Read Mizo Lushai Leviticus 16 Bible Online

Leviticus 16 - Mizo Lushai bible

Leviticus 16

¹Arona fate pahnihin LALPA hmaa mei thiang lo hmanga rimtui an hâl avânga an thih tâk hnu khân LALPA chuan Mosia hnênah,

²“I u Arona chu hrilh rawh: Thuthlung Bâwm chhîn chunga chhûma ka lo kal ṭhin avângin Hmun Thianghlim Ber pindan zâr chhûngah a lo lût mai mai tûr a ni lo; chu chu a pawisak loh chuan a thi mai ang.

³Hmun Thianghlim Berah chuan bâwngpatuai, sual thawina thilhlanah leh berâm hâlral thilhlan rawn hlân tûrin a lo lût thei ang.

⁴A inbual zet ang a, silhfên thianghlim a inbel tûr a ni; puan zai sîn kawr te, kekawr te a ha ang a, puan zai sîn kâwnghrên a hrêng ang a, puan zai sîn diar a khim bawk tûr a ni.

⁵Israel pungkhâwmho chuan sual thawina thilhlan tûr kêlpa pahnih leh hâlral thilhlan tûr berâm pachal pakhat an pe tûr a ni.

⁶Arona chuan bâwngpa chu amah leh a chhûngte sual thawi nân sual thawina thilhlanah a hlân ang.

⁷Inbiakna bûk luhnaah kêl pahnih chu a kai ang a,

⁸a eng zâwk nge LALPA tân ni ang a, a eng zâwk nge Azazela tân ni ang tih hriat nân ṭhum a vâwr ang a,

⁹LALPA thlan zâwk chu sual thawina thilhlanah a hlân ang.

¹⁰Azazela tâna thlan kêl chu LALPA hnênah a nung chunga hlan phawta, mipuite sual lâk bo nân Azazela hnênah thlalêrah chhuah tûr a ni.

¹¹“Arona chuan bâwngpa chu a hlân ang a, amah leh a chhûngte sual thawi nân sual thawina thilhlan a hlân tûr a ni.

¹²Meilawhin maichâma meiling chu a lâwk ang a, rimtui hâl chi ṭhûm khat nên Hmun Thianghlim Berah a rawn dah tûr a ni.

¹³LALPA hmaah rimtui chu meiah chuan a phul ang a, rimtui khu chuan Thuthlung Bâwm chhîn chu a hliah dawn nia; tichuan, a hmu thei lo vang a, a thi mai dâwn lo nia.

¹⁴Bâwngpa thisen chu a kutzungchalin Thuthlung Bâwm chhîn chhak lamah chuan a theh ang a, Thuthlung Bâwm hmaah pawh vawi sarih a theh tûr a ni.

¹⁵Chumi hnuah chuan kêl kha mipui sual thawina thilhlanah a talh ang a, a thisen chu Hmun Thianghlim Berah chuan a rawn dah ang a, bâwngpa thisen a tih ang khân Thuthlung Bâwm hma lamah leh a chhînah a theh tûr a ni.

¹⁶Chutiang chuan Hmun Thianghlim Ber chu Israel mipuite bawhchhiatna leh an sualna aṭangin a thian thianghlim tûr a ni. Inbiakna bûk chu riahhmun bul maia awm a ni a, riahhmun bawlhhlawhna avângin chutia tihthianghlim chu a ṭûl a ni.

¹⁷“Hmun Thianghlim Ber thian fai tûra Arona a luh leh a lo chhuah leh inkârah Inbiakna bûk chhûngah tu mah an awm tûr a ni lo.

¹⁸Amah leh a chhûngte sual leh Israel pungkhâwmho sual thawina a tih zawh chuan pâwnah a lo chhuak ang a, maichâmah hâlral thilhlan a hlân ang a, a thian thianghlim ang. Bâwngpa thisen leh kêl thisen ṭhenkhat chu maichâm kila ki-ahte chuan a tât tûr a ni.

¹⁹A zungchalin thisen ṭhenkhat chu maichâmah vawi sarih a theh ang, Israel mite sualna avângin a thian thianghlim tûr a ni.

²⁰Hmun Thianghlim Ber te, Inbiakna bûk chhûng zawng zawng te, maichâm te a then thianghlim hnu chuan Azazela tâna kêl kha LALPA hmaah a hlân ang.

²¹Kêl lu-ah chuan a kut khing hnih a nghat ang a, Israel miten thil ṭha lo leh sual an tihte leh an khawlohna zawng zawng chu a puang ang a, kêl lu-ah chuan a nghat ang; a ti tûra mi ruat chuan thlalêrah kêl chu a kalpui ang a.

²²Kêl chuan an bawhchhiatna zawng zawng chu a phur ang a, thlalêrah chuan a chhuah ang.

²³“Chumi zawhah Arona chu Biakbûk chhûngah a lût ang a, Hmun Thianghlim Bera a luh dâwna puithiam kawr a hâkte kha a hlîp ang a, a hnutchhiah ang.

²⁴Hmun Thianghlimah chuan a inbual ang a, ama thawmhnaw a inbel leh ang a, hâlral thilhlan, ama pual leh mipui pualin a hlân ang a, ama sual leh mipui sual chu a thawi dâwn a ni.

²⁵Sual thawina thilhlan ran thaute chu maichâmah a hâl ang.

²⁶“Thlalêra Azazela tâna kêl va thlahtu kha a lo haw hunah a thawmhnaw a su ang a, a inbual bawk tûr a ni.

²⁷“Bâwngpa leh kêl, sual thawina thilhlan atâna talh, sual lâk bo nâna an thisen, Hmun Thianghlim Bera lâk luhte sa chu, a vun te, a kawchhûngte nên daipâwnah hâl vek tûr a ni.

²⁸Va hâl raltu chuan a silhfên a su ang a, bûk lama a kîr hmain a inbual tûr a ni.

²⁹“He dân hi zawm kumkhua tûr a ni. Thla sarihna, ni sâwm ni chuan Israel mi zawng zawng leh an zînga hnam dang awm vete chuan chaw an nghei ang a, hna rêng an thawk tûr a ni lo.

³⁰Hemi ni hian a ni, an lo thianghlim theih nân an sual zawng zawng thawina thilhlan an hlan ni.

³¹“He ni hi ni serh, serh tlat tûr, chaw ngheia hna pawh thawh lohna tûr ni a ni. He dân hi kumkhuaa zawm tûr a ni.

³²“Puithiam lalber tûra hriakthih, a pa aiawh tûra nemngheh chuan puithiam kawr thianghlim ha-in hêng thil hi a ti tûr a ni.

³³Hmun Thianghlim Ber te, Inbiakna bûk chhûng te, maichâm te, puithiamte leh pungkhâwmho then faina hna chu a tih tûr a ni.

³⁴Hêng dânte hi kumkhua a zawm tûr a ni. Israel mite sualna zawng zawng then faina hna hi kum tin vawi khat tihsak ngei tûr a ni,” a ti a. Mosia chuan LALPA thupêk ang chuan a ti ta a.