Read Mizo Lushai Isaia 51 Bible Online

Isaia 51 - Mizo Lushai bible

Isaia 51

¹ LALPA chuan heti hian a ti: “Chhan chhuah duha LALPA zawngtute u, Ka thu hi ngaithla rawh u. In pian chhuahna lungpui hi en ula, In lo chhuahna lung khur hi en teh u.

²Abrahama, in thlahtu kha ngaihtuah ula, Sari, in hringtu kha hre reng rawh u. Ka koh lai khân fa rêng an nei lo va, Mal ka sâwm a, an pung ta chiam a nih kha.”

³ LALPAN Zion khua chu a khawngaih a, A khaw chim chhûnga chêngte chu a thlamuan a; A ram, thlalêra chang te pawh, Eden angin a siam ang a, A ram ṭiau chu LALPAN huanah a siam dâwn e. Tah chuan hlimna leh lâwmna a awm ang a, Lâwmthu sawiin fak hla an sa bawk ang.

⁴“Ka mite u, ka thu hi ngaithla ula, Ka hnamte hian an beng lo chhi rawh se, Dân thu chu ka hnên ata a lo chhuak; Ka mite êng atân rorêlna dik ka siamsak bawk.

⁵Ka hneh hun chu a hnai ta a, Ka chhan chhuah hun a lo thleng dâwn, Keimah ngeiin ka mite chungah ro ka rêl ang a, Thliarkârte chuan min thlîr ang a, Ka kut an nghâk bawk ang.

⁶Vân lamah te in mit lên chho u la, Hnuai lama lei hi en rawh u, Vân khi meikhu angin a zâm ral ang, Puan ang maiin lei pawh hi a la hlui ang a, A chhûnga chêngte pawh tho ang maiin An thi pheng phung bawk ang. Ka chhandamna erawh hi zawng kumkhua atân a ni a, Ka hnehna pawh a tâwp ngai lo vang.

⁷Thu dik hretu, ka Dân thinlunga paite u, Ka thu hi ngaithla rawh u. Mihring deuna hlau suh ula, An diriamna pawh manganpui hek suh u.

⁸Thîmin puante a ei chhia a, Sûlrûl pawhin sahmul puante a ei ral ṭhîn ang hian, Chûngho pawh chu an la ral ang; Ka hnehna erawh chu kumkhua atân a ni a, Ka chhandamna pawh chu chhuan zawng zawng tân a ni.”

⁹ LALPA, harh la, harh la, tho teh, Hmânlai mite hnênah i chakzia chu i lantîr a, Han lantîr leh teh le. Nang hi i ni lâwm ni, Rahab sât sawma, tuipui Dragon chhun hlumtu kha?

¹⁰Tuipui tikanga, i mi thlante kal kaina tûr Tuifinriat mawnga kawng siamtu kha i ni lâwm ni?

¹¹ LALPA, i tlante chu an lo hâwng ang, Zion tlâng chu zaiin an lo thleng ang, Chatuan lâwmna an khum ang a, Hlim leh lâwmin an khat ang a, Lungngaih thlaphân a awm tawh lo vang.

¹² LALPA chuan heti hian a ti: “Kei hi ka ni thlamuanna rawn thlentu, Thi thei mihring, hlobet ang leh hring fate hi, Engtizia nge in hlauh mai le?

¹³Vân kai pharha, lei nghahchhan phûmtu, In siamtu LALPA hi in theihnghilh ta em ni? Tiduhdaha tihchhiat tumtu che u thinur hlau rêng rênga in awm mai le? Thinur mah se in tuar lo vang.

¹⁴Kun tlawk tlawk tawhte chu an ding char leh thuai ang, Saltâng retheite chu an chhuak thuai ang a, An tânna khur chhûngah chuan an thi lo vang a, Ei tûr an tlachham hek lo vang.

¹⁵Kei hi LALPA, in Pathian chu ka ni, Tuifinriatte ka chawk let a, Tuifâwnte chu a ri hum hum ṭhîn, Ka hming chu Engkim LALPA a ni.

¹⁶Vân khi ka kai pharh a, lei innghahna ka phûm bawk a, Zion mite hnênah, ‘Ka mite in ni e, In hmuiah chuan ka thu ka dah ta a, Ka kut phênah ka dah ṭha ta che u,’ ka tih kha.

¹⁷Harh teh, harh teh, Jerusalem, tho teh, LALPA thinurna uain chu i in ta a, Pai pai khawpa ruiin i in tâk hi,

¹⁸Hruai tûr chein i fa tu mah an awm lo va, Kai tûr chein i mite zînga mi tu mah an awm hek lo.

¹⁹Chhiatna thuah hnih i tuar tâk hi, Tu nge ṭah ta ang che? I ramte chu tihchhiat a ni, a ṭiau zo ta; I mite chuan ṭâm an tâwk a, khandaih an tuar tâk hi, Engtin nge, ka thlamuan tâk ang che?

²⁰I fate chu kawtthlêr pêngṭhuam tinah chauvin an tlu phung mai. Lêna sathâr man ang maiin LALPA thinur an tuar ta e, An pathianin a hau a ni.

²¹Nangni tihduhdah tuar, zu in si lo, ruia pai paite u, Hei hi lo ngaithla rawh u:

²² LALPA Pathian, a mite ṭan thîntu, in Pathian chuan Heti hian a ti: “Rui pai khawpa in tlâk ṭhak no, LALPA thinurna uain no chu, Ka intîr leh ngai tawh lo vang che u. Ka la bo daih ang a,

²³Nangmahni tiduhdaha, kawtthlêrah te, ‘Ka rahchhanah bawk rawh u,’ tia, I hnungzâng zawha, vei vêl ṭhînte hnênah ka pe thung ang.”