Read Mizo Lushai Isaia 47 Bible Online

Isaia 47 - Mizo Lushai bible

Isaia 47

¹Aw nang nula, Babulon khaw fanu, lo chhuk thla la, Vaivutah hian ṭhu rawh. Lalṭhutthlêng ata kha, Kaldai fanu, leiah ṭhu rawh, ‘A no chik chek mang e,’ an ti leh tawh lo vang che.

²Buh herna khâwl vuan la, buh chu her rawh, I hmai khuhna hlîp la, I fênfual kha tichhîng deuh la, I mal hlîm la, lui kha dai kai rawh le.

³Saruakin i awm ang a, I zahmawh pawh a lang bawk ang. Phuba ka la dâwn a, tu mah ka zuah lo vang.

⁴Israel Mi Thianghlima chu min tlantu a ni a, A hming chu Engkim LALPA a ni.

⁵ LALPA chuan Kaldai-ho hnênah, “Nang Kaldai fanu, Ngawi rengin thim zîngah chuan ṭhu tlawk tlawk rawh, Hnam tin lalnu an vuah dâwn tawh lo che.

⁶Ka mite chungah hian ka thinur a, Ka mi thlante ka sawisa a, I kutah ka rawn dah a, I lo khawngaih si lo. Putarte pawh dim hlek lovin i chhawr zêl mai.

⁷Lalnu ni kumkhua tûra inngaiin thil lo thleng tûr i thlîr lo va, A tâwp dân tûr i hre hek lo.

⁸Nawmchen lâwmnu: lo ngaithla teh, Lungmuang takin i awm der der ṭhîn a, ‘Kei chauh lo chu tu dang nge awm,’ i ti vei a. ‘Hmeithai ka ni dâwn lo, Lû ka sûn hauh lo vang,’ i ti bawk nên.

⁹Thâwklehkhatah, ni khat thil thu maiah, Hêng thilte hi i tuar ngei dâwn. Dawi thiam hlein thil ti thei viau mah la, Lu i sûn ang a, i hmeithai ngei dâwn e.

¹⁰Ngaihngam takin thil sual i ti ṭhîn a, ‘Tu man min hmu lo vang,’ tiin i finna leh i hriatna chuan a hruai bo che, ‘Kei chauh lo chu tu dang nge awm?’ I ti rilru vei ṭhîn.

¹¹Dawia i dan zawh loh thil ṭha lovin a nang ang che, Thawi dam zawh loh vânduainate i chungah hian a lo thleng ang, I hriat lâwk loh chhiatna a lo thleng thut dâwn si.

¹²I dawi thiam te, i dawibûr te, I naupan lai ata i hman ṭhin kha bânsan duh suh, Tute emaw tihṭhaihin i hlâwkpui hlauh mahna.

¹³Thurâwntu che an tam vei nên, Eng mah i ti thei chuang si lo. Vân ṭhen thliaha, arsi thlîrtute leh thla tina thil sawi lâwktute chu Lo kal sela, chhan che rawh se.

¹⁴Meia kâng ral mai ṭhîn buhpâwl ang lek an ni, Meialh hluah hluah lakah an inchhan thei lo va, An tân a sa lutuk a ni, Meivâm ai tûr ang lek a ni si lo.

¹⁵I naupan lai ata i thawhpui leh i dâwr ṭhinte, Chutiang mai chu an lo ni si, An duh hunah an kalsan mai ang che, Tu man an chhan lo vang che,” a ti.