Read Mizo Lushai Isaia 66 Bible Online

Isaia 66 - Mizo Lushai bible

Isaia 66

¹ LALPA chuan heti hian a ti: “Vân ka lalṭhutthlêng ani a, Lei ka ke nghahchhan a ni; In eng ang nge min sak anga, Khawiah nge ka chên ang?

²Thil zawng zawng hi ka kut ngeia ka siam a ni; Tichuan, an lo awm ta a ni,” LALPA thuchhuak chuan a ti. “Ka hmuh duhzâwng tute nge ni? Rilrua inngaitlâwm leh inchhîra ka thu awihtute hi an ni asin.

³Mahse, hêng mite tân hi chuan bâwng talha hlan emaw, Mihring thaha inthawi emaw a lêm chuang lo. Berâm hlan emaw, ui reh hlum hlan emaw, Chhangphut hlan emaw, vawk thisen hlan emaw, Rimtui an hâl emaw, milem an bia emaw, An tân a lêm chuang lo. An duh duhin thil an ti a. Thil tenawm biak an châkzâwng tak a ni.

⁴Keiin an tân thil râpthlâk tak ka tih dâwn hi, An thil hlauh ber ka thlentîr ang; Ka auh lai khân min chhâng lo va, Ka sawi lai khân an ngaithla duh si lo, Ka mit hmuhah ka duh loh zâwng thil an ti a, Ka lawm loh zâwng tih an thlang ta.”

⁵ LALPA ṭiha, a thu awihtute u, A thu sawi hi ngaithla rawh u, In u leh naute chuan an hua che u a, ‘LALPA ropuina chu lo lang ang hmiang, In lâwm emaw kan hria ang chu!’ An ti vei ṭhîn, an la mualpho ngei ang.

⁶Khawpui chhûnga ri ta chêl chûl, Tempul chhûnga thâwm chu eng nge ni ta? LALPA phuba la thâwm a ni, A hmêlmate a thungrûl ta a ni.

⁷“Vei hman lova nau hring ta thut ang hian, Ka khawpui chuan vei lâwk awm hauh lovin fapa zu hring ta a!

⁸Chutiang thil chu tu nge hre ngai? Tu nge hmu tawh awm le? Ram hi ni khat maiah a lo awm thei em ni? Hnam pawh a lo piang thut thei dâwn em ni? Zion khua chuan a han vei ṭan chauh va, Fapa a hring ta mai.

⁹Pian hun thlentîr siin ka piantîr lo vang maw?” LALPAN a ti. “Hring ṭêp tawh chu ka kîrtîr dâwn em ni?” In Pathianin a ti.

¹⁰Jerusalem tuarpuitute u, lâwmpui ula, He khawpui duhsaktute u, lâwm ve rawh u.

¹¹Nauvin hnutê duh tâwk a hne ang hian, A ropuina lo duah leh chu duh tâwkin chên rawh u.

¹² LALPA chuan heti hian a ti: “Lui kang lo ang maiin remna ka pe ang a, Hnam dang hausakna tinrêngte, Lui lian angin ka rawn luan luhtîr ang. Nuin a nau hnutê pein a pawm ṭhîn a, A malchungah a sêp lep lep ṭhîn a,

¹³A nau a awm tlei ṭhîn ang hian, Keimah ngei hian ka awm tlei ang che u a; Thlamuang takin Jerusalem-ah chuan in awm tawh ang.

¹⁴Chu chu in hmuh hunah lâwmin in harh huai huai ang a, Hnim chawrno angin in duah leh ang. Kei LALPA hian ka chhiahhlawhte ka pui ṭhîn a, Ka hmêlmate chungah ka thinur ṭhîn tih in hria ang.

¹⁵Ngai teh, mei nên LALPA a lo thawk e, Ṭhâwngaleivir tawlailîra lo chuangin a thinur chu meiin a hrithla dâwn, Meialh hmangin a rawn hrem ang.

¹⁶ LALPA chuan mei hmangin ro a rêl dâwn, Mi tin chungah a khandaih chu a lek ang a, LALPAN a that rem rum dâwn e.

¹⁷Inthian thianghlim tûra inbual faia, Hnam dang pathian be tûra kal nguah nguah te, Vawk leh chaichîm sate eia, Bawlhhlawh tinrêng eitute chu an boral ṭêp a ni,” LALPA thuchhuak chuan a ti.

¹⁸“An thiltihte leh an ngaihtuahte chu ka hria; hnam tinrêng leh ṭawng tinrêng hmangte chu ka hruai khâwm dâwn. An lo kal ang a, ka ropuina an rawn hmu ang.

¹⁹Anni chu chhinchhiahna ka entîr ang. An zînga ṭhenkhat chu ka zuah ang a, hnam dang zîngah Tarsis-ah te, Pul-ah te, Lud-ah te ka tîr ang a, thal kâp thiamte chu Tubal-ah te, Javan-ah te, thliarkâr hla takah te, ka hming la hre ngai hauh lo leh ka ropuizia la hmu ngai lo hnênahte ka tîr ang a, hnam tinrêng zîngah ka ropuizia an puang ang.

²⁰LALPA hnêna thil hlan tûr an rawn la ang hian hnam tinrêng zînga mi in unaute chu an rawn hruai ang. Sakawr chungahte an chuang ang a, tawlailîrahte an ṭhu ang a, zâwn bâwmahte an ṭhu ang a, sabengtung leh sanghâwngsei chungahte an lo chuang ang. Israel-ten thlêng thianghlima thil hlan tûr an rawn keng ang hian ka tlâng thianghlim Jerusalem-ah chuan an lo kal ang,” LALPAN a ti.

²¹“An zînga ṭhenkhat chu puithiamah te, Levia chi-ah te ka lo siam ang,” LALPAN a ti.

²²“Vân thar leh lei thar ka siam tûr chu, Ka hmaah chuan a awm reng ang, Chutiang bawkin in thlahte leh In hmingte chu a awm reng ang.

²³Thla thar leh sabat ni apiangin Chibai mi bûk tûrin mi tin an lo kal zut zut ang,” LALPAN a ti.

²⁴“An chhuah pah chuan, ka laka hel ṭhînte ruang chu an hmu ang a, A ṭawih lung chu a thi sêng lo vang, A kângtu mei pawh chu a mit ngai lo vang, Mi zawng zawngin tenawm an ti hle ang.”