Read Mizo Lushai Leviticus 2 Bible Online

Leviticus 2 - Mizo Lushai bible

Leviticus 2

¹‘LALPA hnêna Buhbâl thilhlan pe chuan chhangphut ṭha chi han la sela, oliv hriak leh beraw telh rawh se.

²Puithiam chuan chhangphut chu a ṭhâm ang a, hriak tlêm leh beraw zawng zawng nên chuan maichâmah a hâl ral tûr a ni, chu chu a vaia hâl ral a ni tih entîrna a ni; hâlral thilhlan a ni a, LALPA lâwmzâwng tak a ni.

³Thilhlana hâl bâng chu puithiam chanpual tûr a ni a, LALPA hnêna hlan tawh, serh hran tlat a ni.

⁴‘Buhbâl thilhlanah thuka hem hmin a rawn ken chuan dawidim telh loh chhang a ni tûr a ni, hriak nêna hmeh a nih loh pawhin pan taka nuai, hriak chulh ni rawh se.

⁵‘Thîr thlêng kuma kan, buhbâl thilhlan chu chhangphut ṭha chi, dawidim telh loh, hriak nêna hmeh a ni tûr a ni.

⁶Hlan dâwnah tihsawma hriaka tâl tûr a ni.

⁷‘Buhbâl thilhlan chu, chhangphut ṭha chi, thîrbêla hriaka kan a ni tûr a ni.

⁸Chutiang thil chu LALPA hnêna i hlan dâwn chuan puithiam pe la, ani chuan maichâmah a keng ang a,

⁹a ṭhen a sâwk thla ang a, a sawh thlâk chu a hâl ral tûr a ni; chu chu a vaia hâl ral entîrna a ni ang. Hei hi hâlral thilhlan a ni a, LALPA lâwmzâwng tak a ni.

¹⁰Hlan bâng la awm chu, puithiamte ta tûr a ni, LALPA hnêna hlan a ni tawh a, serh hran tlat a ni.

¹¹‘Buhbâl thilhlan, LALPA hnêna hlan rêng rêng chu dawidim telh tûr a ni lo; dawidim leh khawizu telh rêng rêng LALPA hnênah hâl ral atân hlan tûr a ni lo.

¹²In buhbâl seng hmasak ber erawh chu LALPA hmaah kum tin in rawn hlân tûr a ni, maichâmah hâl ve tûr a ni lo.

¹³Buhbâl thilhlanah hian chi a tel zêl tûr a ni, chi hi Pathian nêna in thuthlung entîrna a ni a, in thil hlanah telh zêl tûr a ni.

¹⁴‘In buhbâl thar hmasa in rawn hlan hunah chuan chhangpêr hlan tel ṭhin tûr a ni a,

¹⁵oliv hriak leh beraw telh bawk tûr a ni.

¹⁶Puithiam chuan chhangpêr leh hriak tlêm, a vai aiawh tûrin, a la ang a, beraw nên chuan buhbâl thilhlanah LALPA tân a hâl ral tûr a ni.