Read Mizo Lushai Leviticus 19 Bible Online

Leviticus 19 - Mizo Lushai bible

Leviticus 19

¹ LALPA chuan Mosia hnênah,

²“Israel mipui pungkhâwmho chu hrilh rawh: In thianghlim tûr a ni, kei LALPA in Pathian hi ka thianghlim si a.

³Mahni nu leh pa in zah ṭheuh tûr a ni, ka thupêk angin ka sabat ni in serh tûr a ni, LALPA in Pathian ka nih hi.

⁴Milem lamah thle suh u, biak atân milem chhûn siam hek suh u, LALPA in Pathian ka nih hi.

⁵“LALPA hnêna remna thilhlan in hlanin tih dân tûr ka sawi ang hian ti ula, ka lo pawm ang.

⁶A sa chu in talh ni-in emaw, a tûkah emaw ei zawh tûr a ni a; a ni thum ni thlênga la awm chu hâl tûr a ni.

⁷A ni thum nia in ei chuan, a bawlhhlawh tawh avângin in thil hlan chu ka pawm lo vâng.

⁸Chutiang ei chuan thil thianghlim an tibawrhbâng a, a mawh an phur tûr a ni, an chipuite chuan an ensan tûr a ni.

⁹“Buh in sengin vau fêm chenin seng suh u, in lâk hmaih vai tûrin kal leh hêk suh u.

¹⁰Grep vawi khat lawh hnu emaw, a rah tla emaw vai suh u, mi retheite leh hnam dangte tân hnutchhiah rawh u, LALPA in Pathian ka nih hi.

¹¹“Ru suh, bum suh, dâwt sawi hek suh.

¹²Ka hming chhâlin dâwt sawi suh, i Pathian hming i tihliau tûr a ni lo, LALPA ka nih hi.

¹³“I vêngte nêkchêp suh la, an thil neih chhuhsak hek suh. I hnêna inhlawhfa hlawh chu zan khat pawh hrênsak suh.

¹⁴Bengngawng bechhawhchhi suh; mitdel hmaah inchhuih tlûk theihna tûr eng mah dah suh. In Pathian hi ṭih rawh u, LALPA ka nih hi.

¹⁵“Dik takin i vêngte thu rêlsak ṭhîn la, mi rethei duhsak bîk lo la, mi hausa hlau chuang hek suh.

¹⁶Mi chungchâng, dâwt thu pudarhtu ni suh; thi mai thei dinhmuna ding chu chhan tûrin i thu hriat ang ang sawi hreh suh: LALPA ka nih hi.

¹⁷Tu mah haw rilru suh, tlang taka thu sawi chhuakin in inkâr thu tifel ang che; chutichuan, thil sual i ti dâwn lo nia.

¹⁸Tu ma chungah phuba la suh, haw reng hek suh; i vêngte chu nangmah i inhmangaih ang bawkin hmangaih ve rawh. LALPA ka nih hi.

¹⁹“Ka thupêkte hi zâwm rawh. Ran chi hrang hrang no thlah pawlhtîr tum lui suh. Lo pakhatah thlai chi hrang hrang chîng suh. Thil chi hnih kaih pawlha tah kawr ha suh.

²⁰“Bawih nula chu miin hmei atân hual sela, a man la pêk loh emaw, la chhuah loh emaw a nih chuan mi dangin lo ngai mah se, bawih mai an ni a, tihhlum tûr a ni lo, hrem tûr erawh chu an ni.

²¹A mipa chuan bâwhchhiat man thilhlan, Inbiakna bûkah a rawn hlân tûr a ni.

²²Chu mi sual thawina tûr inthenna chu puithiamin a lo hlansak ang a, Pathianin a ngaidam ang.

²³“Kanan ram in lo thlen hunah, thei in phun rêng rêng a rah tirh aṭanga kum thum chhûng bawlhhlawha ngaih tûr a ni a, ei suh ang che u.

²⁴A kum linaah theirah zawng zawng chu LALPA in Pathian hnêna lâwmthu hrilh nân in hlân tûr a ni.

²⁵A kum nganaah erawh chuan theirah chu in ei thei tawh ang; chutianga in tih chuan in thei chu a rah duh hle ang; LALPA in Pathian ka nih hi.

²⁶“Sa rêng rêng a thisen chawpin ei suh u. Mitthi thlûk te, aien te chîng suh u.

²⁷Bak sam ziah kawlh te, hmuihmul meh te,

²⁸inziak ṭial te, inzai kak te lusûn entîr nân chîng ve suh u.

²⁹“I fanu chu Tempul nawhchizuara pein tihmingchhe suh; hnam dang pathian lam i hawi hlauh vang a, ram chu suahsualnain a khat dah ang e.

³⁰Sabat ni serh la, chibai mi bûkna hmun chu zah rawh, LALPA ka nih hi.

³¹“Ramhuaizâwl emaw, mitthi thlûk thiam emaw râwn tûrin kal suh; chutiang i tih chuan i bawlhhlawh ang. LALPA in Pathian ka nih hi.

³²Lu-a kêlsam ṭo tawhte hmaah din nachâng hria la, upate chu zah rawh. In Pathian ṭih rawh u, LALPA ka nih hi.

³³“In rama hnam dang awm ve te chu tinawmnah suh u.

³⁴In Israel-puite angin en ula, mahni in inhmangaih angin hmangaih ve rawh u. Nangni pawh Aigupta ramah mikhual in nih ṭhin kha hre reng rawh u. LALPA in Pathian ka nih hi.

³⁵“Tehna dik lote, bûklung dik lote, tehkhâwng dik lote hmangin mi bum suh u.

³⁶Tehna dik tak, bûklung dik tak, tehkhâwng dik tak hmang ṭhîn rawh u. Aigupta ram aṭanga hruai chhuaktu che u LALPA, in Pathian ka nih hi.

³⁷“Ka dân zawng zawng leh ka thupêkte hi zâwm rawh u, LALPA ka nih hi” ti in.