Read Mizo Lushai Isaia 46 Bible Online

Isaia 46 - Mizo Lushai bible

Isaia 46

¹“Babulon biak lal pathian Bela leh Neboa chu an chau va, An tlâwm ta dêr mai. Sabengtungte an phurhtîr a, Ran chau tawh tân an rit kher mai.

²Milem tlâwm tate chuan, A zâwntute an chhan thei lo, Mahni ngei pawh an inchhan thei lo va, Salah an hruai ta e.

³Jakoba leh Israel chhûng la dam zawng zawngte u, Ka thu hi ngaithla rawh u, In pian aṭang tawh khân ka puak tlei in ni a,

⁴Tarkûn lu ṭuak in nih thlengin Kei hi ka ni, khai ding ṭhîntu che u, Ka siam in ni, ka vêng zêl ang che u, Chawiliantu che u ka ni, Ka hum dâwn a che u.

⁵Tu nên nge min khaikhin ang a, Tu nên nge min tehkhin ang?

⁶An ip ata rangkachakte an bun chhuak hawk hawk a, Tangkaruate an bûk chhuak a, Themthiam rualin pathian lem an siam a, Kûnin chibai an bûk ta e.

⁷An kokiah an han chhuang a, an pu ta a, An awmna tûrah chuan an va dah a, A din ngaiin a ding rêng mai. A che sawn thei lo va, An auh pawhin a chhâng thei lo, Mangang mah se a chhan thei bawk hek lo.

⁸Chûng chu hre rengin, Chhût ngun ula, Mi sualte u, ngaihtuah rawh u.

⁹Hmânlai ata thil awm dân kha hre ta che u, Kei hi Pathian awm chhun ka ni, mi dang an awm lo ve, Keimah chauh hi ka ni Pathian awm chhun.

¹⁰A tîr ata a tâwp dân tûr ka sawi lâwk a, Thil lo thleng tûr hmâsâng ata ka sawi ṭhin kha, ‘Ka remruat chu a nghet tlat ang, Ka duhzâwng chu ka ti ngei ang,’ tiin.

¹¹Khawchhak ata mupui ka han ko va, Ram hla tak aṭangin ka mi ruat chu ka pun a ni; A ni, ka sawi tawh a, a lo thleng ang, Ka tum tawh a, ka ti ngei ang.

¹²Thinlung luhlulte u, ka thu hi ngaithla rawh u, Hnehna ni chu a hla lo in ti.

¹³Ka hnehna ni a lo hnai ta, a hla lo ve. Rei lo tê-ah ka chhandam dâwn che u, Zion chu ka chhandam ang a, Israel chu ka tiropui bawk ang.”