Read Mizo Lushai Leviticus 27 Bible Online

Leviticus 27 - Mizo Lushai bible

Leviticus 27

¹ LALPA chuan Mosia hnênah,

²“Israel mite chu hrilh rawh: Miin LALPA hnêna pêkah mihring pêk tiam sela, chu mihring tlanna man chu hetianga hisâp tûr a ni:

³Mipa, kum sawmhnih chin, kum sawmruk thlengin, tangkarua sekel sawmnga bûk a ni ang.

⁴Hmeichhe puitling tawh chu tangkarua sekel sawmthum bûk a ni ang.

⁵Mipa naupang, kum nga chin kum sawmhnih thlengin tangkarua sekel sawmhnih bûk a ni ang, hmeichhia a nih chuan tangkarua sekel sâwm bûk a ni ang.

⁶Nausên thla khat chin kum nga thlengin mipa chu tangkarua sekel nga bûk a ni ang a; hmeichhia chu tangkarua sekel thum bûk a ni ang.

⁷Kum sawmruk chung lam mipa chu tangkarua sekel sâwm leh panga bûk a ni ang a, hmeichhia chu tangkarua sekel sâwm bûk a ni ang.

⁸“A petu chu a retheih êm avângin a tlan chhuahna man tuk zât khi a pêk theih loh chuan pêk a tiam mihring kha puithiam hnênah a rawn hruai ang a, puithiam chuan bituk aia tlêm deuh, a pêk theih tâwk âwm, a lo tuk ang.

⁹“LALPA hnêna thilhlana hman tlâk miin ran pêk a lo tiam chuan LALPA hnêna pêk chu serh hran tlat a ni tawh.

¹⁰A petu chuan a pêk thlâkna tûr emaw, a aiah thil dang emaw a pe thei tawh lo vang; chutianga tih a tum chuan a pahnihin LALPA ta tûr a ni ang.

¹¹“Ran, ei thiang lo, LALPA hnêna thilhlan atâna hman tlâk loh pe a nih chuan puithiam hnênah a rawn kai ang a,

¹²Puithiam chuan a man âwm zât bi a lo tuk ang a, chumi zât chu a manah chhiar tûr a ni.

¹³A petu chuan tlan a duh chuan a man tuk zât leh chumi hmun ngaa ṭhena hmun khat belhin a tlan thei ang.

¹⁴“Miin ama in LALPA hnêna pêk tiam sela, puithiamin a in chu a ṭhat leh ṭhat loh athuin a man a tuk ang a; a tuk zât chu in man atân chhiar a ni ang.

¹⁵A in chu tlan a duh chuan a man tuk zât chu a pe ang a, hmun ngaa ṭhena hmun khat a pêk belh bawk tûr a ni.

¹⁶“Miin ama ram ṭhenkhat LALPA tân pêk a tiam chuan thlai haw thei zât aṭangin a man chu tuk a ni ang; barli ṭin sawmli hâwnna chu tangkarua sekel sâwm bûk mana chhiar a ni ang.

¹⁷Jubili kum zawh chiaha pe a nih chuan a man puitling chhiar tûr a ni.

¹⁸Kum danga pêk a nih chuan puithiamin Jubili thlengin eng zât nge ramah haw thei tih a chhût ang a, chu ang chuan a man chhiar a ni ang.

¹⁹A neituin ram chu a tlan duh chuan a man chhiar zât chu a pe ang a, hmun ngaa ṭhena hmun khat a pêk belh bawk tûr a ni.

²⁰A lo chu amahin a tlan duh loh emaw, mi dang leitîr emaw a nih chuan tlan theih a ni tawh lo vang.

²¹Jubili kumah chu ram chu LALPA tân serh hran a ni ang a, pêk a nih avângin puithiam ta tûr a ni tawh ang.

²²“A ram lei, a rochan ram ni lo a pêk chuan,

²³puithiamin Jubili thlengin a man a chhût ang a, chumi ni ngei chuan a zât chu a pe ang a, a pawisa chu LALPA ta a ni.

²⁴Jubili kum chuan a neitu bul hnênah emaw, a thlahte hnênah emaw pêk kîr leh tûr a ni.

²⁵Hêng thil man chhût hi Tempul bûklung hman lai anga chhût tûr a ni. Sekel khat chu Gera sawmhnih tluk a ni.

²⁶“Ran piang hmasa ber chu LALPA ta a ni sa a, mahni duh thu-a thilhlanah emaw pêk tûr a ni lo: bâwngno pawh, kêlno pawh LALPA ta sa a ni.

²⁷Ran ei thiang lo no hmasa ber erawh chu a man tuk zât leh hmun ngaa ṭhena hmun khat belhin tlan leh theih a ni; a petuin a tlan duh loh chuan mi dang hnênah a man bituk ang chuan hralh tûr a ni.

²⁸“LALPA tân liau liauva miin a neih ang ang, mihring emaw, ran emaw, a rochun ram emaw a serh hran tawh chu hralh theih a ni lo va, tlan theih a ni hek lo, LALPA ta a ni kumkhua tawh ang.

²⁹“Mihring pawh ni se, chutianga pêk tawh chu tlan chhuah theih a ni tawh lo, tihhlum mai tûr a ni.

³⁰“Ram chhûnga thil thar chhuah rêng rêng, buh pawh, thei pawh, sâwma pakhat chu LALPA ta a ni.

³¹Miin chu chu a tlan duh chuan a man pangngai bâkah hmun ngaa ṭhena hmun khat pêk belhin a tlan thei ang.

³²Ran vulh rêng rêng sâwma pakhat chu LALPA ta a ni.

³³Ran neitu chuan a chhe deuh apiang a sâwmnaah a dah tûr a ni lo, a ṭha deuh chu a chhe deuhvin thlâk tûr a ni hek lo, thlâk a tum chuan LALPA ta ve ve a ni ang a, tlan pawh a tlan thei lo vang,” a ti a.

³⁴Hêng thupêkte hi Sinai tlângah Mosia hnêna Israel-te tân LALPA pêk a ni.