Read Mizo Lushai Isaia 60 Bible Online

Isaia 60 - Mizo Lushai bible

Isaia 60

¹Tho la, êng chhuak rawh le, I êng a lo thleng ta, LALPA ropuina chuan a rawn ên ta a che.

²Thim chuan khawvêl a khuh tlat a, Hnam dang chung chu a thim mup mai, Nanga tân zawng LALPA êng chu a chhuak ta a, A ropuina i chunga fu an hmu vek ang.

³I êngah chuan hnam tin an lêng ang a, Lalte pawhin i ênna chu an rawn chhim ang.

⁴I mit han lên chho la, thlîr teh, Inpun khâwmin an lo kal e, Ram hla tak aṭangin i fate chu an lo haw a, I fanute an rawn pua e.

⁵I hmuh hun chuan i hmêl a hlim ang a, Hlim lutukin awm ngaihna pawh i hre lo vang. Hnam tin sum leh pai chu tuipui chungah an rawn tawlh haw dâwn e.

⁶Sanghâwngsei rual an lo kal duah duah mai, Midian leh Efa sanghâwngsei rualte chu, Seba, ram hla tak aṭang chuan an lo kal a, Rangkachak leh beraw an rawn phur e. LALPA fak hla an rawn sa dual dual mai.

⁷Kedar berâm rualte an rawn khalh duah duah a, Nebaiot berâm chalte an rawn hawn che. Ka maichâmah LALPA tilâwm tûrin an rawn hlân ang, Ka Tempul chu ka chawimawi dâwn a ni.

⁸Chhûm vâk dûl dûl, pârva lawi sup sup ang maia Lawng rual lo tawlh dûl dûlte saw khawi lam mi nge?

⁹Thliarkâr hla tak aṭanga lo kal an ni a, Tarsis lawngten an hma an rawn hruai a, Ram hla tak aṭangin i fate an rangkachakte an rawn hawn a, LALPA, i Pathian hming chawimawi tûr leh Israel Mi Thianghlima chawimawi tûrin, I mite chu hnam tin hmuhah LALPAN a chawimawi ta.

¹⁰Hnam dangte chuan i kulh bangte an rawn rem ṭha ang a, Lalte pawhin i rawng an rawn bâwl ang. Ka thinurin ka han vêl tak nâ che a, Duhsak chein ka khawngaih leh ta che.

¹¹I kulh kawngkhârte chu a inhawng reng ang a, Chhûn leh zânah tu man an khâr lo vang. Hnam tin lalten an ro hlute An rawn keng zut zut ang.

¹²I rawngbâwl duh lo hnam leh ramte chu an chhia ang a, An ral vek ang.

¹³Lebanon tlâng tiropuitu thing ṭha ṭha chu, Fâr te, tufâr leh phân thing te, Ka Hmun Thianghlim chei nân an rawn la ang. Ka ke nghahna hmun chu ka chawimawi dâwn a ni.

¹⁴Tirethei ṭhîn che thlahte chu Kûnin i hmaah chuan an lo kal ang, Nangmah hmusit ṭhînte chu I ke bulah an bawkkhup ang. “LALPA khawpui, Israel Mi thianghlima Zion,” An ti ang che.

¹⁵An hua che a, an hawisan che, Tu man an tlawh duh loh che kha, Kei hian khaw mawi berah ka din ang che a. Kumkhaw hlimna hmunah ka siam ang che.

¹⁶Hnam dangte leh an lalte chuan An duat ang che a, an hnute te an hnêktîr dâwn a che, Chhandamtu che, kei LALPA hi ka ni, Jakoba Mi Chaka, tlantu che chu ka nih i hre tawh ang.

¹⁷Dâr aiah rangkachak an rawn la ang, Thîr aiah tangkarua, thing aiah dâr, Lung aiah thîr ka rawn lâksak ang che. I chunga thuneitu atân ‘Remna’ ka dah ang a, Hna rêltu atân ‘Dikna’ ka dah bawk ang.

¹⁸I ramah chuan râwng taka che thâwm a reh ang a, I ram chu a chhiain a ram bawk hek lo vang. I bangte chu ‘Chhandamna’ i vuah ang a, I kawngkhâr chu ‘Fakna’ i vuah bawk ang.

¹⁹Chhûnah ni chu êng a ni tawh lo vang a, Zânah thla pawh i tân khâwnvâr a ni lo vang, LALPA ngei chu i kumkhaw êng a ni ang a, Pathian ropuina chuan a ên ang che.

²⁰I chungah chuan ni a tla ngai lo vang a, Thla pawh a mang ngai hek lo vang. LALPA ngei chu i kumkhaw êng a ni ang a, I lusûn hun a ral tawh ang.

²¹I mite chu mi dik tak vek an ni ang a, Ram chu in luah kumkhua tawh ang. Ka phun chawr, ka kutchhuak an ni a, Ka ropuizia mi tin hmuha ka tihlanna an ni.

²²An hnam zînga tê ber leh tlâwm ber chu Hnam ropui tak an la ni ang. Kei LALPA hian a hun takah ka ti thuai ang.