Read Mizo Lushai Leviticus 21 Bible Online

Leviticus 21 - Mizo Lushai bible

Leviticus 21

¹ LALPA chuan Mosia hnênah, “Arona fa, puithiamte chu hrilh rawh, an zînga mite chu tu mah an chipuite ruang khawihin an intibawlhhlawh tûr a ni lo.

²Mahni nu emaw, pa emaw, fapa emaw, fanu emaw, unau emaw,

³farnu emaw pasal nei lo; in khata awmpui ruang erawh chu an khawih thei ang.

⁴Nupuia chhûngte ruang pawh khawihin an intibawlhhlawh tûr a ni lo.

⁵Puithiam tu mahin lusûn entîr nân an lu pangkhing an ziat kawlh tûr a ni lo, an hmuihmul an mêt tûr a ni lo va, an inzai kak tûr a ni hek lo.

⁶An thianghlim tûr a ni, ka hming an tihliau tûr a ni lo; hâlral thilhlan hâltu an ni a, ka hnêna ei tûr hlântu an ni bawk a, an invawng thianghlim tûr a ni.

⁷Puithiam chu an thianghlim a, nawhchizuar hnu te, mâk hnu te, tlangvâl ngai tawh te nupuiah an nei tûr a ni lo.

⁸In Pathian hnêna ei tûr hlântu, ka mite zîng ata ka tihhran an ni.

⁹Puithiam fanu nawhchizuar chuan a pa a timualpho va, hâl hlum tûr a ni.

¹⁰“Puithiam lalber chu hriakthih a ni a, puithiam thawmhnaw inbel tûra serh hran a ni; chuvângin, lusûn entîr nân khuih lovin a sam a thlah tûr a ni lo va, a puan a pawtthlêr tûr a ni hek lo.

¹¹Mitthi ruang awmnaah a kal tûr a ni lo; a nu leh a pa ngei ruang pawh khawihin a intibawlhhlawh tûr a ni lo.

¹²Chutianga ti tûrin ka hmun thianghlim chhuahsanin a intibawlhhlawh tûr a ni lo, ka tâna serh hran tawh, hriak thih a ni, LALPA ka nih hi.

¹³Nula thianghlim chauh nupuiah a nei tûr a ni.

¹⁴Pasal sûn te, mâk hnu te, tlangvâl ngai tawh te, nawhchizuarte nupuiah a nei tûr a ni lo, ama chipui zînga mi nula thianghlim a nei tûr a ni.

¹⁵Chutilo chu, a fate an bawlhhlawh ang e; anni pawh an thianghlim tûr a ni. LALPA ka nih hi, kei hian ka puithiam lalber chu ka serh hrang tawh a ni.”

¹⁶ LALPA chuan Mosia a hrilh a;

¹⁷“Arona hrilh rawh; in thlah zînga mi piangsual tu mahin ei tûr thilhlan hi eng lai mahin an rawn hlân tûr a ni lo.

¹⁸Piansualna nei chuan thilhlan a rawn hlân tûr a ni lo; mitdel te, kebai te, hmêl tihchhiat te, ruhrel danglam bîk pu te,

¹⁹kut bûl te, ke bûl te,

²⁰êlkûn te, tawngchham te, mit terh te, uithak vei phuhlip neite leh tilmu keh te chuan thilhlan an hlân tûr a ni lo.

²¹Puithiam Arona thlah, taksaa piansualna nei chuan hâlral thilhlan hâl tûrin emaw, ei tûr thilhlan hâl tûrin emaw a lo kal tûr a ni lo.

²²Chutiang mi chuan Pathian tâna thilhlan thianghlim leh puithiam chanvo thil thianghlim chu a ei ve thei chauh vang.

²³Piansualna a neih avângin Hmun Thianghlim Ber puanzâr bulah a lo kal tûr a ni lo; maichâm a rawn hnaih tûr a ni hek lo. Hêng thil thianghlim hi a tibawrhbâng tûr a ni lo, LALPA ka nih hi, ka tihthianghlim tawh a ni si a.” a ti a.

²⁴Hêng thu hi Mosia chuan Arona leh a fate chu a hrilh a, Israel mite pawh a hrilh a.