Read Mizo Lushai Leviticus 22 Bible Online

Leviticus 22 - Mizo Lushai bible

Leviticus 22

¹ LALPA chuan Mosia hnênah,

²“Arona leh a fate chu hrilh rawh; Israel miten ka hmaa thil serh an rawn hlante chu urhsûn takin lo dawng sela, ka hming timualpho suh se, LALPA ka nih hi.

³Israel miten ka tâna thil thianghlim an rawn hlan chu in thlah zêlte tu pawhin an bawlhhlawh laia an khawih chuan puithiama bân tûr an ni; LALPA ka nih hi.

⁴Arona thlah, vuna phâr natna vei emaw, a zahmawh aṭanga thil pût nei emaw chuan a bawlhhlawhna a reh hma chu thilhlan thianghlim hi a khawih tûr a ni lo. Puithiamin mitthi ruang khawihtu a khawihin emaw, ama chi a tlâkin emaw a bawlhhlawh ve ta a ni.

⁵Bawkvâka kal ran bawlhhlawh emaw, mi bawlhhlawh emaw a khawih pawhin a bawlhhlawh a ni; a inbual hma chu thilhlan thianghlim a ei ve thei lo vang.

⁶Puithiam chutianga bawlhhlawh tawh phawt chu tlai thlengin a bawlhhlawh a, a inbual hma chu thilhlan serh thianghlimte chu a ei ve thei lo vang.

⁷Ni a tlâk hnu chuan a thianghlim ang a, thilhlan thianghlim chu a ei ve thei tawh ang, a chanpual tûra tih a ni si a.

⁸Ran thisâwn emaw, sa seh emaw a ei tûr a ni lo, a bawlhhlawh phah dâwn a ni, LALPA ka nih hi.

⁹“Thil tih dân tûr ka sawite hi an zâwm vek tûr a ni, an zawm duh loh chuan a mawh an phur ang a, an thi ang; anmahni tihrangtu LALPA ka nih hi.

¹⁰Puithiam chhûngte chauhvin thilhlan thianghlim hi an ei thei ang; puithiam awmpui emaw, a mi rawih emaw, mi dang tu mahin an ei ve tûr a ni lo.

¹¹Puithiam bawih, ama pawisa ngeia a lei emaw, a in chhûnga piang ngei emaw te chuan an ei ve thei ang.

¹²Puithiam fanu pawh ni se, puithiam ni lo pasala a neih chuan thilhlan thianghlim hi a ei ve thei lo vang.

¹³Pasal sûn emaw, mâk emaw, fa nei lova a pa ina tlulût leh emaw chuan a ei ve thei ang; puithiam thlah chauhvin ei thian a ni.

¹⁴Puithiam thlah ni lovin puithiam chanvo thil thianghlim chu lo ei palh sela, a rûl vek tûr a ni, hmun ngaa ṭhena hmun khat a pêk belh tûr a ni.

¹⁵Puithiamte chuan thilhlan thianghlim hi an tibawrhbâng tûr a ni lo.

¹⁶Ei ve thiang loho an eitîr tûr a ni lo; an eitîr chuan thiam loh an chang ang a, an tuar ang. Hêng thilhlan tithianghlimtu LALPA chu ka ni,” a ti a.

¹⁷ LALPA chuan Mosia hnênah,

¹⁸“Arona te, a fa te leh Israel mi te chu hrilh rawh: Israel mi pawhin, an zînga chêng hnam dang pawhin, thutiam hlen thilhlan emaw, mahni duh thu-a thilhlan emaw LALPA hnêna hâl ral tûr an rawn hlan dâwn chuan,

¹⁹a lo pawm theih tûr chu bâwngpa emaw, berâm emaw, kêl emaw, a pa hmêlhem lo a ni.

²⁰Hmêlhemna nei chu hlân mah se LALPA chuan a pawm lo vang.

²¹“Miin thutiam hlen nâna thilhlan emaw, mahni duh thu-a thilhlan emaw remna thilhlan atân LALPA hnêna an rawn hlan chuan an ran hlan chu hmêlhem lo a ni tûr a ni; tichuan, a lo pawm thei ang.

²²Ran mitdel te, a kebai te, a silawng te, pânhnaila nei te, a tangseh te, a phâr te LALPA hnênah hlân suh.

²³Mahni duh thu-a thilhlanah chuan bâwng emaw, berâm emaw, fere deuh pawh hlan theih a ni; thutiam hlen nâna thilhlanah erawh chuan pawm a ni lo vang.

²⁴Ran til lâk te, sawhkeh te, tihthlêr palh te, hleh te emaw chu LALPA hnênah hlan tûr a ni lo. In ram chhûngah hei hi tih khap a ni.

²⁵Hnam dang ran chu ei tûr thilhlanah hlan loh tûr a ni; chutiang hlan chu hmêlhemna neia chhiar tûr a ni, pawm theih a ni lo vang.”

²⁶ LALPA chuan Mosia hnênah,

²⁷“Berâm emaw, bâwng emaw, kêl emaw, a pa chu a pui bulah ni sarih a awm ang a, a ni riat ni aṭang chuan hâl ral atân hman theih a ni tawh ang.

²⁸Bâwng pui leh a notê, berâm pui leh a notê, kêl pui leh a notê; ni thuhmunah thilhlana hlan tûr a ni lo.

²⁹Lâwmthu sawina thilhlan i hlanin dân ang takin engkim ti rawh, pawm theih a ni ang,

³⁰ei zo vek ula, a tûk atân ei bâng suh u.

³¹“Ka thupêkte hi zâwm ula, ti rawh u, LALPA ka nih hi.

³²Ka hming hi in tibawrhbâng tûr a ni lo, Israel mite chuan ka thianghlim tih an hre tûr a ni; LALPA, a tihrangtu che u ka ni.

³³In Pathian ni tûrin Aigupta ram aṭangin ka hruai chhuak che u a ni, LALPA chu ka ni,” a ti a.