Read Mizo Lushai Isaia 8 Bible Online

Isaia 8 - Mizo Lushai bible

Isaia 8

¹ LALPA chuan ka hnênah, “Ziakna tûr phêk hlai tak la la, mi tin chhiar theih tûrin, ‘Maher-salal-khas-Baza’ tân, tih thîr zumin ziak kuau rawh,” a ti a.

²Thuhretu atân mi rinawm tak pahnih, puithiam Uria leh Jeberakia fapa Zakaria ka sâwm a.

³Tin, ka nupui bulah ka awm a, nau a pai a, fapa a hring a. LALPA chuan, “A hmingah, ‘Maher-salal-khas-baza’ sa rawh.

⁴Nausên chuan, ‘Ka nu, ka pa,’ a tih theih hmain Damaska hausakna leh Samaria khua ata râllâk sum an lâk tûr chu Asuria lal hnênah an thlen ang,” a ti a.

⁵ LALPA chuan mi hrilh leh a,

⁶He mite hian Silo lui dam tui chu an duh lo va, Rezina leh Remalia fapa an lo lâwm a.

⁷Kei LALPA hian Asuria lal leh a sipaite chu Tui lian angin ka lêntîr ang.

⁸A kuang a khat ang a, a kamah chuan a luang liam dûl dûl ang, Judai ram chu a rawn pan ang a, a rawn hrût zêl ang a, Nghâwng thleng zawkin ram pum a rawn chîm ang, I ram chungah a thla a zâr duai dâwn, Aw! Imanuel.

⁹Mite u, hre rawh u, in chau dâwn e, Ram hla taka awmte u, bengchhi rawh u, A ni, inpeih ula, hlau viau rawh u.

¹⁰Râl rêl ula, a hlawhtling chuang lo vang, In duh tâwkin sawi ula, a sâwt bawk hek lo vang, Kan Pathian kan hnênah a awm si a.

¹¹He mite kawng zawh lai hi zawh ve lo tûrin LALPAN khauh takin min hrilh a.

¹²‘Hêng mite hi thurualpui suh, an hlauh ang chu hlau ve hek suh la, ṭih bawk hek suh.

¹³Engkim LALPA hi a ni in zah tûr chu. Ani chauh hi a ni in hlauhva in ṭih tûr chu.

¹⁴A thianghlim êm avângin Israel chhûng hnihte tân inchhuihna tûr lung, chhuiha tlûkna tûr chu a ni. Jerusalem-a chêngte tân tlâkna tûr hum leh awhna tûr thang a ni.

¹⁵Mi tam tak an inchhuih ang a, an âwk ang a, an tâng tlat ang,’ a ti a.

¹⁶Ka zirtîrte u, in thu zir, ka hrilh che u kha, vawng ṭha ula, kawl tlat rawh u.

¹⁷Kei chuan LALPA hi ka nghâk reng ang a, Jakoba thlahte lakah a biru rih a nih hi; kei chuan ka beiseina chu amahah ka nghat tlat ang.

¹⁸En teh, kei leh LALPA min pêk naupangte hi, Zion tlânga chêng Engkim LALPAN Jerusalem mite tân chhinchhiahna, thil mak tak ni tûrin min ti a ni.

¹⁹Mitthi thlûk thiam te, eng emaw zâwla chiap chiapa phun bul bul te chu râwn tûrin an ti ang che u. Anni chuan, ‘Thlaraute hi râwn tûr a ni a, thi tawhte pawh la damte tân râwn tûr an ni,’ an lo ti ang.

²⁰Zirtîrna thu, ka hrilh che u mawlh kha, ngai ngun rawh u; anni thu sawi chuan awmzia a nei lo ve.

²¹Mangang tak leh rilṭâm takin ram chu an fang ang a. An rilṭâm thinur chuan vân lam enin an lal leh an Pathian chu ânchhia an lawh bawrh bawrh ang.

²²Lei lam an hawi chuan manganna leh thim, thim râpthlâk tak, an tawn ngei tûr thim chu an hmu ang.