Read Mizo Lushai Isaia 62 Bible Online

Isaia 62 - Mizo Lushai bible

Isaia 62

¹Zion avângin ka ngawi hle hle thei lo, Jerusalem avângin ka awm mai mai thei lo, A dikzia chu a lan chiana, Chhandam a nih mei êng anga a lan fiah hma loh chuan.

²Hnam tinrêngin i dikzia chu an hmu ang, An lalte chuan i ropuizia an hmu bawk ang, LALPA sak ngei hming thar i pu dâwn e.

³ LALPA tân chawimawina lukhum mawi i ni bawk ang.

⁴‘Mâki,’ an ti tawh lo vang che a, I ram pawh chu, ‘Rami,’ an ti bawk hek lo vang. ‘Duhlaii,’ an ti tawh zâwk ang che a, I ram pawh chu, ‘Pawmlaii,’ an ti bawk ang. LALPA i chungah a lâwm a, I ram tân chuan pasal ang a ni ang.

⁵Nula thianghlim tlangvâl chhuanin a nei ang hian, Siamtu che chuan a pawm ang che. Moneituin a mo a lâwm ang hian, I Pathian chuan a lâwm ang che.

⁶Jerusalem, i kulh bangahte chuan râlvêngtu ka dah ang a, A chhûn a zân an awm mai mai lo vang. A thutiam kha hre reng tûrin LALPA an hrilh nawn fo ṭhîn ang.

⁷Jerusalem a rawn din ngheh leha, Ram tin fak tlâk tûra a rawn siam leh hma chu, LALPA chu a awm hle hle an phal lo vang.

⁸ LALPAN a kut ding lam meuh pharin thu a tiam a, A bân tha chak chuan a ti ngei ang. “In buhte chu hmêlma eiah ka pe tawh lo vang a, In thawh chhuah uainte pawh Hnam dangte chuan an in zawhsak tawh lo vang che u.

⁹A sengtute ngei chuan buh chu an ei ang a, LALPA an fak bawk ang. Grep rah lotute chuan uain chu Ka in thianghlim tualah an in bawk ang.”

¹⁰Khua aṭang hian kal chhuak ula, Ka mite hâwn kawng sial tûrin Thawk chhuak rawh u. Chhûng pâwng ula, lamlian atân lei chhûng rawh u; Lungte thian fai ula, Mi tin hmuhah chhinchhiahna târ chhuak rawh u.

¹¹Hnam tin hriatah LALPAN a puang ta e, Zion fanute chu hrilh rawh u, “LALPAN a rawn chhan ta che u, A chhanchhuahte a rawn hruai a, A tlan chhuahte a rawn chhawm e,” tiin.

¹² LALPA tlan chhuahte chu ‘Hnam thianghlim,’ an ti ang a, Nang pawh, ‘LALPA zawn chhuah, Rauhsan loh Khawpui,’ an ti ang che.