Read Mizo Lushai Isaia 57 Bible Online

Isaia 57 - Mizo Lushai bible

Isaia 57

¹Mi dik a thihin hrethiam rêng an awm lo va, Pathian ṭih mi lâk bo a han ni a, Chûng mite chuan hrehawm an kalsan ta tih rêng Ngaihtuah zui thiam an awm hauh lo.

²Thlamuang takin an awm ta a, Nun ngîl taka khawsa ṭhînte chu An khum laizâwl ngeiah an hahchâwl ta.

³Nangni, dawi chîngte u, lo kal thuai thuai teh u, Uire fa leh mihur thlahte in ni si a.

⁴Tu nge in nuihzata, Tu nge in chhiat khuma, in lei in chhuah khum le? Suahsualna leh inbumnaa hrin vek in ni lâwm ni?

⁵Sasaw hnuaiah nuam in tâwl a, thingbuk hlim nuam in pan zêl a, In fa sênte inthawi nân in hlân a, Lui kam khâm kârahte in hlân si ṭhîn.

⁶Lui kam lung mûm in thlang chhuak a, Chûngte ngei chu in pathianah in neih ta a, Uain leihin inthawina in hlân a, Ka lâwm dâwnin in ring em ni?

⁷Tlâng sâng sângah in mut dun nân khum in dawh a, Tah chuan in rawn inthawi ṭhîn a.

⁸In kawngka phênah chuan In milem chu in hûng ṭhîn a ni. Khumah in puan in phah duai a, In lâwn dûn ta ṭhîn a, In mutpui châkte chu thu in tiam a, Remchâng in hmu mai ṭhîn.

⁹Hriak rimtuite in thih mawm a, Moleka biak tumin in pan vang vang ṭhîn a, Biak tûr zawngin palaite ram tin in fantîr a, Mitthi khuaahte hial in kaltîr ṭhîn.

¹⁰Biak tûr zawngin in hah zo va, “A beidawnthlâk mang e,” in ti si lo. Beisei tûr thar in hmu zêl a, In chau chuang lo.

¹¹Tu nge in hlauh, tu mitmei nge in vên? Dâwt min hrilh a, min theihnghilh tâk mai le? Rei tak ka ngawih avâng em ni Min zah lova min hlauh tâk loh?

¹²Dik nia i hriat chu i ti ṭhîn a; mahse, a sâwt lo vang, Ka mualpho dâwn a che.

¹³Mangang taka i au hunah I lâk khâwm ṭeuh milemte khân chhâng che rawh se, Thliin a lên ang a, a chhêm bo vang, Kei min bêltute erawh chuan ram hi an rochung ang, Ka tlâng thianghlim an chang bawk ang.

¹⁴Heti hian a ti: “Chhûng pâwng rawh u, Lamlian siamin lei chhûng ula, Ka mite hâwn kawng dîptu chu sât fai rawh u.”

¹⁵Hmunsânga chêng, chatuana nung, Mi Thianghliman heti hian a ti: “Hmun Thianghlim sâng takah awm mah ila, Thuhnuairawlh leh inchhîrte hnênah chuan Chawisâng tûr leh tiharh tûrin ka awm zêl ṭhîn.

¹⁶Ka mite chu ka dem fo lo vang a, Ka thin a ur reng hek lo vang. Ka hmaah chuan an chau chhe dah ang e, Keima siam ngei an ni si a.

¹⁷An sual vâng leh an duhâm avângin An chungah chuan ka thin a han ur a, Ka hrem a, thinurin ka hawisan ta a ni. Tichuan, an duhzâwng hlîr ti chung zêlin An khawsa lui ta tlat a ni.

¹⁸An awm dân chu ka hre reng a, Mahse, an natna chu ka tihdamsak ang a, Ka hruai ang a, ka pui ang a, Lusûnte chu ka thlamuan ang.

¹⁹Ram tin ram tanga awmte tân, Muanna, Muanna, ka mite chu ka tidam ngei dâwn e,” LALPA kâ chuan a ti.

²⁰Mi sualte zawng tuipui fâwn vêl, Châwl ngai lo ang hi an ni, Tuifâwnah chuan chirh leh bawlhhlawh a lo chhuak ṭhîn.

²¹Mi sualte tân muanna rêng a awm lo, Kan Pathian chuan a ti.