Read Mizo Lushai Isaia 52 Bible Online

Isaia 52 - Mizo Lushai bible

Isaia 52

¹Tho teh, tho teh, aw Jerusalem, Han insangmar rawh le, khawpui thianghlim Jerusalem, Ropui takin han inchei teh, Serh tan loh leh mi bawlhhlawhte An lo lût tawh dâwn lo.

²Aw Jerusalem, vaivut ata thovin inbêngfai la, Lalṭhutthlêngah ṭhu rawh. Zion khawpui fanau saltângte u, In nghâwng ata kawl kha hlîp rawh u.

³ LALPA chuan heti hian a ti: “Man têl lova bawiha hralh in ni a, tangka sum pe lova tlan in ni ang.”

⁴LALPA Pathian chuan heti hian a ti: “Hmânah ka mite chu anmahni thuin Aigupta ramah an pêm a. Asuria-hovin engkhaw lawilovah an rawn rap bet leh a.

⁵Tûnah eng nge ka tih tâk ang?” LALPA thuchhuak chuan a ti. “Ka mite chu Babulon-ah man pe lovin bawihah an hruai a, an chunga rorêltute chuan an vîn tuar tuar a,” tih hi LALPA thuchhuak a ni. “Nilêng lêngin ka hming an sawichhia a ni.

⁶Chuvângin, ka mite chuan ka hming an hria ang a, chutih hunah chuan keimah ngei hi a sawitu ka ni tih an hria ang. Ngai teh, keimah ngei hi ka ni.”

⁷Zion hnêna, “I Pathian chuan ro a rêl ta,” tia, Bawih chhuah thu lâwmawm tlâng tina rawn puanga, Remna chanchin ṭha rawn thlentute ke chu a va mawi em!

⁸Ngai teh, i râlvêngtute au thâwm chu! Zion-a LALPA lo haw an mit ngeia an hmuh avângin Hlim takin an zai e.

⁹Jerusalem khaw ram tawha chêngte u, Hlim takin au dur dur rawh u; LALPAN a mite chu a thlamuanin Jerusalem khua chu a tlan ta e.

¹⁰Mi tin hmuhah LALPAN a bân thianghlim a hlîm ta a, Khawvêl pum pui pawh hian Pathian chhandamna chu an hmu bawk ang.

¹¹Chhuak rawh u, chhuak rawh u, Babulon hi chhuahsan rawh u; Thil bawlhhlawh rêng rêng khawih suh u, LALPA bungbêl phurtute u, inthian thianghlim ula, Chhuahsan rawh u.

¹²Tlânchhia anga kal tûr in ni lo va, Râltlân anga chhuak tûr in ni hek lo, LALPAN in hma a hruai ang a, Israel-te Pathian chu in hnu dâltu a ni dâwn si.

¹³ LALPA chuan heti hian a ti: “Ngai teh, ka chhiahhlawh chu a thil tihah a hmuingîl ang, Miten an chawimawiin an ngaisâng êm êm ang.

¹⁴Amah an hmuhin mi tam tak chuan Mak an ti êm êm dâwn a ni. A hmêl an tichhe nasa êm a, Mihring hmêl pawh a pu lo ve.

¹⁵Hnam tam tak chu a thisenin a theh fai ang, Lalte pawhin mak ti takin an hmui an chîp bawk ang; An la hrilh ngai loh chu an hmu ang a, An la hriat ngai loh chu an hre bawk dâwn si a.