Read Mizo Lushai Leviticus 20 Bible Online

Leviticus 20 - Mizo Lushai bible

Leviticus 20

¹ LALPA chuan Mosia hnênah,

²“Israel mite hrilh rawh; Israel miin emaw, in zînga chêng ram dang miin emaw Moleka hnêna mahni fa a hlan chuan tihhlum tûr a ni, pungkhâwmho chuan lungin an dêng hlum tûr a ni.

³Mahni fa Moleka hnêna hlâna ka Hmun Thianghlim tibawrhbânga, ka hming thianghlim tichhetu chu ka hawisan ang a, ka ensan ang.

⁴Israel mipuiten chu thil chu an ngaihthaha, an tihhlum duh loh chuan,

⁵keimah ngei hi chu mi chungah leh a chhûngte chungah ka ṭuan ang a, Moleka bia-a ka laka rinawm lo zawng zawng chu ka mite zîngah ka telh tawh lo vang.

⁶“Ramhuaizâwl leh mitthi thlûk thiam râwntute chu ka hawisan ang a, ka mite zîngah ka telh tawh lo vang.

⁷LALPA in Pathian ka nih avângin invawng thianghlim rawh u.

⁸Ka dânte hi zâwm ula, ti ṭhîn rawh u. LALPA in Pathian chu ka ni, a tihrangtu che u ka ni.

⁹“Mahni nu leh pa ânchhe lawhtu chu tihhlum tûr a ni; a thisen mawh chu amahin a phur ang.

¹⁰“A Israel-pui nupui uiresaktu chu a hmeichhia nên tihhlum tûr an ni.

¹¹Miin a pa nupui zînga pakhat pawh a lo pâwl chuan a pa a timualpho a ni a, a hmeichhia nên tihhlum tûr an ni a, an thisen mawh chu anmahniin an phur ang.

¹²Miin a mo a mutpui chuan a hmeichhia nên tihhlum tûr an ni. Laichîn hnai inngai an ni a, an thisen mawh chu anmahniin an phur ang.

¹³Mipain mipa dang a pâwl chuan thil zahthlâk tak an ti a ni, an pahnihin tihhlum tûr an ni, an thisen mawh chu anmahniin an phur ang.

¹⁴Miin nufa nupuia a neih kawp chuan thil zahthlâk tak an ti a ni, an pathum chuan hâl hlum tûr an ni; hetiang thil hi in zîngah ti an awm tûr a ni lo.

¹⁵“Miin ran a pâwl chuan ran nên chuan tihhlum tûr an ni.

¹⁶Hmeichhia pawh ran pâwl tuma mutpui chu ran nên chuan tihhlum tûr a ni, an thisen mawh chu anmahniin an phur ang.

¹⁷“Miin a farnu, nu hrang hrin emaw, pa hrang hrin emaw nupuia a neih chuan vântlâng zînga tihmualpho tûr a ni; khua ata hnawh chhuah tûr a ni. Mahni farnu a ngai a, a mawh chu a phur tûr a ni.

¹⁸“Miin hmeichhe thi nei lai a pâwl chuan an pahnihin ensan tûr an ni, bawlhhlawh lai chungthu-a dân an bawhchhia a ni.

¹⁹Miin mahni ni emaw, nute laizâwn emaw a pâwl chuan an pahnihin an sual mawh chu an phur tûr a ni.

²⁰Miin a pami nupui a pâwl chuan a pami chu a timualpho va, a hmeichhia nên chuan an sual mawh chu an phur ang, fa rêng an nei lo vang.

²¹Mahni unau nupui chhuhsaktu chuan fa rêng a nei lo vang, thil bawlhhlawh tak a ti a, a unaupa a timualpho a ni.

²²“Ka dân leh ka thupêk zawng zawngte hi zâwm ula, ti ṭhîn rawh u; tichuan, in awmna tûr ram ka hruai thlen hunah che u chuan chu ram ata chu hnawh chhuah in ni dâwn lo nia.

²³Chûng hmuna lo awm, ka hnawh chhuahsak tûr che u te awm dân la ve suh ang che u; hêng hi tih an chîng a, ka tenzâwng tak an ni.

²⁴He ram, khawizu leh hnutetuia luang ram hi, in neih atân pêk che u ka lo tiam tawh a, ka pe ngei ang che u; LALPA, in Pathian ka ni, hnam dang zîng ata ka la hrang che u a ni.

²⁵Chuvângin, rante leh savate chu a thiang leh thiang lo thliar ngun ula, ran thiang lo emaw, sava thiang lo emaw ei suh u; thiang lo ka tih in ei chuan in thiang lo ve ang.

²⁶Ka ta bîk in ni a, kei LALPA hi ka thianghlim a, nangni pawh in thianghlim tûr a ni, ka pual bîk atân hnam dang zîng ata ka thlang chhuak che u a ni.

²⁷“Mipa pawh, hmeichhia pawh, ramhuai zâwl leh mitthi thlûk chîng chu lunga den hlum tûr an ni, an thisen mawh chu anmahniin an phur ang,” a ti a.