Read Mizo Lushai Leviticus 23 Bible Online

Leviticus 23 - Mizo Lushai bible

Leviticus 23

¹ LALPA chuan Mosia hnênah,

²“Israel mite chu hrilh rawh: LALPA chawimawina kût atâna hun ruatah awmni khamin in hmang ho ṭhîn tûr a ni. Chûng chu hêngte hi a ni:

³Ni ruk chhûng hna in thawk ang a, a ni sarih ni chu sabat a ni a, chawlh dêr tûr a ni. Hna thawk lovin Pathian chibai bûkin in inkhâwm tûr a ni. Sabat ni hi LALPA pual a ni, in awmna apiangah in serh tûr a ni.

⁴LALPA tâna kût ruatte chu hêng hi a ni, a hun ruatah in hmang ṭhîn tûr a ni.

⁵“Thla hmasa ber ni sâwm leh pali ni tlai lam hi LALPA Kalhlên kût a ni.

⁶Chumi thla vêk ni sâwm leh panga ni chu chhang dawidim telh loh kût inṭan ni a ni, ni sarih chhûng dawidim telh loh chhang in ei tûr a ni.

⁷A ni khat ni chuan inkhâwmpui in nei ang a, hna pangngai eng mah in thawk tûr a ni lo.

⁸Ni sarih chhûng chu ni tin LALPA hnênah ei tûr thilhlan in hlân tûr a ni. Ni sarih ni chuan inkhâwmpui in nei leh ang a, hna pângngai eng mah in thawk tûr a ni lo,” a ti a.

⁹ LALPA chuan Mosia hnênah,

¹⁰“Israel mite chu hrilh rawh: ka pêk tûr che u ram in thlen hun chuan puithiam hnênah in buh thar hmasa phal chu in rawn dah tûr a ni.

¹¹Ani chuan LALPA hmaah a thên ang a, a lo pâwm dâwn che u nia. Sabat ni a nih chuan a tûkah puithiam chuan a thên ṭhîn tûr a ni.

¹²Buhphal thên ni chuan berâmno, a pa, hmêlhem lo, kum khat vêla upa, hâlral thilhlanah in hlân tûr a ni.

¹³Chumi rual chuan buhbâl thilhlanah chhangphut ṭha chi kg. hnih, oliv hriak pawlh in hlân tel tûr a ni; chu chu LALPA lâwmzâwng tak chu a ni; uain litar khat pawh in tûr thilhlanah in hlân tel bawk tûr a ni.

¹⁴In buh thar, puithiamho hnêna in rawn hlan hma chu in ei tûr a ni lo. In thlahte pawhin he dân hi an zâwm kumkhua tûr a ni.

¹⁵“Buhphal, LALPA hmaa in thên ni, sabat zawh aṭanga chhiar ṭanin hapta sarih a ral ang a,

¹⁶sabat vawi sarih zawh tûk, ni sawmnga ni chuan buhbâl thilhlanah in thlai thar chu in hlân tûr a ni.

¹⁷Chhûng tinin mahni hmun ṭheuhvah dawidim telh chhang in ur tûr a ni. LALPA hmaa thên tûr tlang hnih in rawn keng tûr a ni, chhang tlang khat chu kg. hniha rit, chhangphut thar ṭha chi-a in siam hmasak ber a ni tûr a ni.

¹⁸Chumi rual chuan kum khat vêla upa berâmno pasarih, bâwngpa pakhat, berâmchal pahnih, hmêlhem lo vek, vântlângin LALPA tân an thawh ang a, an buhbâl thilhlan nên, in tûr thilhlan nên, hâlral thilhlanah an hlân tûr a ni; chu chu LALPA lâwmzâwng tak chu a ni.

¹⁹Sual thawina thilhlanah kêl pakhat in hlân ang a, remna thilhlanah berâmno pahnih, kum khat vêla upa ve ve, in hlân bawk tûr a ni.

²⁰Puithiamin chhang leh berâmno pahnih chu LALPA hmaah a thên ang a, puithiam chan tûr chu serh hran a ni ang.

