Read Mizo Lushai Leviticus 24 Bible Online

Leviticus 24 - Mizo Lushai bible

Leviticus 24

¹ LALPA chuan Mosia hnênah,

²“Israel mite chuan oliv hriak thlitfîm khâwnvâr tui atân rawn dah sela, a hun takah chhit ziah tûr a ni.

³Inbiakna bûk chhûnga Hmun Thianghlim Ber, thuthlung dahna, puanzâr pindan pâwnah tlai tin Arona chuan a chhî ang a, a tûk khawvâr thlengin a chhi reng tûr a ni. He thil hi tih kumkhua tûr a ni.

⁴Rangkachak hlîr hlaka siam khâwnvâr dahna-a khâwnvârte chu Arona chuan a chei ang a, LALPA hmaah chuan a hun takah a chhi ziah tûr a ni.

⁵“Chhangphut ṭha chiin chhang tlang sâwm leh pahnih, kg. khat zêla rit siam ang che.

⁶Rangkachak hlîr hlaka luan dawhkânah chuan tlar hnih, paruk zêlin dah ang che.

⁷Beraw hlîr hlak, eng emaw zât chhang dah tlarah chuan dah ve ve ang che, chu chuan chhang chu LALPA hnêna ei tûr thilhlan a nih a entîr ang.

⁸Sabat ni apiangin LALPA hmaah chhang thar dah ziah tûr a ni. Hei hi Israel-te tân kumkhua-a tihmâkmawh a ni.

⁹Chhang chu Arona leh a thlahte ei tûr, an chanpual a ni, hmun thianghlimah chuan an ei ṭhîn tûr a ni, LALPA hnêna thilhlan, puithiamte tâna serh hran tlat chu a ni.”

¹⁰Aigupta mi laka Israel nu pakhat fapa leh Israel mi an insual a.

¹¹Chu hmeichhia chu Selomiti fanu a ni, Dan hnam Dibria tunu a ni. Israel nu fapa chuan LALPA hming a sawichhia a, ânchhia a lawh bawk a. Mosia hnênah an rawn hruai a.

¹²Engtia tih tûr nge tih LALPA an râwn a, a rawn chhân hma chu an vêng tlat a.

¹³LALPA chuan Mosia hnênah,

¹⁴“Kha mi kha daipâwnah hruai la, Pathian ânchhia a lawh lai hretute khân a lu chungah an kut nghat sela, mipuiin lungin dêng hlum rawh se.

¹⁵Israel mite chu hrilh rawh: Pathian ânchhelawhtu chuan a tuar ngei tûr a ni.

¹⁶Pathian pawi sawi chu tihhlum tûr a ni; Israel pungkhâwmho zawng zawng chuan lungin an dêng hlum tûr a ni; Israel mi pawh, an zînga hnam dang chêng ve pawh, Pathian pawi sawi chu tihhlum tûr a ni.

¹⁷“Tual that chu tihhlum ve tûr a ni.

¹⁸Mi dang ran talhsaktu chuan a rûl tûr a ni, nun aiah nun.

¹⁹Mi dang tihmêlhemtu chu a tih ang chiahin a chungah tih ve tûr a ni.

²⁰Ruh pakhat a tihtliah chuan a ruh pakhat tihtliah ve tûr a ni: Mit aiah mit, hâ aiah hâ, tihhmêlhem aiah tihhmêlhem ve,

²¹ran talh rutu chuan a rûl ang a, mihring thattu chu thah ve tûr a ni.

²²He dân hi Israel mi zawng zawng tân a ni: in zînga chêng hnam dangte pawh a huam ang, LALPA, in Pathian ka nih hi,” a ti a.

²³Hêng thu hi mite a hrilh hnu chuan Pathian ânchhelawhtu kha riahhmun ata an hruai chhuak a, an dêng hlum ta a. Mosia hnêna LALPA thupêk ang chuan Israel mite chuan an ti ta a.