Read Mizo Lushai Leviticus 13 Bible Online

Leviticus 13 - Mizo Lushai bible

Leviticus 13

²“Vuna pân emaw, bawl emaw, vûng emaw a awma, dam mai thei lo tûr chi anga a lan chuan puithiam entîr tûr a ni.

³Puithiamin pân chu ngun takin a han en ang a, a pân laia hmul chu a vâr a, a pân dân chu a vêl vun aia thûk hlea a lan chuan phâr natna chi a ni a, puithiam chuan mi bawlhhlawh a nih a puang ang.

⁴A pân chu a vâr a, pâwnlâng hlea a lan a, a hmul pawh a vâr loh bawk chuan puithiamin ni sarih chhûng a awm hrantîr ang a.

⁵Ni sarih hnuah puithiam chuan a en leh ang a, a pân chu a ngai reng a niha, a darh loh chuan ni sarih dang a awm hrantîr leh ang.

⁶Ni sarih ral hnuah a en leh ang a, pân chu a lo hila, a darh loh chuan mi bawlhhlawh a ni lo tih puithiam chuan a puang ang. Pân narân mai a ni a, a silhfênte chu a su ang a, a thiang ang.

⁷Puithiamin a ena, a thiang tia a puan tawh hnuin pân chu darh sela, a inentîr leh tûr a ni.

⁸Puithiam chuan a en leh ang a, a lo darh zau chuan mi bawlhhlawh a nih a puang ang: phâr natna chi a ni.

⁹“Tu pawhin phâr natna chi hi an vei chuan puithiam hnêna hruai ngei tûr a ni;

¹⁰ani chuan ngun takin a lo en ang a, pân chu a vâr piapa, a hmul a vâr a, a hnai a awm bawk chuan

¹¹phâr dam har chi a ni: puithiam chuan mi bawlhhlawh a ni tih a puang ang, en leh tûra awm hrantîr a ngai lo vang: a bawlhhlawh tih a chiang sa a ni.

¹²Chu natna chu a darha, puithiam hmuh phâk chin, a ke aṭanga a chhîp thleng a awh chhuah tawh chuan,

¹³puithiamin ngun takin a en ang a, a taksa puma a darh chhuah zawh tawh chuan chu mi chu a thiang tawh tih a puang ang: a vun chu a vâr chhuah vek chuan a thianghlim tawh a ni.

¹⁴Amaherawhchu, lâwng a lo awm chuan a bawlhhlawh a ni.

¹⁵Puithiam chuan a en leh ang a, lâwng lai a hmuh chuan bawlhhlawh a ni tih a puang ang. Taksaa lâwng awm hi phâr natna a ni a, a bawlhhlawh a ni.

¹⁶Lâwng chu a reha, a lo vâr chuan puithiam a entîr tûr a ni.

¹⁷Anin a lo en ang a, lâwng kha a lo vâr chuan chu mi chu a thianghlim a ni tih a puang ang.

¹⁸“Khawihli dam tawh,

¹⁹a lo vûnin emaw, a sen a a lo durhin emaw puithiam entîr tûr a ni.

²⁰Puithiam chuan a bawlhhlawh tih a puang ang: khawihli aṭangin phâr natna a insiam a ni.

²¹A hmul chu a vâr lohva, a vêl vun aṭanga thûk lêm lova puithiamin a hriat chuan chu mi chu ni sarih chhûng khung hran tûr a ni.

²²Chu thil chu a ṭaidarh chuan puithiam chuan a bawlhhlawh a ni tih a puang ang: hri ṭha lo a ni.

²³A danglam lohva, a darh bawk loh chuan, khawihli aṭanga ser satliah a ni: puithiam chuan a thiang tih a puang ang.

²⁴“Kângmei tuar chu a kâng lai a sen vêt emaw, a sendâng emaw a nih chuan

²⁵puithiamin a lo ensak ang a, a hmul a lo vâra, a vun pâwn aṭanga thûk viauva a lan chuan, a kâng hliam lai kha phâr natnaah a insiam ta a ni. Puithiamin chu mi chu a bawlhhlawh tih a puang ang.

²⁶A hmul a vâr lohva, thûk tehchiam pawh niin lang lo mah se, a duk deuh chuan puithiamin ni sarih chhûng a khung hrang tûr a ni.

²⁷A ni sarih niin puithiam chuan a en leh ang a, a ṭaidarh chuan phâr natna a ni: puithiam chuan chu mi chu a bawlhhlawh tih a puang ang.

²⁸A ngai reng a niha, a ṭaidarh lohva, a duk bawk loh chuan phâr natna a ni lo; kang ser satliah a ni a: puithiamin chu mi chu a thiang tih a puang ang.

