Read Mizo Lushai Leviticus 18 Bible Online

Leviticus 18 - Mizo Lushai bible

Leviticus 18

¹ LALPA chuan Mosia hnênah,

²“Israel mite chu in Pathian, LALPA ka nih hi hrilh rawh.

³In chên tawhna Aigupta mite tih dân chîng ve suh ula, ka hruai luhna tûr che u Kanan ram mite awm dân pawh la hek suh u.

⁴Ka dânte hi in zâwm ang a, ka thupêk angin in awm zâwk tûr a ni. LALPA in Pathian ka nih hi.

⁵Ka dânte hi zâwm ula, tih tûra ka tihte hi ti rawh u; chu chu mihring tân nunna tûr a ni; LALPA ka nih hi.

⁶“Tu man mahni laichîn hnai pâwl tûr a ni lo, LALPA ka nih hi.

⁷I pa timualpho tûrin i nu i pâwl tûr a ni lo, i nu a ni a, ani pawh i timualpho tûr a ni lo.

⁸I pa nupui dang tu pawh pâwlin i pa i timualpho tûr a ni lo.

⁹In khata awm ho in ni emaw, ni lo emaw i farnu, nu hrang emaw, pa hrang emaw hrin pawh i pâwl tûr a ni lo.

¹⁰“I fapaa fanu te, i fanu hrin i tunute pâwl suh, mahni intimualpho i ni.

¹¹I pa nupui fanu chhawm pawh i pâwl tûr a ni lo, i farnu a ni tho asin.

¹²“I ni i pâwl tûr a ni lo.

¹³I nu laizâwn pawh i pâwl tûr a ni lo, inlaichîn hnai in ni.

¹⁴I pami nupui pawh pâwl suh, ani pawh i nu bawk a ni.

¹⁵I fapa nupui, i mo chu pâwl suh.

¹⁶I unaupa nupui pawh pâwl suh.

¹⁷“I hmeichhe pawl tawh fanu emaw, tunu emaw pâwl suh, thil sual a ni; i laichîn hnai an ni.

¹⁸I nupui dam chhûngin a laizâwn nupuiah nei suh.

¹⁹“Hmeichhe thi nei lai pâwl suh, a bawlhhlawh lai a ni.

²⁰Mi nupui pâwl suh, mahni i intibawlhhlawh a ni.

²¹“Moleka biak nâna hâl ral tûrin i fa i pe rêng rêng tûr a ni lo, i Pathian hming i tibawrhbâng ang e, LALPA ka nih hi.

²²“Mipain mipa vêk a mutpui tûr a ni lo, a tenawm a ni.

²³Mipa pawhin, hmeichhia pawhin ran an mutpui tûr a ni lo; chutiang chîng chu piangsual an ni a, intibawlhhlawh ve suh u.

²⁴In hmaa ka ûm chhuah tûr hnamte kha hêng thil hian an intibawlhhlawh ṭhîn a, hêng thil hian intibawlhhlawh ve suh u.

²⁵An thil chîn avangin ram chu an tibawrhbâng a, an sual avâng chuan ram chu ka hrem ang a, anniho chu ka hnawt chhuak dâwn a ni.

²⁶Nangni chuan ka dânte leh ka thupêkte hi zâwm ula, in zînga tu mahin, in zînga chêng hnam dangte lam pawhin, hêng thil tenawm hi ti ve suh u.

²⁷In awm hmaa hêng rama awmte hian hêng thil tenawm hi an ti ṭhîn a, ram chu an tibawlhhlawh ta a.

²⁸Chumi rama awm in hmaa mite hnawh chhuaha an awm ang khân, ram chu in tihbawlhhlawh ve chuan hnawh chhuah in ni ve ngei ang.

²⁹In zînga hêng thil ti ve chu ensan ngei tûr a ni.

³⁰Hêng thil tenawm in hmaa mite chîn ṭhin hi ti ve lo tûrin ka ti che u a ni, intibawlhhlawh ve rêng rêng suh u, LALPA in Pathian ka nih hi,” a ti a.