Read Mizo Lushai Isaia 54 Bible Online

Isaia 54 - Mizo Lushai bible

Isaia 54

¹“Aw nang, fa nei ngai lo, hlim takin au rawh le, Nau vei ngai lo, lâwmin au chhuak ta che; Pasal neite ai chuan khawharnu chuan fanau a ngah zâwk dâwn,” LALPAN a ti.

²I puan in hmun chu zauh la, A khuhna pawh tihlai ang che, ren suh, A thlunna hruite chu tisei zêl la, A kaihmarna khente pawh tinghet sauh rawh.

³I ramri chu ding lam leh vei lamah i zauh ang a, Hnam dang luah ramte chu I fate chuan an nei ang a, Khawpui ram tawhte pawh An chûl hnûm leh dâwn e.

⁴Hlau suh, i zak dâwn tawh lo ve, I mualpho hek lo vang, i tlâwm tawh dâwn si lo, I tleirâwl lai mualphona chu i theihnghilh daih ang a, Hmeithai hmuhsitâwm tak i nih lai pawh i hre reng tawh lo vang.

⁵I siamtu chu i pasal a ni ang a, A hming Engkim LALPA a ni. Israel-te tlantu, Mi Thianghlima a ni a, Lei pum pui Pathian tih a ni bawk.

⁶Tleirâwl chhuaha pasal nei, a pasalin a duh tâk loh, Thinlung na êm êm ang hi i ni; Mahse, LALPAN a ko leh dâwn a che.

⁷Rei lo tê chhûng ka ṭhen che a, Ka khawngaih êm che a, ka ko leh thuai ang che.

⁸Ka thinur êm vângin ka hawisan lawk che a, Ka hmangaihin ka khawngaih kumkhua ang che, Nangmah tlantu LALPA chuan a ti e.

⁹“Nova dam lai khân Leiah tuilêt tawh lo tûrin thu ka tiam a, Thinur taka zilh tawh loh che tûnah ka tiam tâk hi,” Lainattu che, LALPAN a ti.

¹⁰“Tlângte chu bovin mualte pawh insawn mah se, Ka lainat che a reh lo vang, Remna thuthlung ka siam ka sût hek lo vang,” LALPA, hmangaihtu che chuan a ti.

¹¹Aw Jerusalem, sawisak nek tâwk, Tuifâwn vawrh lên vawrh lên, khawngaih hlawh lo, Lung ṭha chi hmangin ka din leh dâwn a che, I innghahna lungah safir ka phûm ang a,

¹²I vênbûkah rubi lung ka hmang ang a, I kulh kawngkhârah chuan lung chang tle mi ka hmang ang a, I kulh bangah lung hlu tak tak ka hmang bawk ang.

¹³I fa zawng zawng LALPAN a zirtîr ang a, Râlmuang takin an awm der der tawh ang.

¹⁴Dikna avângin i nghet ang a, Tiduhdahtu an kal bo vang a, hlauh tûr i nei lo vang, Hlauhawm lahin a hnaih hek lo vang che.

¹⁵Beitu che an awm chuan ka thu lova ti an ni a, A bei apiang che chu an tlâwm ngei ang.

¹⁶Ngai teh, meihawl chhêma, hriamhrei chhertu thîrdêngte hi ka siam an ni; Chûng hriamhrei thil tihchhiat nâna hmangtute pawh ka siam an ni.

¹⁷Nangmah beihna tûra an hriam chherte rêng rêng chu hmuingîl a awm lo vang. Nangmah hêktu zawng zawngte chuan Thiam loh an chang zâwk ang. Hei hi LALPA chhiahhlawhte chan tûr chu a ni, Hnehna ka pe dâwn e, LALPA thuchhuak chuan a ti.