Read Mizo Lushai Isaia 7 Bible Online

Isaia 7 - Mizo Lushai bible

Isaia 7

¹Uzia fa Jothama fapa Ahaza, Judai rama a lal laiin Suria lal Rezina leh Israel lal Remalia fapa Peka chu Jerusalem rûn tûrin an chho va, mahse, an la mai thei lo.

²Suria sipaiten Israel ram an lo thleng tawh tih Davida chhûngte an han hrilh chuan an hlau ta êm êm a, thliin ngaw thing a chhêm ang mai hian an khûr a.

³ LALPAN Isaia hnênah, “I fapa Shear-jasuba hruai la, Ahaza va hmu rawh, dîl chhakta aṭanga tui lâkna kawng tâwp, puan su mite hmun panna kawngpuiah a awm e.

⁴A hnênah heti hian va ti rawh: Inring la, zâm mai suh, thlaphâng hauh suh. Suria lal Rezina leh Remalia fapa thinur hi thingthu bung khu ang lek an ni asin.

⁵Suria leh Israel lal Remalia fapa chuan in chungah thil ṭha lo an rawt a ni.

⁶‘Judai ramah han chho ila, tichiai ila, kan tiṭhen ang a, an lalah Tabeela fapa hi kan siam dâwn nia,’ an ti vei a.

⁷ LALPA Pathian chuan heti hian a ti: ‘Chutiang chu a ni hauh lo vang a, An hlawhtling bawk hek lo vang.

⁸Suria lu chu Damaska a ni a, Damaska lu chu Rezina lek hi a ni si a. Kum sawmruk leh panga chhûngin, Efraim hnam chu an ral vek ang.

⁹Efraim lu chu Samaria a ni a, Samaria lu chu Remalia fapa lek hi a ni si a. Min rin loh chuan in ding chhuak lo vang,’ tiin,” a ti a.

¹⁰ LALPA chuan Ahaza hnênah thu a sawi leh a.

¹¹“Leilâwt aṭangin emaw, vân aṭangin emaw chhinchhiahna entîr tûrin LALPA, i Pathian dîl rawh,” a ti a.

¹²Ahaza chuan, “Ka dîl lo vang, LALPA chu ka fiah duh hek lo,” a ti a.

¹³Isaia chuan, “Davida thlahte u, ngaithla teh u, mi dang tihhah tâwk ti lovin kan Pathian leh zêl tihhah in duh elo?

¹⁴LALPA ngei chuan chhinchhiahna a hmuhtîr ang che: Ngai teh, nula chuan nau a pai ang a, fapa a hring ang a, a hmingah, ‘Imanuela’ a sa ang.

¹⁵A chhia a ṭha a thliar theih hma pawhin mite chuan hnutetui leh khawizu an ring ang.

¹⁶Chu nau chuan a chhia a hnâwl a, a ṭha a thlan theih hma pawhin i hlauh êm êmte ram chu a ṭiau vang.

¹⁷“LALPA chuan nang leh i mite leh i pa chhûngte chungah, Efraim-ho kha Judai ram aṭanga an intihhran china la thleng ngai lo hrehawm nasa tak a tithleng dâwn a ni: Asuria lal chu a rawn hruai ang.

¹⁸Chûng ni-ahte chuan LALPAN Aigupta rama lui, Nail hnâr aṭangte chuan faifûkin tho rual a ko vang, Asuria ram aṭang pawhin khuai rual a ko bawk ang.

¹⁹An lo thlâwk chiam ang a, luikawr kam khâmah te, Tlângram khâm kârah te, Hlîng buk leh ran tlatna hmunah te an lo fu sup sup ang.

²⁰Chumi ni chuan Eufretis lui kama awm, Mi lu mehsak chîng Asuria lal chu, LALPAN a ruai ang a, In sam leh in hmul zawng zawng, In khabehmulte nên lam a ziat fai ang.

²¹Chumi ni chu a lo thlen chuan, Bâwngpui leh kêlpui pahnih an la vulh hrâm ang a,

²²Hnutetui an ngah hle ang, Khawizu nên an ring ang. Rama la awm chhunte pawhin khawizu leh hnutetui an ring bawk ang.

²³Chumi ni chu a lo thlen chuan, Tangka bûk sâng man, Grep kûng sâng awmna zawng zawng pawh chu hlo har leh hnimhlîngneiin a bawh ang.

²⁴Tah chuan thalngul kengin thal nên an ramvâk ang. Ram pum puiah hnimhlîngnei leh hlohar a khat dâwn a ni.

²⁵Tuthlawha an thlawh fai ṭhin mual zawng zawng chu, Hlohar leh hnimhlîngneia a khah avângin Tu mah an kal ngam lo vang, Bâwng rual an tla ang a, Berâm rual tlatna hmun a ni bawk ang.”