Read Mizo Lushai Isaia 6 Bible Online

Isaia 6 - Mizo Lushai bible

Isaia 6

¹Lal Uzia thih kum khân LALPA chu ka hmu a, a lalṭhutthlêng, sâng taka chawi kânah chuan a ṭhu a, a kawrfual hmâwr chuan Tempul chu a tikhat vek a.

²A kiang vêlah chuan Seraf-ho an awm a, chûng chuan thla paruk an nei ṭheuh va, an thla pahnihin an hmai an khuh a, an thla pahnihin an ke an tuam a, an thla pahnihin an thlâwk a:

³‘Engkim LALPA chu a thianghlim e, A thianghlim e, a thianghlim e, Lei pum puiah a ropuina a lo khat,’ tiin an inau tawn an inau tawn a.

⁴An thâwmah chuan Tempul nghahchhan lungphûmte chu a nghîng dur dur a, Tempul chu meikhuin a khat ta a.

⁵Kei chuan, “Che heu! Ka boral a nih tâk hi! Hmui bawlhhlawh pu, hmui bawlhhlawh pute zînga chêng hian, Lalber, Engkim LALPA chu ka mitin ka hmu ta si a,” ka ti a.

⁶Seraf pakhat chu a lo thlâwk a, chaichehin maichâma meiling chu a rawn chep a,

⁷ka hmui a han dep a, “Hei hian i hmui a khawih ta a, I sualna lâk bo a ni ta a, I bawlhhlawh tihfai a ni ta e,” a ti a.

⁸“Tu nge ka tirh ang a, tu nge kan tân kal ang?” tiin LALPA aw ka hria a. Kei chuan, “Kei ka kal ang chu! Min tîr ta che,” ka ti a.

⁹Ka hnênah chuan, “Kal ta la, he hnam hi va hrilh rawh: Ngaithla reng mah ula, a ngaihna in hre lo vang, En reng mah ula, in hmu si lo vang,” tiin.

¹⁰“He mite thinlung hi tichawlawl la, An beng tingawng la, An mit timalh bawk ang che. Chutilo zawng, an mitin an hmu ang a, An bengin an hria ang a, An thinlungin an hre bawk ang a, Hawi kîrin tihdam an ni dah ang e,” a ti a.

¹¹Kei chuan, “LALPA, eng chen nge chutianga an awm ang?” ka ti a. Ani chuan, “Khawpuite chu luahtu awm lova a ram veka, inte pawh urtu awm lova ram pum a ṭiau vek hma loh chuan!

¹²LALPAN mite chu hla takah a thawn bo vang a, ram pum chu a tiṭiau vek phawt ang.

¹³“Sâwma pakhat pawh châmbang sela tihboral an ni ang. Sasua leh ṭhîl kih hnua a bul la awm ang hi a ni ang; chu chu chi thianghlim bul chu a ni,” a ti a.