Read Mizo Lushai Isaia 64 Bible Online

Isaia 64 - Mizo Lushai bible

Isaia 64

¹Vân tithlêrin lo chhuk teh la, I hmaah chuan tlângte an khûr zawih zawih mai tûr.

²Meiin thingṭang a tialha, Tui chhuan a so bawrh bawrh ang hian, Hnam tinrêng hi i hmaah khûr sela, I hmêlmate i hming hriattîr ang che.

³Kan beisei loh thil hlauhawm tak tak tia, I lo chhuk laite khân tlâng lian pui pui i hmaah chuan an khûr a.

⁴Nangmah ngaitute tân Mita hmuh ngai loh leh benga hriat ngai loh, Thil ti ṭhîntu Pathian, nang chauh i ni.

⁵Thil dik tih châk, i duhzâwnga awm dân hriate I lo lâwm ṭhîn. Kan chungah zawng i thinur ta a ni, Kan sual lui zêl si a, Rei tak sual tawhte hi chhandam kan ni thei dâwn em ni?

⁶Kan zavaiin kan bawlhhlawh vek tawh a, Kan ṭhatna zawng zawng pawh silhfên bawlhhlawh ang mai a ni, Thinghnah uai ang vek kan ni e. Kan bawhchhiatnate chuan min lên min lên ta mai.

⁷I hming lam rêng kan awm lo va, Ṭanpui dîl tûr che-a tho peih kan awm hek lo, Kan lakah hian i hmêl i thup ta a, Kan sualna chuan min delh bet tlat a ni.

⁸Nang zawng, LALPA kan Pa i ni, Keini hi bellei kan ni a, nang a vawtu i ni; Kan zavai hian i kutchhuak kan ni e,

⁹ LALPA, kan lakah hian thinur tawh lul lo la, Kan suahsualna hre reng hek suh ang che; Min en teh mah, i mite vek kan ni.

¹⁰I khaw thianghlim chu thlalêr a chang zo ta, Zion khua chu thlalêr ram ro a ni ta a, Jerusalem khua chu a ram ta e.

¹¹Kan in thianghlim leh mawi, Kan pi puten an fak ṭhinna che Meiin a kâng zo va, Kan hmun nuam laite pawh A chim zo ta.

¹² LALPA, hêng hi pawi i ti lo vem ni? I ngawi tlatin min tirethei reng dâwn em ni?