Read Mizo Lushai Isaia 43 Bible Online

Isaia 43 - Mizo Lushai bible

Isaia 43

¹Tûnah hi zawng, LALPAN heti hian a ti: “Jakob, ka siam che a, Israel, ka din i ni, Hlau suh, i tlantu ka nih hi, I hming lamin ka ko che a, ka ta i ni.

²Tui thûk i dai laiin ka awmpui zêl ang che, Tui lian pawhin a chîm pil lo vang che, Meiah kal tlang mah la, i kâng lo vang, Meialhte chuan a hliau na lo vang che.

³Kei hi LALPA, i Pathian, Israel Mi Thianghlima, Nangmah chhandamtu chu ka ni, Nangmah tlan nân Aigupta chu ka pe a, Nangmah thleng nân Ethiopia leh Seba ka pe.

⁴Ka ngaihlu êm êm che a, Ka ngaisângin ka hmangaih che. Nangmah avângin mi dang ka thlauhthla a, Mi tam tak chu ka hnâwl a ni.

⁵Hlau suh, ka awmpui che, Khawchhak ata i thlahte chu ka rawn hruai ang a, Khawthlang ata ka khâwm bawk ang.

⁶Chhuah vek tûrin hmâr lam ka hrilh ang a, Hrêng lo tûrin chhim lam ka hrilh bawk ang, Ka fapate ram hla tak aṭangin han hruai ula, Ka fanute kâwlkil ata han hâwn rawh u.

⁷An zavaiin ka hming putu an ni, Ka ropui lan theih nân ka siam an ni, Ka kut ngeia ka din an ni.

⁸Mit nei si-a mitdelte leh, Beng nei si-a bengngawngte chu han khâwm rawh u.

⁹Hnam tinrêng pung khâwm sela, Chi tinrêng lo kal rawh se. An zîngah hei hi tu nge sawia, Tûn hmaa lo sawi lâwk tawh? An sawi dik emaw thuhretu han hruai sela, Mite hriatah, ‘A dik,’ han ti rawh se.

¹⁰Ka thuhretu i ni, LALPA thuchhuak chuan a ti. Ka chhiahhlawh, ka thlan i ni, Min hre tûr leh min ring tûrin, Kei hi Pathian awm chhun ka ni tih hretu atân. Ka awm hmaa awm Pathian an awm lo va, Ka hnuah lah an awm hek lo vang.

¹¹Kei chauh hi LALPA chu ka ni, Chhandamtu dang tu mah an awm lo.

¹²Thil lo awm tûr ka hrilh lâwk a, Chhandamtu chu kei hi ka ni, Kei chauh hian ka hrilh che u kha, Hêng hi hnam dang pathiante chuan an ti thei lo. Ka thuhretu i ni, LALPA thuchhuak chuan a ti: Kei chauh hi Pathian chu ka ni.

¹³Leilung pian hma ata tawh Pathian ka ni, Ka kuta mi tu man min lâksak thei lo va, Ka tih tawh chu sût thei rêng an awm lo.

¹⁴Nangmah tlantu, Israel Mi Thianghlima, LALPA chuan heti hian a ti: “Nangmahni avângin Babulon bei tûr ka tîr ang a, An kulh kalhnate chu ka chhu chhe vek ang a, Kaldai-ho chu an ṭap tlawk tlawk bawk ang.

¹⁵Kei hi, Mi Thianghlima, LALPA ka ni, Israel-te siamtu, in lal ka ni.

¹⁶Tuipui kân nân kawng ka siam a, Tuifâwn bulh bulh laiah kalna ka siam.

¹⁷Sakawr leh tawlailîr ka hruai khâwm a, Sipai rual lian tak ka koh khâwm kha. An thal dêr a, tho leh tûr an awm lo, Khâwnvâr hmeh mih angin an chimit ta.

¹⁸Hmânlai thilah innghat suh u, Tûn hma thil kha ngaihtuah suh u;

¹⁹Thil thar ka tih tûr hi thlîr zâwk rawh u, A lo thleng ṭêp tawh e, in hmu lâwm ni? Thlalêrah kawng ka sial ang a, Ram rovah chuan luipui ka luantîr ang.

²⁰Ramsate chuan min chawimawi ang a, Sihalte leh Ostrich-te chuan min fak bawk ang. Ka mi tlante in tûr thlalêrah tui ka tlintîr a, Ram rova lui ka luantîr hunah chuan.

²¹Ka ta tûra ka siam an ni, Min la fak dâwn a ni.

²²Jakob, nang erawh chuan min au lo va, Aw Israel, min ning ta a.

²³Hâl ral atân berâm min rawn lâk ngai lo va, Inthawinain min chawimawi duh hek lo. In hnên ata thilhlan ka phût lo va, Rimtui hâl tûr pawhin ka tihah lo che u.

²⁴Ai rimtui te min leisak ngai lo va, Inthawina ran thauvin min titlai ngai hek lo. In sualnain min ngei zâwk a, In bawhchhiatna ka kham ngei mai.

²⁵Kei hi ka ni in sual ngaidamtu chu, Keimah avângin a ni ka ngaihdam ṭhin che u-a, In sualte chu ka hriat reng ṭhin loh ni.

²⁶Min khing tûrin lo kal ula, In thiamthute han sawi rawh u.

²⁷In pa hmasa berin thil sual a ti a, In hruaitute ka lakah hian an hel.

²⁸Tichuan, ka Hmun Thianghlima hotute tibawrhbângin Jakoba chu ka hluihlâwn ang a, Israela chu mi hmuhsitah ka siam bawk ang.