Read Mizo Lushai Isaia 9 Bible Online

Isaia 9 - Mizo Lushai bible

Isaia 9

¹Mangang taka awm ṭhînte tân thim a awm tawh lo vang, Tûn hma lam khân Zebulun leh Naftali ram chu Hmusitawm tak a ni a, Hun hnuhnûngahte erawh chuan a la tiropui hle ang, Tuipui kam aṭanga Jordan lui râl Galili ram, Jentail-te chênna ram chu.

²Thim hnuaia khawsa ṭhîn hnamte chuan êng ropui tak an hmu ta a, Ram thim taka chêngte tân chuan khua a lo vâr ta.

³Chûng hnamte chu i tipung a, An hlimna pawh i tihpunsak ta a, Buh seng leh râllâk sum insem laia an hlim ang hian, I hmaah chuan an hlim a ni.

⁴An rit phurhna nghâwngkawlte leh an thil kawh fungte chu, Chhawrtuin a vuakna tiangte nên chuan Midian-ho hneh ni ang khân, I tihtliahsak ta si a.

⁵Sipai lo kal ṭhup ṭhupna pheikhawk te, An thuam thisen kai hniang hnuang te, Hâl a ni a, a kâng zo ta.

⁶Kan tân nau a lo piang a, Fapa min pe ta a. Sawrkârna chu a kovah a innghat a, A hmingah chuan: Remruattua, Maka, Pathian Chaka, Chatuan Pa, Remna Lal an ti ang.

⁷A sawrkârna a nghet tulh tulh ang a, A ram chhûngah remnain tâwpintai a nei lo vang. Thu dik hmanga dik taka rorêlin Davida lalṭhutthlêngah a ṭhu ang a, a tinghet ang, Tûn aṭanga kumkhuain LALPA ṭhahnemngaihna chuan Chûng chu a ti ngei ang.

⁸ LALPAN Jakoba thlahte demin thu a sawi a, Israel mite pawh a huap a ni:

⁹‘Efraim mi leh Samaria mi zawng zawng chuan Hêng hi a tih a nih an hria ang; An chapovin an inchhuang vei hle a,

¹⁰Leirawhchan bang chim mah se, Lungchher kan rem mai ang, Lungli khanchhuk min tansak a, Sidar thing ṭha kan hmang hlauh vang,’ an ti.

¹¹ LALPAN hmêlma a chawk tho ta, Anmahni hualtu tûrte chu.

¹²Khawchhak lamah Suria, khawthlang lamah Filistia, Israel chu dawlh tumin an kâ an âng huau mai. Chuti pawhin LALPA thinur a reh lo va, A kut a la lek cheu a ni.

¹³Israel mite chu anmahni hremtu lamah an kîr lo va, Engkim LALPA lam chu an hawi duh lo.

¹⁴Chuvâng alâwm Israel-te lu leh mei chu Ni khat thilah LALPAN a tansak ni, An tûmkau leh aidûte pawh a sâmsak bawk.

¹⁵An lu chu an upa chhuante an ni a, An mei chu zâwlnei dâwt hehte hi an ni.

¹⁶An hnam hruaitute hian an hruai bo va, An hruaite chu an bo zo ta a ni.

¹⁷Pathian pawisa lovin thil sual an ti vek a, An thu chhâkchhuahte lah a nikhua bawk hek lo; Chuvângin, LALPAN an tlangvâlte a zuah lo va, Fahrahte leh hmeithaite pawh a khawngaih lo, Chutiang a nih pawhin LALPA thinur a reh lo va, A kut a la lek cheu a ni.

¹⁸Sual hi hlohar leh hnimhlîngnei kângtu mei ang a ni, Ngaw hnuaia hnimte pawh a tikâng a, A khu chho hluah hluah ṭhîn.

¹⁹Engkim LALPA thinurna chuan ram chu a tikâng a, Mihringte chu hâl tûr chheh khâwm ang mai an ni. Tu man mahni unau ngei pawh an zuah si lo;

²⁰An ding lama mi hlepin an ei a, An ril a la ṭâm tho, An vei lama mi pawh an ei a, An puar chuang lo, mahni fate ngei pawh an ei.

²¹Manase leh Efraim mi an inbei a, Juda thlahte an beihrawn a, Chutiang a nih pawhin LALPA thinur a reh lo va, A kut a la lek cheu a ni.