ang a, Kei LALPA hian ka tih a ni tih an hria ang, LALPA, Israel Mi Thianghlima kutchhuak A nih an hre vek ang.

²¹Nangni, hnam tinrêng pathiante u, Thiamthu sawi tûr in neih chu han sawi teh u, LALPA, Israel-te lal chuan a ti.

²²Han sawi ula, thil lo thleng tûr min hrilh rawh u, A lo thlen tûr kan lo hre lâwk dâwn nia. Thil kal tawh pawh engtihna nge sawi fiah ula, Kan lo ngaihtuah dâwn nia.

²³Thil lo thleng tûr sawi lâwk ula, Pathian in ni emaw kan hre dâwn nia; Thil tih chhiat emaw, tih ṭhat emaw tal nei teh u. Kan hlau vang a, kan ṭih bawk ang che u.

²⁴Eng mah in lo nih loh hi le, Eng mah tih theih in nei hek lo, Nangni chibai bûktute chu tenawm an ni.

²⁵Khawchhak ata mi ka pun a, Ka hming a lam ang a, Hmâr lam ram aṭangin a lo kal dâwn. Bêl vawtuin a hlum a rap hrep ang mai hian Rorêltute chirhdiak angin a rap nek ang.

²⁶Hêng thil lo thlengte hi “I tidik e,” kan tih tûrin Tu ber hian nge hrilh lâwk che u? Tu man in sawi lo va, tu mah in hrilh lo va, Tu man in thu an hre hek lo.

²⁷Zion mite hrilh hmasa bertu chu ka ni, “En teh, in mite lo haw saw,” tiin Thu lâwmawm chu Jerusalem hrilhtu ka ni.

²⁸Milemte chu ka han en vêl a, Thurâwn min pe thei rêng ka hmu zo lo, Ka zawhna pawh an chhâng thei lo.

²⁹An zavaiin hman tlâk rêng an awm lo, Eng mah tih theih an nei lo va, An milem chhûnte hi engmahlo mai an lo ni e.