Read Mizo Lushai Isaia 44 Bible Online

Isaia 44 - Mizo Lushai bible

Isaia 44

¹Khai le, nang ka chhiahhlawh Jakob, Ka mi thlan Israel, ngaithla rawh le.

² LALPA chuan heti hian a ti: Siamtu che ka ni a, Pum chhûnga dintu che ka ni, Ka chhiahhlawh Jakob, ka pui ṭhîn che, Ka mi thlan ngei, Jesurun, hlau suh.

³Ram rovah tui ka leih ang a, Ram chârah lui ka luantîr ang. I thlahte chungah chuan Thlarau ka leih ang a, I tu leh fate chu mal ka sâwm ang.

⁴Tui tamnaa hnimhring a duah ang leh, Tui luang kama tuipuisuthlah ang hian.

⁵‘LALPA ta ngei ka ni,’ miten an rawn ti thliah thliah ang, Jakoba hming an rawn ṭâwm ang a, A ṭhente chuan an bânah, ‘LALPA ta,’ tih an ziak ang a, Ṭhenkhatte chuan Israela hming an pu bawk ang.

⁶Engkim LALPA, Israel lal, anmahni tlantu, LALPA chuan heti hian a ti: ‘Kei hi a bul leh a tâwp ka ni, Keimah lo hi Pathian dang an awm lo.

⁷Keimah ang hi tu nge awm le? Han sawi sela, rawn târlang chiang rawh se. Hmânlai mite ka din an ni asin, Thil lo thleng tûr te leh Thil lo awm tûrte chu han puang teh se.

⁸Hlau hauh suh la, thlabâr hek suh, Hmân aṭanga ka sawi lâwk kha in hre lâwm ni? Ka thuhretu in ni, Keimah lo hi Pathian dang an awm em? Ka hriat ve loh pathian ropui an awm em ni?”

⁹Milem siamtute hi eng mah an ni hlawm lo, an thil siam, an hlut êm êmte lah a ṭangkai hek lo. Hêng betute hian eng mah an hre fiah thei lo va, an hre thei hek lo, an la zak ang.

¹⁰Pathian lem siama, milem chhûng ṭhînte hian ṭangkaipui loh an inring ngai em ni?

¹¹Chûng betu zawng zawng chu an la mualpho vek ang. Mi themthiamte hi mihring mai bawk an ni si a, lo kal khâwm sela, ka hmaah lo ding teh se, an khûr ang a, an mualpho hle ang.

¹²Thîrdêngin meilinga rawhin hriam a chher a, tubohvin a dêng a, theihtâwpin a ṭang a. A rilte a ṭâm a, a lo hah a, tuihâlin a chau hle ṭhîn.

¹³Mistiri-in thing chu a han teh a, a rîn kual a, hriamin a riruang chu a han duang a, mihring lemah a chhuah ta a. A in chhûnga dah atân mihring lem mawi tak a siam ta a.

¹⁴Ngâw aṭangin sidar thing emaw, fâr thing emaw, sasua emaw a va kit a; a nih loh leh ruah châwm len sidar thing phun chu a kit a.

¹⁵A ṭhen chu thingah a tuah a, a lum a ai a. A lingin chhang a ur a, a ṭhen erawh chu milem siam nân a hmang a, chibai a bûk ta a.

¹⁶A ṭhen chu thingah a hmang a, sa a rawh a, a ei puar a, mei lum chu a ai a, “A lum hle e, a alh duh hle mai,” a ti a.

¹⁷Thing bung dang chuan milem a siam a, a kûn a, chibai a bûk ta a. A hnênah a ṭawngṭai a, “Ka pathian i ni e, min chhandam rawh,” a ti a.

¹⁸Chutiang mi chu an mâwl lutuk e, eng mah an hre lo a ni. Hmuh hlauvin an maimitchhîng a, hriat hlauvin an rilru an hawng duh lo.

¹⁹“A ṭhen chu thingtuahah ka hmang a, chhang ka ur a, sa ka rawh a, ka ei a; a ṭhen chuan milem ka siam a, thingtum hmaa kûnin chibai ka lo bûk a nih hi,” tih nachâng hria rêng an awm lo va, hmu thiam an awm hek lo.

²⁰Vaivut ei ang chauhva sâwt lo va ni. A ngaih dân â tak chuan a hruai bo va, chhan chhuah rual a ni tawh lo, “Ka milem ken hi eng mah a lo ni lo,” tih nachâng rêng a hre thei lo.

²¹Jakob, hêng hi hre reng ang che, Israel, nang hi zawng ka chhiahhlawh i nih hi, Ka chhiahhlawhah ka siam che a, Aw Israel, ka theihnghilh ngai lo vang che.

²²Thli len bo chhûm angin i bawhchhiatna ka lên bo va, Ṭiauchhûm a ral angin i sualnate a ral ta e. Ka hnênah lo kîr rawh, i tlantu chu ka ni.

²³Vânte u, lâwmin zai rawh u, LALPAN a hna a thawh tâk hi, Lei hnuaite u, au chhuak rawh u, Tlângte u, au hluah hluah ula, Ngaw leh a thing zawng zawngte u, au dur dur bawk rawh u. Jakoba chu LALPAN a tlan chhuak a, Israel-te zîngah a inchawimawi ta e.

²⁴Pum chhûnga siamtu che, nangmah tlantu, LALPA chuan heti hian a ti: “Engkim siamtu, kei hi LALPA chu ka ni a, Mahni maia vân khi kai pharhtu chu ka ni, Lei hi ka siam lai khân tu nge tel ve?

²⁵Zâwlnei derte thu ka tihlawhchham ṭhîn a, Aienthiamte ka timualpho bawk ṭhîn. Mi fingte chu ka let thla a, An hriatna âtthlâkzia ka târlang ṭhîn.

²⁶Ka chhiahhlawhte thu ka nemnghet a, Ka tirhkohte remruat ka tipuitling zêl ṭhîn. ‘Jerusalem khua chu an luah leh ang a, Judai ram khuate pawh an din leh ang, a chhiate pawh ka siam ṭha ang,’ ka ti a ni.

²⁷Tuifinriat chu kang chat tûrin thu ka pe a, A tuite chu a kang ta a.

²⁸Kura hnênah chuan, ‘Ka berâmpu i ni, ka thiltum chu tihlawhtling rawh, Jerusalem sak ṭhattîr la, Tempul sak nân lung phûmtîr rawh,’ ka ti bawk a.”