Read Mizo Lushai Isaia 55 Bible Online

Isaia 55 - Mizo Lushai bible

Isaia 55

¹Hawh u, tuihâl apiangte u, Tui hi han pan rawh u. Tangka sum nei lote pawh lo kal ula, In ei atân buh hi tangka pawh pe chuang lovin han la ula, Uain leh hnutetui hi rawn chaw rawh u, A man a awm lo ve.

²Puar leh fânna ni lovah Engah nge in sum in khawhral le? Tlaina tûr ni lovah in tha in sêng thlâwn e. Ka thu hi ngai ula, Thil ṭha tuihnai tinrêng In châk apiang in ei dâwn nia.

³In beng dawhin ka hnênah lo kal rawh u, Ngaithla ula, in nung dâwn nia. Kumkhua atân thu i thlung ang, Lal Davida hnêna khawngaih ka tiam tlat tâk ang khân.

⁴Miten ka ropuizia an hriat theih nân, Ani chu hnam hotu leh hruaitu atân ka ruat a ni.

⁵I hriat ngai loh hnam chu i duh duhin i ko vang a, La hre ngai lo che chuan tlânin an rawn bêl dâwn che nia, Israel Mi Thianghliman chu chu a ti ang a, A chawimawi dâwn a che.

⁶Hmuh theiha a awm lai hian LALPA chu zawng ula, A hnaih lai hian amah chu ko rawh u.

⁷Mi sualte chuan an awm dân chu kalsan sela, Mi tu pawhin an ngaihtuahna sualte bânsan sela, LALPA lamah lo kîr rawh se. A lo khawngaih ngei ang; Kan Pathian hi ngaihdam peih tak a ni.

⁸‘Ka rilru leh in rilru chu a inang lo, Ka awm dân leh in awm dân pawh a inmil bawk hek lo,’ LALPA thuchhuak chuan a ti.

⁹Vân khi lei aia sâng a ni ang khian, Ka awm dân hi in awm dân aia sâng a ni. Ka rilru pawh in rilru aia thûk a ni.

¹⁰Ruah leh vûr chu vân aṭangin a lo tla a, Kîr leh lovin lei hi a tihnâwng ṭhîn, Thlai chi theh chu a tiṭiak a, A thehtu tân rah sêng tûr pawh a awmtîr ṭhîn.

¹¹Ka kâa thuchhuak pawh Hlawhchhama kîr leh rual a ni lo ve, Ka duhzâwng chu a ti zêl ang, Ka tirhnaah a hlawhtling ngei bawk ang.

¹²Hlim takin Babulon chu in chhuahsan dâwn. Râlmuang takin an hruai chhuak ang che u, In hmaah chuan tlâng leh mual te, Lâwmin an au chhuak ang. Ngâwa thingte chuan hlimin kut an bêng dur dur ang.

¹³Hnimhlîngnei hmunah chuan fâr thing a ṭo vang a, Hlohar hmunah lenhmui a ṭo bawk ang. LALPA thiltih hriat reng nâna kih loh tûr Kumkhua atân chhinchhiahna a ni ang.