Read Mizo Lushai Isaia 42 Bible Online

Isaia 42 - Mizo Lushai bible

Isaia 42

¹En teh, ka chhiahhlawh, ka chelh tlat, Ka duhzâwng tak, ka thlan hi; a chungah ka thlarau ka leih ta a, Hnam tinrêng chungah dik takin ro a rêl ang.

²A au chhuak lo vang a, A râwl a rin hek lo vang a, Kawtthlêrahte a aw an hre hek lo vang.

³Luang sâwp a tichhum dâwn lo va, Khâwnvâr de sêt sêt pawh a timit mai lo vang, Dik takin ro a rêl ang.

⁴Khawvêlah hian rorêlna dik a awm hma chu A chau lo vang a, a beidawng hek lo vang. Thliarkârte chuan a thu an ngaichâng reng a ni.

⁵Pathian, vân siamtu leh kaipharh duaitu, Lei leh a chhûnga awm dintu, Nunna thaw leh thlarau petu, LALPA chuan heti hian a ti:

⁶“Kei hi LALPA chu ka ni, Dik taka rêl tûrin ka ko chhuak che, I bân tha tichakin ka hum che a, Nangmah hmangin mi tin tân thu ka thlung ta e, Hnam tin êng atân ka dah ta che.

⁷Mitdelte mit tivâr tûr te, Rip chhûnga khung tichhuak tûr leh Thim zînga tâng chhan chhuak tûrin.

⁸Kei hi LALPA, i Pathian chu ka ni, Tu mân ka ropuina min ṭâwm thei lo, Min fakna pawh milem ṭâwmpui ka phal hek lo.

⁹Ngai teh, thu hrilh lâwkte chu a lo thleng tawh a, Thu thar ka puang dâwn e, A lo thlen hma ngeiin ka hrilh che hi.

¹⁰ LALPA fakin hla thar ngei sa ula, Khawvêl pum pui hian fak rawh se; Tuifinriata kalte leh a chhûnga awm te, Thliarkârte leh a chhûnga awmte chuan fak vek rawh se.

¹¹Thlalêr ram leh a chhûnga khaw awmten fak sela, Kedar-ho chênna khuate chuan amah chu fak rawh se. Sela khuaa awmten fak selangin, Tlângchhîpa lâwn chhovin au vak rawh se.

¹²Thliarkâra chêngte chuan LALPA chu fak sela, chawimawi rawh se.

¹³Indo tûra mi huaisen thinthawk angin LALPA chu a lo thawk e, A han au va, a râwl a chhuah ta a, A hmêlmate lakah a chakzia chu a tilang ta.

¹⁴Rei tak chhûng chu chechâng lovin Ka mite hi ka ngawihsan veng veng a, Tûnah nau vei angin ka rûm ta a, Ka thin a tâwt a ni.

¹⁵Tlâng leh mualte ka tichhia ang a, Hnimte ka tiro vang. Luipuite chu ka tikang vek ang a, Dîlte pawh ka tiro vang.

¹⁶Mitdelte chu an hriat ngai loh kawngah ka hruai ang a, An kal ngai lohnaah ka kalpui ang. Thim chu ka tihênsak ang a, Kawng bumboh pawh ka tihrualsak bawk ang. Chûng chu ka thil tih tûrte chu a ni, Ka ṭhulh lo vang.

¹⁷Milem ringa, “Kan pathian chu i lo ni e,” titute chu An tlâwm ang a, an mualpho vang.

¹⁸Bengngawngte u, ngaithla teh u, Mitdelte u, lo hawi ula, en teh mah u,

¹⁹Ka chhiahhlawh anga mitdel hi tu nge awma, Ka mi tirh anga bengchhêt hi tu nge awm le? LALPA chhiahhlawh leh a mi ruat anga Mitdel tu nge awm ang?

²⁰Thil tam tak a hmu a; Mahse, a zâwm si lo. Beng a chhi a; mahse, a hre thei lo.

²¹ LALPAN a dikzia tihlan nân A Dân chawimawia tihropui a duh a ni.

²²Mahse, a mite chuan suam leh rawk an tâwk a, Huma tlain ripah an tâng zo ta. Man an ni a, chhantu an awm si lo. “Chhuah rawh u,” ti tûr an awm hek lo.

²³In zînga tuin nge hei hi hre duh? Ngun taka ngaithla tawh tûr tu nge awm le?

²⁴Jakoba chu tu nge suamhmang hnêna pea, Israela chu tu nge rawkhmang hnênah pe le? LALPA a ni lâwm ni? A chungah chuan thil sual an ti a, A kawng an zawh lo va, A Dânte chu an pawisa duh hek lo.

²⁵A thinur chu an chungah a leih bua a, Indona râpthlâk tak an tuar tâk hi. Israel chungah a thinur chu a alh ta a, An kâng na a, an hre lo va, An pawisa duh chuang lo.