Read Mizo Lushai Leviticus 25 Bible Online

Leviticus 25 - Mizo Lushai bible

Leviticus 25

¹Sinai tlângah LALPA chuan Mosia hnênah,

²“Israel mite chu hrilh rawh: ka pêk tûr che u ram in thlen hun chuan LALPA chawimawi nân a kum sarihna zêlah ram chu chawlhtîr ang che u.

³Kum ruk chhûng thlai in chîng ang a, in grep te in sât ang a, a rah in seng ang.

⁴A kum sarih kum erawh chuan LALPA chawimawi nân chawlhtîr tûr a ni, in lovah te thlai chîng suh u, in grep sât no hek suh u.

⁵In buh hli pawh hlep suh u. In grep sah no loh rahte pawh lo suh ang che u, ram tân chawlh dêr kum a ni.

⁶Ram chu chawlhtîr mah ula in bawih tân te, hlawhfa in chhawr tân te, hnam dang in awmpui tân te leh in tân te ei tûr chu a awm tho vang.

⁷In ran vulh te, in rama ramsate tân pawh ei tûr a awm tho vang.

⁸“Kum sarih vawi sarih, kum sawmli leh pakaw ral hnu kum,

⁹thla sarihna ni sâwm ni, sual thawina ni ropuiah chuan mi tîr ula, ram pum puiah tawtawrâwt hâm rawh se.

¹⁰Kum sawmngana chu in lâwm ang a, ram chhûnga awm zawng zawng tân zalênna thu in puang tûr a ni: in tân Jubili kum a ni ang. In leh lo hralh tawh zawng zawng chu a neitu bul hnênah emaw, a thlahte hnênah emaw pêk kîr leh tûr a ni, bawiha hralh pawh an chhuak vek tûr a ni, mahni in leh lovah an kîr leh ang.

¹¹Chumi kum chuan eng mah in chîng tûr a ni lo, a hli in seng tûr a ni lo va, in grep sah no loh rah pawh in lo tûr a ni lo.

¹²Kum tluanin chu kum chu in tân kum serh a ni ang a, in lova hâwng kha in ei tûr a ni lo.

¹³He Jubili kum hian mahni ram ṭheuh in nei kîr leh tûr a ni.

¹⁴Chuvângin, ram in hralhin emaw, in leiin emaw, i chipui Israel mi chu âwm lo takin i ti tûr a ni lo.

¹⁵Jubili kum a thlen hmaa rama thlai haw thei zât tûr hisâpin a ram man chu chhût tûr a ni.

¹⁶Kum a la tam chuan a man a sâng ang a, kum tlêm tê chauh la awm a nih leh a man a tlêm tûr a ni; ram kha hralh tak tak a ni lo va, thlai thar thei chauh kha hralh tûr a ni.

¹⁷In Israel-puite bum suh u, Pathian ṭih rawh u, LALPA in Pathian ka nih hi.

¹⁸“LALPA dân hi zâwm ula, a thupêkte hi awih ula, ramah chuan mangang lovin in awm dâwn nia.

¹⁹Ramah thlai a haw ṭha ang a, in duh tâwk tâwk ei tûr in nei ang a, thlamuang takin in awm thei ang.

²⁰‘A kum sarih kum chuan eng mah kan chin lohva, kan seng bawk si loh chuan eng nge kan ei tâk ang?’ in ti a ni thei a.

²¹A kum ruknaah ram chu mal ka sâwm ang a, kum hnih ei tûr a haw ang.

²²Kum riatna a in thlai chîn rah in seng hma chu kum rukna a haw kha in tla tâwk tûr a awm dâwn a ni.

²³In ram chu in hralh hlen thei lo, ram chu ka ta a ni; nangni hi mikhual mai in ni.

²⁴Ram chu in hralh a nih pawhin a neitu bul khân a lei kîr leh thei ngei tûr a ni.

²⁵Israel mi chu a lo retheih hle a, a ram hralh hial a ṭûl a nih pawhin a laichîn hnaiin a tlan tûr a ni.

²⁶Tlansaktu laichîn hnai nei lo chu, amah a lo hmuingîl leh thei a, amah ngeiin a lei kîr leh thei tûr a ni.

²⁷Chutiang thilah chuan Jubili kum thlen hmaa thlai thar thei zât man hisâpin lei kîr theih tûr a ni, Jubili kum chuan a nei kîr leh tho dâwn si a.

²⁸Ram lei kîrna tûr pawisa a neih zawh loh chuan a leitu khân Jubili kum thlengin a nei ang a, Jubili kum chuan a neitu bul chu a pe kîr leh tûr a ni.

