Read Mizo Lushai Isaia 5 Bible Online

Isaia 5 - Mizo Lushai bible

Isaia 5

¹Ka duh tak tân hla ka han sa teh ang, A duat êm êm grep huan hla chu: “Ka duh tak chuan grep huan a nei ta a, Mualchêng, lei ṭha tak hmunah chuan.

²Thlûr a siam a, lung a chhar fai a, Grep ṭha ber chi a phun a, A laiah chuan vênbûk a sa a, Grep sâwr khur tûr a ker bawk a. A rah hlân a nghâkhlel êm êm a, A han rah chuan a suak a lo ni vek si a.

³Jerusalem leh Judai ram mite u, Ka grep huan nêna kan inkâr thu hi Han ngaihtuah ve teh u.

⁴Ka tih bâk hi ka grep huanah Eng nge ka tih leh chuan tawh ang? Grep ṭha ngei lawh tumin ka thlîr rêng a, A suak hlîrin a rah si hi.

⁵Engtin nge ka tih dâwn, ka sawisak dân tûr chu, Ka han hrilh ang che u, A pal ka sâm ang a, ka tiram ang, A lung palte ka tichhe vek ang a, Ramsate chuan an chîl thlu ang.

⁶Ka ma ang a, a ṭang ka sât no lo vang a, A hmun ka thlo fai hek lo vang. Hnimhlîngnei leh hlo harin a khat ang a, Chhûmte thu ka pe ang a, Ruah rêng ka sûrtîr tawh lo vang.”

⁷Engkim LALPA huan chu Israel chhûngte hi an ni a, Judai ram mite hi duat taka a phunte chu an ni. Dik takin ro an rêl a beisei a, Tual thah an chîng ta si, Thil dik an tih a beisei a, Mahse, manganga au a hmu ṭeuh si.

⁸Mi dang nêka, in zauh zêla, Huan zauh zêl chîngte u, in chung a pik e. Tu mah an leng ve lo vang a, Khawhar takin mahni chauhvin in la awm ang.

⁹Engkim LALPA chuan ka beng hriatah, “Hêng in lian pui pui leh mawi tak tak hi A ram ang a, luah tûr an awm lo vang.

¹⁰Grep huan ṭîn sâwm hmunah Ṭîn hnih vêl chauh sâwr tûr a rah ang a, Phur sâwm chînnaah Phur khat lek chauh a haw bawk ang,” a ti.

¹¹Zîng tak taka zu hrût ṭana, Zân rei tak tak thlenga rui hnêp ṭhînte chu An chung a pik e.

¹²Zu hmunah ṭingṭang leh perhkhuang nên, Dârbenchhek leh phênglâwng nên Zu nên an ri bûng bûng ṭhîn, LALPA thiltih chu an en ṭha duh lo va, A kut hnathawh pawh chu an hmu duh lo.

¹³Ka mite chuan an hriat duh loh avângin Salah an tâng ngei dâwn a ni. An miliante rilṭâmin an thi ang a, Mipui vântlângte pawh tuihâlin an thi ang.

¹⁴Mitthi khua chuan lo dawlh a châk hle a, A kâ a âng huau mai. Jerusalem chhuangtu milian leh mitê Hlim taka awm ṭhînte chu a dawlh zo ta.

¹⁵Mitê leh milian tihhniam an ni ang a, Mi chapote an tlâwm bawk ang.

¹⁶Dik taka ro a rêl avângin Engkim LALPA chu chawimawi a ni ang a, Thil dik taka tiin Pathian thianghlim chuan A thianghlimzia a lantîr ang.

¹⁷Tichuan, an tlatna phûlah berâm an tla angin, Hmun ramah chuan an tla ang a, Khaw rama hnimte chu kêlten an pet bawk ang.

¹⁸Sual laka inthiarfihlîm thei lo, Sual sim thei lote chu an chung a pik e,

¹⁹‘Lo hmanhmawh se, kan hmuh atân, Han ti thuai thuai ang hmiang, Israel-ho Mi Thianghlima chuan a thiltum chu, Kan hriat theih nân han tithleng thuai rawh se,’ titute chu.

²⁰Thil sual thil ṭha tia, thil ṭha thil sual tia, êng chu thima ngaia, Thim chu ênga ngai bawka, Thil thlum chu thil kha tia, Thil kha chu thil thlum titute chu,

²¹Mahni ngaiha fing intia, Fel inti hlete chu an chung a pik e.

²²Zu ina pasalṭha, Zu chawhpawlha huaisente chu: An chung a pik e.

²³Thamna lain mi sual thiam chantîr an chîng a, Mi ṭhate chu thiam loh an chantîr ṭhîn.

²⁴Hemi avâng hian, meialhin buhpâwl a kâng ral ang leh Hnim ro a kâng ral ang mai hian An zungzâm a ṭawih ral ang a, An vânglaiin an boral ang; Engkim LALPA Dân chu an hnâwl a, Israel-ho Mi Thianghlima chu an hmuhsit avângin.

²⁵Chuvâng chuan a ni, LALPA thinurna chu Mite chunga a lo thlen ni, A kut lekin a vuak tâk hi. Tichuan, tlângte chu a nghîng a, Mitthi ruang chu hnâwmhnawk angin Khawlaiahte a let rem rum, Chuti pawh chuan a thinur a la reh lo va, A kut a la thlâk ta cheu va.

²⁶ LALPAN ram hla taka awmte tân chhinchhiahna a târ chhuak ta, Kâwlkila mi hamrîkin a ko va, Hmanhmawh takin an lo kal saw.

²⁷Hah rêng an hre lo va, an inchhuih bawk hek lo, Muthlu an awm lo va, an mut a chhuak hek lo, Kâwnghrên phelh dul tu mah an awm lo va, Pheikhawk hrui chat an awm hek lo.

²⁸An thalte chu a zum êm êm a, An thalngul chu kawih sa-in an keng; An sakawr tinte chu meilung hriam ang a ni a, An tawlailîr kete chu ṭhâwngaleivir angin a vir vut vut.

²⁹An au thâwm chu sakeibaknei hâhum ang hi a ni, Sakeibaknei vânglai angin an au hum hum a, An sa seh chu rûm ngul ngul chungin an pu bo va, Tu man an chhuh thei lo.

³⁰Chumi ni chu a lo thlen chuan, Tuifinriat thâwm anga nasain Israel ram chhûngah an rawn ri hum hum ang. Ram han thlîr chuan thimna leh mangannain a khat a, Êng chu thimin a hliah zo ta.