Read Mizo Lushai Leviticus 26 Bible Online

Leviticus 26 - Mizo Lushai bible

Leviticus 26

¹“Eng mah ni hlei lo, milem chher te, lung milem te, chibai bûk atân in insiam chawp tûr a ni lo, LALPA, in Pathian ka nih hi.

²Chawlh tûr ka tih nite serh ula, chibai mi bûkna hmun chu zah rawh u, LALPA ka nih hi.

³Ka dânte hi in zawma, ka thupêkte in awih chuan

⁴a hun takah ruah ka sûrtîr ang a, in lo a hlâwk ang a, in theite pawh a rah duh êm êm ang.

⁵Grep rah lawh hun thlengin buh seng a ṭûl ang a, buh tuh hun thlengin in grep rah lawh a ṭûl bawk ang. Duh tâwk tâwka ei tûr in nei ang a, in ramah chuan thlamuang takin in chêng ang.

⁶In ramah remna ka lêntîr ang a, hlauh nei lovin in mu siai siai ang a, ram sakawlhte in ram ata ka tirêm ang a, hmêlmain an rawn rûn hek lo vang che u.

⁷In hmêlmate chu in ûm ang a, khandaihin in that ang.

⁸Mi pangain mi za in hneh ang a, mi za chuan mi sîng in hneh thei ang.

⁹Mal ka sâwm ang che u a, fanaute ka pe ṭeuh ang che u; ka thuthlung angin keiin ka tih tûr ka tihsak zêl ang che u.

¹⁰Buh hlui in ei sên loh chu a thar dah nân paih a ngai ang a.

¹¹In zîngah ka chêng a, ka thlahthlam tawh lo vang che u.

¹²Ka awmpui ang che u a, in Pathian ka ni ang a, ka mite in ni ang.

¹³Kei LALPA, in Pathian hian, bawih ni tawh lo tûrin Aigupta ram ata ka hruai chhuak che u a, in nghâwngkawlte chu ka tihtliahsak che u a, thawveng takin in lêng thei ta a ni.

¹⁴“Ka thu in ngaihthlâk duh lohva, ka thupêkte in awih duh lohva,

¹⁵ka dânte in hnâwla, awm dân tûr ka tih hmusita tih tûr ka tihte in tih duh lohva ka thuthlung in bawhchhiat chuan,

¹⁶in chungah chhiatna ka rawn thlen ang, ngawr leh khawsikpuiin in na ang a, in mitte pawh a tichhia ang a, in dam khawchhuak thei lo vang. Thlai chite pawh chîng mah ula in chîng thlâwn mai mai a ni ang; in hmêlmate ei tûr lek a ni ang.

¹⁷Ka hawisan ang che u a, nangmahni hawtute chu in chunga rorêltute an ni ang a, ûm loh pawhin in tlânchhe dâwr dâwr ang.

¹⁸Chutiang pawha ka thu in la ngaihthlâk duh loh fo chuan, a lêt sarihin ka hrem ang che u.

¹⁹In chhuan êm êm, in chakna chu, ka tihchhiatsak ang che u; in tân vân chu thîr anga ruah pai lovin ka siam ang a, in lote pawh dâr angin a châr ang.

²⁰In thawk hah thlâwn dâwn a ni, in lovah seng tûr a awm lo vang, in thei kûngte lah a rah hek lo vang.

²¹Mi do zâwnga in awma, ka thu in la pawisak duh loh fo chuan in sual phû tâwk lêt sarihin ka hrem ang che u.

²²Ramsa nghal tak tak ka rawn tîr ang a, in fate leh in rante an rawn seh ang, kawngṭum zawh bel tham pawh in awm lo vang.

²³“Hêng hremna in tawh hnu pawha ka lam hawi lova min la do fo chuan,

²⁴in chungah ka ṭuan ang a, a leh sariha nain ka hrem leh ang che u.

²⁵In zîngah hmêlma ka rawn tîr ang a, thuthlung in bawhchhiatna phuba an rawn la ang. In khawpui kulh chhûngahte in bîk pawhin hri ka lentîr ang a, hmêlmate chuan an rawn la tho vang.

²⁶In ei tûr lâkna ka tiping ang a, thuk sâwm hmanga eirawng bâwl ṭhîn nuho khân thuk khat chauh hmangin eirawng an bâwl tawh ang. An sem ker ker ang a, an chan ai an ei zawh hnuah pawh an ril a la ṭâm tho vang.

²⁷Chutichung pawha ka thu in ngaihthlâk duh lohva, min la do luih zêl chuan,

²⁸thinurin in chungah ka ṭuan ang a, a lêt sariha nâin ka hrem ang che u.

²⁹In fapate leh in fanute sa in ei hial ang.

³⁰In pathian biakna hmunsângte chu ka tichhia ang a, in rimtui hâlna maichâmte chu ka ṭhiat ang a, in milemte chu ka titlu ang a, an chungah in ruang chu ten takin ka paih ang.

³¹In khawpuite chu ka tiram ang a, in pathian biakna te chu ka tichhia ang a, in inthawinate chu ka lo pawmsak lo vang che u.

³²In ram chu ka tichereu vek ang a, a luahtu in hmêlmate chuan mak an ti êm êm ang.

³³Indona a lo thleng ang a, hnam dang ramah an hruai darh ang che u, in khawpuite chu a chim rem rum ang.

³⁴In hmêlmate rama in awm chhûngin in ram chu a châwl dêr dâwn a ni.

³⁵In awm chhûngin in ram chu in chawlhtîr duh lo va, in awm loh chhûng chu a châwl dâwn ta a ni.

³⁶In hmêlmate rama la awmte chu an ṭi êm êm ang a, hnahthel lêng maiah pawh an tlânchhia ang a, khandaiha ûm ang hialin tu ma ûm loh pawhin an tlu ang.

³⁷Khandaiha ûm ang maiin an inpaltlu rem rum ang a, hmêlma lo do lêt tûr tu mah in awm lo vang.

³⁸Mi ramah in thi ang a, chûngah chuan an phûm ang che u.

³⁹In hmêlmate rama la dam chhunte chu in sualna avâng leh in pate sualna avângin an zuih ral ang.

⁴⁰“Chûng mite chuan an pate nên mi do va, mi hawisanin thil an tisual a ni tih an inhre chhuak ang a,

⁴¹anmahni avângin ka hawisan a, an hmêlmate ramah ka hnawt chhuak a ni tih an hria ang a; tichuan, an inphahhniam ang a, an suahsual man an tlâk hnu chuan,

⁴²Jakoba te, Isaka te leh Abrahama te hnêna ka thutiam kha ka hre reng ang a, ka mite chu he ram hi ka pêk tûr thu ka hrilh thar leh ang.

⁴³Amaherawhchu, ram chu a chawlh dêr theih nân ram ata mite chu lâk chhuah zet tûr a ni. Ka dânte leh ka thupêkte hnâwla an thil sual tih man chu an tuar zet tûr a ni.

⁴⁴Chuti tak chuan hrem mah ila an hmêlmate rama an awm chu ka hlamchhiah dêr lo vang a, ka tiral vek hek lo vang.

⁴⁵An thlahtute nêna ka thuthlung chu ka tithar leh ang. Aigupta ram aṭang khân hnam tin hmuhah ka mite chu, kei LALPA hi an Pathian ka nih theihna tûra Aigupta ram ata hnam tin mit hmuha ka mite hruai chhuaktu ka nih hi. Kei hi LALPA chu ka nih hi.”

⁴⁶Hêng hi Sinai tlânga Mosia hnêna LALPA dân leh a thupêk, Israel mite tâna a pêk chu a ni.