Read Mizo Lushai Isaia 59 Bible Online

Isaia 59 - Mizo Lushai bible

Isaia 59

¹Chhan pha lo tûrin LALPA bân chu a tawi lo va, Hre pha lo khawpin a beng a ngawng hek lo.

²In bawhchhiatnate hian a ni, In Pathian nên tihrang che u. In sualte chuan a hmêl a hliah zo va, In aw a hre thei lo va ni.

³In kutahte thisen a kai hnuang a, In kutzungṭangahte khawlohna chu a khat, In hmuite chuan dâwt in sawi a, In leite chuan thu sual in sep.

⁴Tu man dikna an ṭanchhan lo, Thu dik hmanga inkhing an awm hek lo. Thil lawilovah an innghat a, Dâwt ngawt an sawi an sawi. Thu buai awm thei an dap vêl a, Thu chhiaah an chantîr.

⁵Rûl tui angin thil sual an awp ṭhîn a, Maimawm angin thu sual an zam. An tui awp eitu chu a thi ang a, Tikehtu tân rûlngân a lo chhuak ang.

⁶An thil zam chu sin tlâk a ni lo va, An thil phan chu intuamna tlâk a ni hek lo. An thil tih chu sual hlîr a ni. An kutte chuan pawi a khawih reng a ni.

⁷Sual ti tûrin an tlân chak hle, Mi dik thisen chhuah tûrin an hmanhmawh a, An thil ngaih dân zawng zawng a kawi zo va, An kalna hmun tinah thil a chhe rem rum a.

⁸Remna kawng chu an hre lo va, Dik taka rorêl dân an hre hek lo. An kawngte chu a kikawi a, A kal veten râlmuanna rêng an hre lo vang.

⁹Tichuan, rorêlna dik chuan min hlat a, Dik taka thil tih chuan min chîm pha lo. Êng kan duh a, thim hlîr a ni, Khaw êng zawngin thimah kan kal.

¹⁰Mitdel angin bang kan dap a, Mit nei lo ang maiin kan phar kan phar. Zân thim angin chhûn laiah pawh kan tlu ṭhîn a, Mi chak zînga mitthi ang mai kan ni.

¹¹Savawm angin kan rûm kan rûm a, Mangang takin ṭhuro angin kan rûm bawk ṭhîn. Rorêlna dik kan beisei a, a awm si lo, Chhan chhuah kan nghâkhlel a, min chhan teuh si lo va.

¹²I hmaah chuan kan khawlohnate hi a va nasa tak êm! Kan sualte chuan min mualpho va, Kan bawhchhiatnate chu kan hre reng a, Kan suahsualnate pawh kan hai lo ve.

¹³ LALPA phatin kan nawrhsan a, Kan Pathian chu kan hawisan a, Thu veivirin hel zai kan rêl, Chhuanlam dapin dâwtte kan sawi.

¹⁴Dik taka rorêlna a awm ta lo, Dik taka thil ti rêng an awm hek lo. Rinawmna chu tuallaiah chuan a thal dêr a, Dikna pawh chu a lo lût thei ta lo va ni.

¹⁵Rinawmna rêng a awm ta lo, Sual hawisan chuan a tuar ta thung a, LALPAN a han hmuhin a lungawi lo hle a, Rorêlna dik rêng rêng a hmu zo lo.

¹⁶Tihduhdah tuar chhan tûr tu mah an awm lo va, LALPAN mak a ti êm êm a. Ama kut ngeiin a chhan dâwn e, Dikna chu a ṭanchhan a ni.

¹⁷Awmphâw atân dikna a ha ta a, Chhandam theihna lukhum a khum bawk a, Phuba lâkna puan chuan a intuam a, Thinurna puan a bât ta e.

¹⁸An thil tih ang zêlin a rûl dâwn a, Amah dotute chu thinurnain a rûl ang a, Hmêlmate chungah chuan phuba a la ang a, Thliarkâra awm daihte pawh chu a thungrûl ang.

¹⁹ LALPA hming ropui chu chhak leh thlanga miin an hlau vang a, LALPA thawin a chhêm tuilian angin Manganna chu a lo thleng ang.

²⁰“Jakoba thlah, sual hawisantute hnênah Zion-ah chuan Tlantua chu a lo kal ang,” LALPAN a ti.

²¹“Keiin in hnêna thu ka thlun chu hei hi a ni,” LALPAN a ti. “Ka Thlarau in hnêna awm leh, Ka thu in kâa ka dah chuan Tûn aṭanga kumkhuain a chhuahsan ngai lo vang che u; In fate leh in fate fa lehte pawh a chhuahsan ngai lo vang,” tih hi LALPA thuchhuak a ni.