Read Mizo Lushai Leviticus 10 Bible Online

Leviticus 10 - Mizo Lushai bible

Leviticus 10

¹Nadaba leh Abihua, Arona fate chuan, an meilawhin meiling an rût a, rimtui hâl chi an phul a, LALPA hmaah mei thiang lo chu an hmang a. Chutiang hman chu LALPAN a khap a ni.

²LALPA hnên aṭangin mei a lo chhuak zawk a, LALPA hmaah an pahnih chuan an kâng hlum ta a.

³Mosia chuan Arona hnênah, “LALPA chuan hemi thu-ah hian heti hian a ti, ‘Ka rawngbâwltute chuan ka thianghlimna hi an pawisa tûr a ni. Ka mite hmaah ka ropuizia ka tilang dâwn,’ a tih rêng kha,” a ti a. Arona chu a ngawi reng a.

⁴Mosia chuan Arona pami Uziela fa Misaela leh Elzafana te chu a ko va, an hnênah, “Lo kal ula, in unaute ruang hi bûk thianghlim aṭang hian la chhuak ula, riahhmun pâwnah dah chhuak rawh u,” a ti a.

⁵Tichuan, an lo kal a, Mosia sawi angin an ruang chu an puithiam kawr fual chuan riahhmun pâwnah an zâwn chhuak ta a.

⁶Mosia chuan Arona leh a fa Eleazara leh Ithamara hnênah, “Lu in sûnin in sam thlah suh ula, in puan pawh pawtthlêr ve hek suh u; chutianga in tih chuan in thi ngei ang a, LALPA chu hnam pum chungah a thinur ang. LALPA meiin a kan hlumte chu in unau Israel dangte erawh chuan an ṭah thei ang.

⁷Nangni chuan Inbiakna bûk hi chhuahsan suh u, in thi dah ang e, LALPA hriak thih in nih tawh kha,” a ti a. Mosia sawi ang chuan an ti ta a.

⁸ LALPA chuan Arona hnênah

⁹“Inbiakna bûka in lo luh dâwnin nang leh i fate hian uain leh zu in in tûr a ni lo, in in chuan in thi ang. Hei hi inthlah zawng zawngten an zâwm tûr a ni.

¹⁰Thil serh leh serh loh, thiang leh thiang lo in thlei thiam tûr a ni.

¹¹Mosia hnêna dân ka pêk zawng zawng che u chu Israel mite chu in zirtîr tûr a ni,” a ti a.

¹²Mosia chuan Arona leh a fapa pahnih la dam, Eleazara leh Ithamara-te hnênah, “Buhbâl thilhlan aṭanga LALPA hnêna hlan bâng kha la ula, maichâm bulah ei rawh u: serh hran tlat a ni tawh si a.

¹³Hmun thianghlimah chuan ei ula, LALPA hnêna ei tûr hlan aṭanga in fate nêna in chanpual a ni. Hei hi LALPA thupêk a ni.

¹⁴A irno leh a bawp, LALPA hmaa thên kha chu hmun thianghlimah chuan in fapate leh in fanute nên in ei thei ang. Hêng thilhlante hi in fate nêna in ei atân remna thilhlan aṭanga in chanpual tûr chu a ni.

¹⁵LALPA hmaa a bawp leh a irno an thên kha meia thilhlan LALPA hnêna a thau an hlan rualin an rawn la tûr a ni. LALPA thupêk angin hêng hi in fate nêna in kumkhaw chanvo tûr a ni,” a ti a.

¹⁶Mosia chuan sual thawina thilhlan kêl chungchâng thu chu dîlchhût takin a zâwt a, an lo hâl dêr tawh tih a hre ta a. Eleazara leh Ithamara chungah chuan a thinur ta hle a.

¹⁷“Engtizia nge sual thawina thilhlan kêlpa sa chu hmun thianghlimah in ei loh, serh hran tlat tawh a nih kha; mipui sual thawina aṭanga in chan tûra LALPA pêk che u a nih kha.

¹⁸Inbiakna bûkah a thisen chu lâk luh a ni si lo va, ka hrilh tawh che u ang khân chutah chuan a sa in ei tûr alâwm,” a ti a.

¹⁹Arona chuan a chhâng a, “Vawiin hian sual thawina sa chu ei ila, LALPA chuan a remti meuh ang maw? Mipuite chuan LALPA hnênah sual thawina chu an rawn hlân a, chuti chung pawhin hêng thil râpthlâk tak hi ka chungah a thleng a ni,” a ti a.

²⁰Chûng chu Mosian a han hriat chuan a lungawi ta a.