Read Mizo Lushai Isaia 56 Bible Online

Isaia 56 - Mizo Lushai bible

Isaia 56

¹ LALPA chuan heti hian a ti: Dik takin ro rêl ula, diktakin thil ti rawh u, Ka chhan chhuak thuai dâwn a che u, Ka felzia chu a lo lang ang.

²Sabat bawhchhe lova serh ṭhîn, Thil ṭha lo rêng rêng khawih duh lo, hêng hi tia, Vawng tlattu mihring chu a nihlawh e.

³ LALPA mite rawn bêltu hnam dangte chuan, “LALPAN a mite nên min enhrang e,” ti hauh suh se. Til reh pawhin, “Thing ro mai ka ni e,” ti hek suh se.

⁴Til reh hnênah LALPAN heti hian a ti e: Sabat serha, ka duhzâwng tia, Ka thuthlung pawh vuan tlattu chu,

⁵Ka Tempul-ah, ka in chhûng ngeiah hian, Amah hriatrengna tûr ka siamsak ang, Fanu fapa neite aia hming ṭha ka pe bawk ang. A hming a dai ngai lo vang.

⁶Hnam dang, LALPA bêla a rawngbâwl ṭhîn LALPA hming chu ngaina êma, a chhiahhlawha inpe, Sabat bawhchhe lova serh ṭhîn, Ka thuthlung vawng tlat ṭhînte chu

⁷Ka tlâng thianghlimah chuan ka hruai ang a, ṭawngṭaina hmun, ka inah chuan, Hlim êm êmin ka awmtîr ang. Hâlral thilhlan inthawinate Ka maichâma an rawn lâk chu ka lo lâwm ang. Ka Tempul hi mi tinrêng tân ṭawngṭaina hmun tih a ni ang.

⁸Tihdarh Israel-te hruai khâwm lehtu, LALPA Pathian thuchhuak chuan heti hian a ti: A dangte pawh ka la hruai khâwm zêl ang.

⁹Ramhnuaia chêng, ngawpuia tla, Sakawlhte u, lo kal ula, han seh rawh u,

¹⁰Râlvêngtute mit chu a del vek a, eng mah an hre thei lo. Vêngtua dah ui bauh duh lo ang hi an ni, Mang nei hiala mut bawrh bawrh chauh an duh, Mut hi an va thlahlel kher êm!

¹¹Ui koham ang maiin an tlai thei lo, Berâmpu chu an ni ngei a, A chhia a ṭha an thlei thei lo; Mahni duhzâwng angin an khawsa a, An tâna hlâwk tûr chauh an zawng vek mai.

¹²“Hawh u, zu i zawng ang; Rakzu thlum tui i in ṭeuh vang, Naktûk lamah phei chuan vawiin aiin A thlum sawt ang,” an ti a.