Read Mizo Lushai Isaia 61 Bible Online

Isaia 61 - Mizo Lushai bible

Isaia 61

¹ LALPA Pathian thlarau chu ka chungah a awm, Hriak min thih a, LALPAN min tîr a ni. Riangvaite hnênah chanchin ṭha hrila, Nun beidawngte tuamhlâwm tûrin, Saltâng chhuah tûr thu te, Rip thim taka khungte hruai chhuah an nih tûr thu puang tûr te-a tih ka ni.

² LALPA lungawi hun chu a thleng ta a, An Pathian phuba lâk hun lo thleng chu puanga, Lusûnte chu thlamuan tûrin mi tîr a ni.

³Zion khuaa khawharte hnêm tûr leh An lungngaihna lâwma chantîr tûrin, Pawr taka awm intuaihnûm leh tûr te, Ngui taka awm fak hla saktîr leh tûr tein min tîr a ni. LALPAN amah chawimawi tûra a phun, Thing duhawm tak an ni tih thu hrilh tûr ka ni.

⁴Hmasânga ṭiau tawh khuate chu an din leh ang a, Chim chhe tawh chu an tungding ang. Rei tak ram tawh khawpui chhia chu an siam leh ang.

⁵Hnam dangte chu in chhawr ang a, In ran rualte an enkawl ang. Ram dang miten in lei an let ang a, In grep huante an thlo bawk ang.

⁶Nangni hi zawng ‘LALPA puithiam’ tih in ni ang, ‘Pathian rawngbâwltute’ an ti bawk ang che u. Hnam tin hausakna chu in chên ang a, An ropuinate chuan in inthuam ang.

⁷In zahna leh in mualphona a reh ta a, Nangmahni ram ngeiah in chêng tawh ang; A lehhnihin in hausakna a pung ang a, Kumkhaw lâwmna in chang bawk ang.

⁸Kei LALPA hi dik taka rorêl duhtu ka ni, Hâlrala hlan atâna ran rûk hi ka hua a ni, Dik tak zêlin an thiltih lâwmman chu ka pe ang a, Kumkhaw thuthlung ka siamsak ang.

⁹In thlahte chu hnam tin zîngah an lâr ang a, An zînga in fanau chêngte an hmuh chuan LALPA duhsak hnam in ni tih an hria ang.

¹⁰ LALPA-ah chuan ka hlim êm êm ang a, Ka Pathian chungah hian ka lâwm hle ang. Moneitu, puithiam anga inchei leh a mo a inthuam mawi ang hian, Jerusalem khua chu chhandamna leh Hnehna puan chuan a rawn tuam ta a ni.

¹¹Leiah thlai chi a ṭiak ṭhîn a, Huana thil phun a chawr ngei ṭhîn ang hian LALPA, kan Pathian chuan hnehna a thlentîr ang, Hnam tinrêngin an fak bawk ang.