Read Mizo Lushai Isaia 50 Bible Online

Isaia 50 - Mizo Lushai bible

Isaia 50

¹ LALPA chuan heti hian a ti: “In nu Israel chu, ka tirh bo khân, Mâkna lehkha ka pe em ni? Leiba aia an fate hralh angin Tu hnênah nge ka hralh che u? In sual vângin a ni hralh in niha, In bawhchhiatna avângin a ni, in nu ka tirh bo ni.

²Ka lo kal khân tu man mi ûksak lo, Ka koh lai khân tu man mi chhâng hek lo; Chhan chhuak tûrin ka bân a tawi lutuk ta em ni? Chhan chhuak tûrin ka chak tâwk ta lo vem ni? Ka han hau hlek a, tuipui chu a kang mai a, Luipuite lah thlalêr rovah ka chantîr a, Tui awm loh avângin sanghate an thi a, An ṭawih zo ta.

³Vânte pawh khi ka tithim a, Lusûn puan dum sin ang mai a lo ni.”

⁴ LALPA, ka Pathian chuan Thu sawi thiamna min pe a ni, Mi chaute chu thu-a fuih harh dân tûr ka hriat theih nân tûk tin mi tiharh a, A tûk a têlin mi zirtîrna ka hrethiam telh telh a ni.

⁵ LALPA, ka Pathian chuan ka beng min hawnsak a, Kei ngei pawhin luhlul ka chhuah lohva, Ka hawi lêtsan loh nân.

⁶Vuak atân ka hnungzâng ka dawh a, Ka hmuihmulte an pawhin ka dawh reng a, chil te min chhâk a; Mahse, zakin ka hmai ka hup ngai lo.

⁷ LALPA, ka Pathian chuan min pui ṭhîn a, Chuvâng tak chuan ka mualpho lo va ni; Ka intipachang lui a, zahna tûr rêng ka nei lo vang.

⁸Mi ṭantu chu a lo hnai e, Tu nge mi khing ngam ang? Thiam thu sawiin i han ding tlâng teh ang, Min khingtu chu lo hnai teh se.

⁹ LALPA, ka Pathian hi min ṭantu chu a ni, Tu nge thiam loh min chantîr ang? Puan angin an hlui ang a, Thîmin a ei zo vang.

¹⁰Nangni zînga LALPA ṭih ṭhîn, A chhiahhlawh, a thu pawisa ṭhîntute u, Êng nei lovin thimah kal mah ula, LALPA hming chu ring mai ula, Pathianah chuan innghat rawh u.

¹¹Mahse, mahni meichher chhi-a, Thal alh thei paite u, In thal alh êngah chuan kal teh rêng u, LALPA kut in tuar tûr chu, Hrehawm râpthlâk tak a ni.