Read Mizo Lushai Leviticus 17 Bible Online

Leviticus 17 - Mizo Lushai bible

Leviticus 17

¹ LALPA chuan Mosia hnênah,

²“Arona leh a fate leh Israel mite chu hrilh rawh, hei hi LALPA thupêk a ni.

³Israel miin riahhmunah pawh, daipâwnah pawh bâwngpa emaw, berâm emaw, kêl emaw a talha,

⁴LALPA hnêna hlan tûr si Inbiakna bûk kawngka-a a talh loh chuan dân bawhchhia a ni. Thisen chhuah ang a ngaih tûr a ni a, a chipuiten an ensan tûr a ni.

⁵Ramhnuaia inthawina ran talh an chîn ṭhin te hi LALPA hnêna hlân tûrin puithiam hnênah Inbiakna bûk kawngkaah an rawn kai ang a, LALPA hma-a remna thilhlanah an rawn hlân tawh ṭhîn tûr a ni.

⁶Puithiam chuan a thisen chu Inbiakna bûk luhna bula maichâmah a theh ang a; a thaute chu a hâl ral tûr a ni, chu chu LALPA duhzâwng tak a ni.

⁷Kêl hmêl pu ramhuai an be tawh tûr a ni lo; chutiang bia chu LALPA lakah an uire a ni. He dân hi Israel miten an zâwm kumkhua tûr a ni.

⁸“Israel mi emaw, hnam dang an zînga awm emaw, tu pawhin LALPA hnênah hâlral thilhlan pawh, thilhlan chi dang rêng rêng pawh,

⁹Inbiakna bûk kawngka bulah chauh an hlân tûr a ni; hmun danga hlan chu Pathian miten an ensan tûr a ni.

¹⁰“Israel chhûngkaw zînga mi emaw, an zînga hnam dang awm emaw, a thisen chawpa sa ei tawh phawt chungah LALPA a ṭuan ang. Pathian mite zîng ata hnawh chhuah tûr a ni.

¹¹Thil nung rêng rêng, an nunna chu an thisenah a awm a; chuvâng chuan, mite sual la botu tûr thisen chu maichâma leihbuak tûr, LALPAN a ti a ni. Thisen chu nunna a ni a, chu chuan sual chu a la bo va ni.

¹²Chuvângin a ni, LALPA chuan Israel mite leh an zînga hnam dang awm vete chuan a thisen chawpin sa an ei tûr a ni lo a tih ni.

¹³“Israel miin emaw, an zînga hnam dangin emaw, sa thiang pawh, sava thiang pawh ramvahnaah man sela, a thisen chu leiah a far kangtîr ang a, vaivutin a chhilh leh tûr a ni.

¹⁴Thil nung tinrêng nunna chu a thisenah hian a awm si a; chuvângin LALPA chuan Israel mite chu a thisen chawpa sa eng mah ei lo tûrin a ti a ni. Tu pawh, ei lui chu, Israel zîng ata ensan tûr a ni.

¹⁵Israel mi emaw, an zînga chêng hnam dang mi emaw, tu pawhin ran thisâwn sa emaw, sa seh sa emaw a ei chuan an silhfên an su ang a, an inbual ngei tûr a ni, tlai thlengin an bawlhhlawh ang; chutah an thiang chauh vang.

¹⁶Insu duh lo emaw, inbual duh lo emaw chuan an tuar ang,” a ti a.