²⁹“Mipa pawh hmeichhia pawh, an lû-ah emaw, an khabeah emaw pân a awm chuan

³⁰puithiamin a en ang a, a vêl vun aṭanga thûk hlea a lana, a hmulte chu a en deuh piap chuan phâr natna a ni: chu mi chu a bawlhhlawh tih a puang ang.

³¹Pân chu thûk tehchiamin lang lo mah se, a hmul te chu a dum ṭhat lêm loh chuan ni sarih chhûng khung hran tûr a ni.

³²A ni sarih ni-ah puithiam chuan a pân chu a en leh ang a, a ṭaidarh lohva, thûk tehchiama a lan bawk loh chuan,

³³a pân bul vêla sam chu ziah kâwn tûr a ni, puithiam chuan ni sarih chhûng a khung hrang leh tûr a ni.

³⁴Ni sarih niin puithiam chuan a pân chu a en leh ang a, a ṭaidarh lohva, thûk tehchiama a lan loh chuan, a thianghlim tih a puang ang; chu mi chuan a silhfên chu a su ang a, a thianghlim tawh ang.

³⁵A thianghlim tih puan hnuah pân chu a ṭaidarh chuan

³⁶puithiamin a en leh ang a, pân chu a lo ṭaidarh ngei a nih chuan chu mi chu a bawlhhlawh a ni; a hmul a eng nge eng lo tih en a ngai lo vang.

³⁷Pân chu a ṭaidarh lohva, sam chu sam dum ṭha nia puithiamin a hriat chuan pân chu a dam ta tihna a ni; puithiam chuan a thianghlim ta tih a puang ang.

³⁸“Mipa pawh, hmeichhia pawh, an vuna vâr a lo awm chuan,

³⁹puithiamin a ensak ang a, a vâr lai chu a thîm deuh chuan thil mawi lo satliah mai chauh a ni: amah chu a thianghlim tho a ni.

⁴⁰A tukkhum lam leh a chal lam sam tla fai sela, lukawlh satliah mai a ni a, a thianghlim tho a ni.

⁴¹A chal leh beksam tla fai sela, chalkawlh satliah a ni, a thianghlim tho.

⁴²A kawlh laiah eng emaw sendâng deuh emaw a awm chuan phâr natna a ni.

⁴³Puithiamin a lo en ang a, sendâng deuh a awm chuan,

⁴⁴chu mi chu a lu-a phâr natna a awm avâng chuan a bawlhhlawh tih a puang ang.

⁴⁵“Phâr natna vei chuan kawr ṭet a ha ang a, a sam a thlah ang a, a hmai chanve, a khabe lam chu a tuam ang a, “Bawlhhlawh, bawlhhlawh,” tiin a au ṭhîn tûr a ni.

⁴⁶Chu phâr natna thak chu a neih chhûng chuan a bawlhhlawh a, mi dang bula awm ve lovin daipâwnah a awm tûr a ni.

⁴⁷“Sahmul puanah emaw, puan zai sînah emaw,

⁴⁸la phiarah emaw, sahmul la phiarah emaw, savunah emaw, savuna siam thil dangah emaw hmuar a kaia,

⁴⁹hring deuh emaw, sen deuh emaw nia a lan chuan hmuar darh chi a ni a, puithiam entîr tûr a ni.

⁵⁰Puithiam chuan a en ang a, ni sarih chhûng a dah hrang ang a,

⁵¹ni sarih ni chuan a en leh ang a; hmuar chu a lo darh chuan chu thil chu a bawlhhlawh a ni.

⁵²Puithiam chuan a hâl tûr a ni; hmuar, meia hâl tûr chi a ni.

⁵³A ena, a lo darh loh chuan

⁵⁴a sûk faitîr ang a, ni sarih dang a dah leh ang a,

⁵⁵a en leh ang a, hmuar chu darh lo mah se a hmuar rawng chu a danglam loh chuan a la bawlhhlawh tho a ni; a hmuar chu a pâwn lam chauhvah emaw, a chhûng lam chauhva awm emaw a nih pawhin.

⁵⁶A han en leh a, hmuar chu a lo nêp chuan a awmna lai chu puan aṭangin emaw, savun aṭangin emaw chuan a hlep thla ang.

⁵⁷Hmuar kha a lo lan leha, darh zêla a lan chuan puan neitu khân a hâl mai tûr a ni.

⁵⁸A han sûka a reh mai chuan a su nawn leh ang a, a thianghlim tawh ang.

⁵⁹La zai sîn puan emaw, sahmul puan phiarah emaw, savuna siam thil rêng rêngah emaw hmuar a kai a, a thianghlim leh thianghlim loh thliar dân tûr chu chutiang chu a ni,” a ti a.