²⁹“Kulh nei khawpuia in neiin a in chu a hralh chuan a hralh aṭanga kum khat chhûng chuan a tlan leh thei ang.

³⁰Kum khat chhûnga a lei kîr leh theih loh chuan lei kîr leh theih a ni tawh lo ang a, leitu khân a thlahte thlengin a in chu a nei thei tawh ang; Jubili kumah pawh pêk kîr tûr a ni lo.

³¹Khua kulh nei lo, thingtlâng khuaa in chu ram inlei anga ngaih tûr a ni, a neitu bul chuan a lei kîr leh thei ang a, Jubili kumah pêk kîr leh tho tûr a ni.

³²Levia chite erawh chuan an awmna tûr ruat khuaa an thil neih chu eng lai pawhin an lei kîr leh thei ang.

³³Hêng khuaa awm Levia chiten in an hralh chu lei kîr leh thei lo mah se, Jubili kum chuan pêk kîr leh tûr a ni; Levia chiten an awmna tûr ruat khuaa an in neih chu Israel-te zînga an kumkhaw thil neih ngheh ve chu a nih avângin.

³⁴Levia chite khaw bula ran tlatna hmun chu eng lai mahin hralh tûr a ni lo: thil neih ngheh an neih ve chhun a ni.

³⁵“In unau Israel, i bula awm chu, a lo retheih viauva, mahni pawh a inchâwm theih loh chuan inhlawhfa angin emaw, mikhual angin emaw i enkawl tûr a ni; tichuan, i bulah a awm ve reng thei dâwn nia.

³⁶A hnên aṭangin a pung ûm suh, Pathian ṭih la, i unaupa chu amahin a khawsa ve thei dâwn nia.

³⁷Pawisa i pûktîr pawhin a pung neihtîr suh la, i buh a leiin eng mah hlêp suh.

³⁸Kanan ram hi ka pe che u a, in Pathian ni tûrin Aigupta ram aṭanga hruai chhuaktu che u LALPA in Pathian ka nih hi.

³⁹I chipui Israel chu a lo retheih êm avângin i bawihah rawn inhralh mah se, bawih angin i chhawr tûr a ni lo.

⁴⁰Inhlawhfa leh mikhual angin i enkawl ang a, Jubili kumah i chhuah leh tûr a ni.

⁴¹Chumi hnuah chuan a fate nên an chhuahsan ang chia, an chhûngte hnênah an awm leh tawh ang a, an in leh lo chu an luah leh ang.

⁴²Israel mite hi ka bawih an ni, Aigupta ram aṭangin ka lei chhuak a, bawihah hralh tûr an ni lo.

⁴³Dim lo baksakin an chungah in che tûr a ni lo, Pathian chu ṭih rawh u.

⁴⁴Mipa emaw, hmeichhia emaw bawih in mamawh chuan in vêla hnam zînga mi lei ang che u.

⁴⁵In zînga awm hnam dang fate chu in lei thei ang; chutiang mi fa, in ina piangte chu in ta an ni zêl ang.

⁴⁶In faten an rochung thei ang, an nei ang a, an dam chhûng chu an bawih an ni ang. Amaherawhchu, in chipui Israel chu in tinawmnah tûr a ni lo.

⁴⁷“In zînga chêng hnam dang chu lo hausa ta hle sela, in chipui Israel mi ve thung chu a rethei hle a; chu hnam dang mi hnênah emaw, ama chipui hnênah emaw bawihah a inhralh a;

⁴⁸inhralh tawh pawh ni se, lei kîr leh theih a ni, ama unau zînga pakhatin emaw,

⁴⁹a pamiin emaw, a pami fapain emaw, a laichîn hnai mi dangin emaw a lei kîr thei ang.

⁵⁰Amah leitu nên an inbia ang a, a inhralh kum aṭanga Jubili kum thlengin inhlawhfa pangngaiin eng zât nge a hlawh hman ang tih hisâpin a intlanna tûr man chu tuk a ni ang.

⁵¹A rei emaw, rei lo emaw, Jubili thlen thlenga a hlawh theih zât tûr chu a leitu hnên aṭanga intlan chhuahna man zât tûr chu a ni.

⁵²

⁵³Inhlawhfa, kum khat atâna rawih ang zêlin an inchhawr tûr a ni. A pu chuan a tinawmnah tûr a ni lo.

⁵⁴Engti kawng maha lei chhuah a nih loh pawhin Jubili kum chuan chhuah ngei tûr a ni, a fate nên.

⁵⁵Israel mi rêng rêng, tu ma bawihah an tâng kumkhua tûr a ni lo; Israel mite chu LALPA bawih, Aigupta ram aṭanga a lei chhuahte an ni si a; LALPA, an Pathian chu ka ni.