Read Mizo Lushai Isaia 49 Bible Online

Isaia 49 - Mizo Lushai bible

Isaia 49

¹Thliarkârte u, ka thu hi ngaithla rawh u, Hla taka awmte u, ngaihven rawh u. Chhûla ka awm lai khân LALPAN min ko va, Nu pum chhûnga ka awm lai khân ka hming a sa.

²Ka thu khandaih hriamah a chantîr a, A kut phênah min dah ṭha a, Thal zum takah min hmang ta a, A thal bâwmah min dah ṭha e.

³“Ka chhiahhlawh chu i ni, aw Israel, nangin min chawimawi ang,” min ti.

⁴Ka thawkrim thlâwn a ni, Thil lawilovah ka tha ka sêng zo va, Thawh chhuah eng mah ka nei si lo ka ti hial a; Mahse, ka chungthu hi LALPA rêl tûr a ni. Ka thil tih ang zêla min petu chu Pathian a ni.

⁵Ka pian hma khân LALPAN a chhiahhlawhah min ruat tawh a, Jakoba chu hruai kîr tûr leh Israel-te hruai khâwm tûrin LALPAN min chawimawi a, Ka Pathian chu ka chakna hnâr a ni.

⁶ LALPA chuan heti hian a ti: “Jakoba thlahte tungdinga, Israel la damte hruai kîr tûra Ka chhiahhlawh nih hi nêp tak a ni. Chu aia hna ropui zâwk tih tûr i nei, Khawvêl pum pui hi chhandam a nih theih nân Hnam tin tân êng i ni ngei bawk tûr a ni.”

⁷ LALPA Israel-te tlantu, Mi Thianghlima chuan heti hian a ti: “Nang, mi hmuhsit, hnam tin endawng, Rorêltute chhiahhlawh, Lalten bawih ata i chhuak an hmu ang a, Nangmah zahin an tho vang a, Miliante pawh i hmaah an kûn ang.” LALPAN a thu a hlen avângin Israel Mi Thianghliman a thlang a che.

⁸ LALPAN heti hian a ti: “A hun takah ka chhâng che a, A hun takah ka chhan chhuak che, Ka humhim che a, nangmah avângin Hnam dangte nên thu ka thlung a, In ram tungding leha, In ro chan ram ṭiau hnu in luah leh vek theih nân.

⁹Lung in tângte chu, ‘Chhuak rawh u’, ka ti ang a, Thim zînga awmte chu, ‘Engah lo chhuak rawh u,’ ka ti bawk ang. Berâm angin kalkawngahte an tla ang a, Mual kawlhahte hnimhring an hmu zêl ang.

¹⁰An ril ṭâmin an tui a hâl ngai lo vang a, Thli lum leh chhûn ni sa hrehawm an ti hek lo vang. An hruaitu chuan a lainat a, Tui tlan tûr awmnaah a hruai dâwn si.

¹¹Tlângahte chuan lamlian ka sial ang a, An kalna tûr kalkawng ka buatsaih ang.

¹²En teh, ka mi, hla taka lo kalte saw, Hmâr lam ata an lo kal a, Thlang lam ata an lo haw e. Sinim ram hla aṭangtein an lo kal saw.”

¹³Vânte u, hlim takin au ula, Leilung pawh hi lâwmin au bawk rawh se. Tlângte lâwmin au chhuak sela, LALPAN a mite chu a thlamuan a, Tihduhdah tuarte chu a lainat hi.

¹⁴Zion chuan, ‘Kan Lal PATHIAN-in min ngaihthah a, LALPAN min theihnghilh ta a ni,’ a ti hial a.

¹⁵ LALPAN heti hian a ti: “Nuin a fa hnute hne lai a theihnghilh thei em ni? A rîla rah a lainat lo thei dâwn em ni? Nuten an fate chu an theihnghilh mai thei e, Kei chuan ka theihnghilh tawp lo vang che u.

¹⁶Ngai teh, ka kutphahah i hming ka ziak tawh a, I kulh bangte ka vêng reng ṭhîn a ni.

¹⁷Tichimtu che ai chuan sak ṭhat duhtu che chu an hmanhmawh zâwk a ni. A tichhetute chuan an chhuahsan thuai ang che.

¹⁸Dâk la, i mit han lên vêl teh, I mite chu an inhâwr khâwm mêk zêl a ni, An lo kal dâwn ṭêp e, Pathian nung ka nih a chiang ang leh, Movin a incheina a chhuang ang hian, I mite chu i chhuang hle ang.

¹⁹In ramte chu a chhe vek a, a ram dêr kha, A luah tûrte an lo thlen chuan A zîm lutuk ngei dâwn, Tiramtu che an bo vek dâwn si a.

²⁰I tu i fa, saltâng lo hawte chuan, I beng hriatah, ‘Ram hi a zîm lua e, Chên nân ram zau zâwk kan mamawh ta e,’ an la ti ang.

²¹‘Hêng mite hi tu nge min hrinsak le? Ka fa hrinte ka sûn zo va, Sala tângin ka vâkvai a, Hênghote hi tu nge min tihseilensak ni? Keimah chauhvin min hnutchhiah kha, Hêng mite hi khawi lam mi nge?’ i la ti ang.”

²² LALPA Pathian chuan heti hian a ti: “Hnam tin hmuhah ka bân ka phar ang a, Ka hui ang a, i fate chu an rawn pawmsak ang che, I fanute pawh chu an rawn pua ang.

²³Lalte chu i pate an ni ang a, Lalnute chuan an awm ang che. Leia bawkkhupin chibai an bûk ang che a, I kea vaivut chu an liak bawk ang. Kei hi LALPA ka nih i hriat theih nân, Min nghâktute tu mah an mualpho lo vang.”

²⁴Mi huai râllâk i chhuhsak ngam em ni? Mi kawlhsenin a tântîr chu i chhuhsak ngam em ni?

²⁵ LALPA chuan heti hian a ti: “Mi huai râllâk chu ka chhuhsak ang a, Mi kawlhsen tântîr pawh ka chhuah bawk ang. Khingtu che chu ka khing ang a, I fate chu kei hian ka chhandam ang.

²⁶Tinawmnahtu che chu anmahni sa ka eitîr ang a, Uain rui ang maiin thisen an rui phung ang, Kei LALPA hi nangmah Chhandamtu leh Tlantu, Jakoba Mi Chaka ka nih hi, Mi tinrêngin an hre vek ang.”