Read Mizo Lushai Leviticus 3 Bible Online

Leviticus 3 - Mizo Lushai bible

Leviticus 3

¹‘Remna thilhlan tûr miin an ran zînga mi an rawn hlan chuan a nu emaw, a pa emaw, hmêlhem lo, LALPA hmaah an rawn hlân tûr a ni.

²A ran hlan lu-ah chuan a kut a nghat ang a, Inbiakna bûk tual luhna kawngka bulah a talh ang a, puithiamin a thisen chu maichâm a theh kual chhuak ang.

³Remna thilhlan aṭang chuan LALPA tân hêngte hi hlan tûr a ni; a rîlbawh thau zawng zawng,

⁴a kal te, a bawhtu thau te, a thin hlâwm ṭha lai hleh te.

⁵Chûng chu puithiamin maichâmah hâlral thilhlan dang a hâl rualin a hâl ral tûr a ni; chu chu LALPA lâwmzâwng tak a ni.

⁶‘Remna thilhlan tûr miin a berâm emaw, a kêl emaw zînga mi a rawn hlan chuan a nu pawh, a pa pawh, hmêlhem lo a hlân tûr a ni.

⁷Berâm a rawn hlân a nih chuan

⁸a lu-ah a kut a nghat ang a, Inbiakna bûk kawtah LALPA hmaah a talh tûr a ni; puithiam chuan a thisen chuan maichâm a theh kual chhuak tûr a ni.

⁹Remna thilhlan aṭang chuan LALPA tân hêngte hi a hlân tûr a ni; a mei thau, a bul rêta tan, a rîlbawh thau zawng zawng,

¹⁰a kalte leh a bawhtu thau, a thin hlâwm ṭha lai hleh.

¹¹Chûng chu puithiamin maichâmah, LALPA hnênah ei tûr thilhlanah a hâl ral tûr a ni.

¹²‘LALPA hnêna a thilhlan chu kêl a nih chuan,

¹³a lu-ah a kut a nghat ang a, Inbiakna bûk kawtah a talh ang a, a thisen chuan puithiamin maichâm a theh kual chhuak tûr a ni.

¹⁴Hêng hi ei tûr thilhlan atân LALPA hnêna a hlan tûr chu a ni; a rîlbawh thau zawng zawng,

¹⁵a kal te, a bawhtu thau te, a thin hlâwm ṭha lai hleh te.

¹⁶Hêng hi ei tûr thilhlan atân puithiam chuan maichâmah LALPA lo lawm atân a hâl ral tûr a ni. A thau zawng zawng hi LALPA ta tûr a ni.

¹⁷‘Israel mi tu mahin sa thau leh thisen an ei tûr a ni lo. Israel mite chuan khawiah pawh awm se he dân hi an zâwm kumkhua tûr a ni,’ ” a ti a.