²¹Chumi ni chuan tu man in hna pangngai in thawk tûr a ni lo, Pathian chibai bûk tûrin in inkhâwm tûr a ni. He dân hi in thlahte pawhin an awmna apiangah an zâwm kumkhua tûr a ni.

²²Buh in sengin vau fêma mi hlep zo vek suh u, lâk hmaih in neih pawh vai leh suh u. Mi retheite leh hnam dangte tân dah rawh u, LALPA in Pathian chu ka ni.”

²³ LALPA chuan Mosia hnênah,

²⁴“Israel mite chu hrilh rawh; thla sarihna, ni khat ni chuan awmni kham ula, tawtawrâwt hâm ula, inkhâwmpui nei ang che u.

²⁵LALPA hnênah buhbâl thilhlan in hlân tûr a ni, in hna pangngai tu man in thawk tûr a ni lo.”

²⁶ LALPA chuan Mosia hnênah,

²⁷“Thla sarihna, ni sâwm ni hi kum tina hnam pum sual thawina ni ropui a ni a, chaw ngheiin in inkhâwm tûr a ni. LALPA hnênah hâlral thilhlan in hlân tûr a ni.

²⁸Hemi ni hian hna thawh loh tûr a ni, in sual thawina hlan ni a ni si a.

²⁹Hemi nia thil eng emaw lo ei chu a chipuite zîng ata hnawh chhuah tûr a ni.

³⁰Hemi nia hna thawk chu LALPA ngei chuan a tihlum ang.

³¹He dân hi in awmna apiangah in thlahte pawhin an zâwm kumkhua tûr a ni.

³²Ni kaw tlai, ni tlâk aṭanga ni sâwm tlai ni tlâk thlengin chawlh ni-ah in hmang tûr a ni,” a ti a.

³³ LALPA chuan Mosia hnênah,

³⁴“Thla sarihna, ni sâwm leh panga ni aṭangin ni sarih chhûng Bâwkte kût in hmang tûr a ni.

³⁵A ni hmasa ber ni chuan khâwmpui urhsûn in nei ang a, in hna pângngai in thawk tûr a ni lo.

³⁶Ni sarih chhûng chu ni tin buhbâl thilhlan in hlân ṭhîn ang a, a ni sarih ni chuan khâwmpui in nei leh ang a, buhbâl thilhlan pawh in hlân tûr a ni, Pathian chibai bûk ni a ni, hna in thawk tûr a ni lo.

³⁷Hêngte hi LALPA chawimawi nâna kût in hman tûrte chu a ni, khâwmpui in nei ang a, ei tûr thilhlan te, hâlral thilhlan te, buhbâl thilhlan te leh inthawina chi dang leh in tûr thilhlan te, a hunbi tak a in hlan tûr chu a ni.

³⁸Hêng kût hi sabat serh bâka serh tûr a ni; tin, hêng thilhlante hi LALPA hmaa in thil hlan ṭhin thutiam hlen thilhlan te, mahni duh thu-a thilhlan te bâka tih tûr a ni.

³⁹“Buh in seng zawhah, thla sarihna ni sâwm leh panga ni aṭangin kût hi ni sarih chhûng in hmang tûr a ni. A ni hmasa ber chu chawlh dêrna ni a ni ang.

⁴⁰Chumi ni chuan in thlairah ṭha ber te han la ula, tûmkau te leh thingbuk ṭha chhâwl te sât ula, LALPA hmaah hlim takin awm ang che u.

⁴¹Chutiang chuan ni sarih chhûng ti ang che u. He dân hi in thlahte pawhin kumkhuain an zâwm tûr a ni.

⁴²Israel mi zawng zawng chu hemi ni sarih chhûng hian chhâwlbûkah an awm tûr a ni.

⁴³Israel mite Aigupta ram aṭanga LALPA chuan a hruai chhuah khân bâwkte chhe tê tê-ah a awmtîr ṭhîn tih in fate pawhin an hre dâwn nia, LALPA, in Pathian ka nih hi.”

⁴⁴Chutiang tak chuan Mosian Israel mite chu LALPA chawimawina kût hmang tûrin dân a siamsak a ni.